މި އަހަރަށް ލަފާކޮށް 19 ވަނަ މަޖިލީހުން ފާސްކުރި ބަޖެޓުން މިއަދާ ހަމައަށް ހަރަދުކުރި ގޮތުގެ ތަފުސީލު، މި ސަރުކާރުން ހުށަހެޅި ސަޕްލިމެންޓަރީ ބަޖެޓު ދިރާސާ ކުރާ ކޮމިޓީއަށް ވެސް ސިއްރުކުރަން އެ ކޮމިޓީން ފާސްކޮށްފި އެވެ.

މި އަހަރުގެ ބާކީ ބަޔަށް ބޭނުންވާ ހަރަދުތައް ހަމަޖެއްސުމަށް ކަމަށް ބުނެ ފިނޭންސް މިނިސްޓަރު މޫސާ ޒަމީރު މަޖިލީހަށް ހުށަހެޅުއްވީ ފަސް ބިލިއަން ރުފިޔާގެ ބަޖެޓެކެވެ. ބަޖެޓު ދިރާސާ ކުރާ ކޮމިޓީއަށް މިނިސްޓަރު ހާޒިރުވާނީ މާދަމާ އެވެ.

މިނިސްޓަރު ހާޒިރުވާއިރު މި އަހަރުގެ ބަޖެޓު މިހާތަނަށް ހަރަދުކުރި ގޮތުގެ ތަފުސީލު ކޮމިޓީއާ ހިއްސާކުރުމަށް ހުށަހެޅުއްވީ އިދިކޮޅު އެމްޑީޕީއަށް ނިސްބަތްވާ ހަނިމާދޫ ދާއިރާގެ މެންބަރު އަބްދުއްގަފޫރު މޫސާ އެވެ.

މި ހުށަހެޅުމަށް ވޯޓަށް އެހުމުން އެ ތަފުސީލުތައް ކޮމިޓީއަށް ހިއްސާކުރަން ފެންނަ ކަމަށް ވޯޓު ދެއްވީ ކޮމިޓީގައި ތިއްބެވި އެމްޑީޕީގެ ހަތަރު މެންބަރުންނާއި އެމްޑީއޭގެ މެންބަރު މުހައްމަދު އައްބާސް އެވެ.

ނަމަވެސް، ކޮމިޓީގައި ހިމެނޭ ޕީއެންސީގެ 14 މެންބަރުންނާއި ޖޭޕީގެ ލީޑަރު ގާސިމް އިބްރާހިމް ވަނީ ތަފުސީލުތައް ސިއްރުކުރަން ވޯޓު ދެއްވާފަ އެވެ. މި ހުށަހެޅުމަށް ވަކިގޮތަކަށް ވޯޓު ނުދެއްވީ ޕީއެންސީއަށް ނިސްބަތްވާ ހިތަދޫ މެދު ދާއިރާގެ މެންބަރު އަހުމަދު އަޒާން އެވެ.

ތަފުސީލުތައް ސިއްރުކުރަން ފެންނަ ކަމަށް ޕީއެންސީ މެންބަރުން ވޯޓު ދެއްވަން ފެށުމާއެކު އިދިކޮޅު މެންބަރުން ވަނީ، ރައްޔިތުންގެ ފައިސާ ހަރަދުކުރި ގޮތް އޮޅުވާލަން މަސައްކަތް ކުރާ ކަމަށް ވިދާޅުވެފަ އެވެ.

ސަޕްލިމެންޓަރީ ބަޖެޓު މަޖިލީހަށް ހުށަހަޅުއްވަމުން ޒަމީރު ވިދާޅުވީ، މި އަހަރަށް ފާސްކުރި 49 ބިލިއަން ރުފިޔާގެ ބަޖެޓުން މިދިޔަ މަހުގެ ނިޔަލަށް ހަރަދުވީ 37 ބިލިއަން ރުފިޔާ ކަމަށެވެ. ނަމަވެސް، ޖޫން 20، ގެ ފަހުން ސަރުކާރުން މާލީ ތަފާސްތައް ހާމަކޮށްފައި ނުވާތީ މި ފައިސާ ހަރަދުކުރި ގޮތެއް ސާފެއް ނުވެ އެވެ.

ނަމަވެސް، އިދިކޮޅު އެމްޑީޕީން ދަނީ މި އަހަރުގެ ބަޖެޓު އެއްކޮށް ހުސްވެފައިވާ ކަމަށެވެ. 37 ބިލިއަން ހަރަދުވި ކަމަށް ފިނޭންސުން ބުނީ އިދިކޮޅުން ބަޖެޓު ހުސްވި ކަމަށް ބުނަމުންދަނިކޮށެވެ.