ޑެޕިއުޓީ ޕްރޮސެކިއުޓާ ޖެނެރަލް އަލީ ސަމީރު އެ މަގާމުން މިއަދު އިސްތިއުފާ ދެއްވައިފި އެވެ.

ޑެޕިއުޓީ ޕްރޮސެކިއުޓާ ޖެނެރަލްގެ މަގާމާ 2022 ގައި ހަވާލުވެވަޑައިގެންނެވި ސަމީރު "އަދަދު" އަށް ވިދާޅުވީ މަގާމުން އިސްތިއުފާ ދެއްވީ މިއަދު ކަމަށާއި އިސްތިއުފާ ދެއްވީ އެއްވެސް ސަބަބެއް އޮވެގެން ނޫން ކަމަށެވެ.

ހައި ކޯޓުގެ ފަނޑިޔާރުކަން ކުރިން ކުރެއްވި ސަމީރު އަދި ކުރީގެ ޕްރޮސެކިއުޓާ ޖެނެރަލް ހުސެއިން ޝަމީމްއަކީ އެކުގައި މިސްރުގެ އަޒްހަރު ޔުނިވާސީޓީން ތައުލީމް ހާސިލް ކުރެއްވި ދެ ބޭފުޅުންނެވެ.

ސަމީރު ވަނީ މެލޭޝިޔާގެ އިންޓަނޭޝަނަލް އިސްލާމިކް ޔުނިވާސިޓީން ކޮމްޕަރޭޓިވް ލޯ އިން މާސްޓާސް ޑިގްރީ ވެސް ހާސިލުކުރައްވާފަ އެވެ.

އޭނާ އަދާކުރައްވާފައިވާ މަގާމުތަކުގެ ތެރޭގައި ޖިނާއީ ކޯޓުގެ ސެކްރެޓެރީ ކަމާއި، މަދަނީ ކޯޓުގެ ސީނިއާ އެޑްމިން އޮފިސަރު ކަމާއި، މަދަނީ ކޯޓުގެ ގާޒީ ކަމާއި، މަދަނީ ކޯޓުގެ އިސް ގާޒީ ކަމާއި، ސިވިލް ކޯޓުގެ އިސް ގާޒީކަން ހިމެނެ އެވެ.

ޕްރޮސެކިއުޓާ ޖެނެރަލްގެ މަގާމުން ޝަމީމް ވަކި ކުރަން އޮގަސްޓް 22، ގައި ބޭއްވި ރައްޔިތުންގެ މަޖިލިސް ޖަލްސާ ކުރިއަށް ދަނިކޮށް އޭނާ ވަނީ މަގާމުން އިސްތިއުފާ ދެއްވާފަ އެވެ. ޝަމީމް އިސްތިއުފާ ދެއްވި ނަމަވެސް، އޭނާ މަގާމުން ވަކިކުރަން އެ ޖަލްސާގައި ވޯޓު ނަގައި، އެގޮތަށް ފާސްކުރި އެވެ.

ހުސްވި ޕްރޮސެކިއުޓާ ޖެނެރަލްގެ މަގާމަށް އައްޔަނު ކުރެއްވީ ރައީސް ޑރ. މުހައްމަދު މުއިއްޒުގެ ލީގަލް ސެކްރެޓަރީގެ މަގާމުގައި ހުންނެވި އައްބާސް ޝަރީފު އެވެ.