ލަންޑަން (އޮކްޓޫބަރު 27) - އިނގިރޭސި ޕްރިމިއާ ލީގުގައި މިރޭ ލިވަޕޫލާ ދެކޮޅަށް ކުޅޭ މެޗަށް ނުކުންނައިރު، އާސެނަލުން ގަބޫލުކުރާނީ އެ ޓީމަށް މި މެޗުން މޮޅުވެވޭނެ ކަމަށް ކަމުގައި އެ ޓީމުގެ ކޯޗު މިކޭލް އާޓެޓާ ބުނެފި އެވެ.

ލީގުގެ އެއް ވަނައިގައި ކުރިން އޮތް ލިވަޕޫލަށް ވުރެ އެއް މެޗު އިތުރަށް ކުޅެގެން ރޭ ސިޓީ އެއް ވަނަ އަށް އެރީ ދެ ޕޮއިންޓް އިތުރަށް ހޯދައިގެންނެވެ. އެ ގޮތުން، ސިޓީ އަށް ވަނީ ނުވަ މެޗުން 23 ޕޮއިންޓް ލިބިފަ އެވެ. ދެ ވަނައިގައި އޮތް ލިވަޕޫލަށް އަށް މެޗުން 21 ޕޮއިންޓް ލިބިފައިވާއިރު، މިރޭ އެ ޓީމުން ރަށުންބޭރުގައި ކުޅޭނީ ހަތަރު ވަަނައިގައި އޮތް އާސެނަލާ އެވެ.

އާސެނަލަށް ވަނީ އަށް މެޗުން 17 ޕޮއިންޓް ލިބިފަ އެވެ. އާސެނަލް ފަހަތަށް ޖައްސާލައި ތިން ވަނަ އަށް އެރީ މިރޭ ބޯންމައުތާ 1-1 އިން އެއްވަރުވި އެސްޓަން ވިލާ އެވެ. އެސްޓަން ވިލާ އަށް ވަނީ ނުވަ މެޗުން 18 ޕޮއިންޓް ލިބިފަ އެވެ.

ލީގު ތާވަލަށް ބަލާްއިރު، އަސެނަލާއި ލިވަޕޫލް މެޗުގެ މުހިންމުކަން ދެ ޓީމަށް ވެސް ބޮޑެވެ. މެޗުގެ ކުރިން، ނޫސްވެރިންގެ ގިނަ ސުވާލުތަކެއް އަމާޒިުވީ އާސެނަލުން އަމިއްލަ ދަނޑުގައި ކުޅޭ މި މެޗުން ބަލިވެއްޖެނަމަ ލީގުގެ ރޭހުގައި އެ ޓީމަށް ދިމާވާނީ ކިހިނެއްތޯ އެވެ.

އެ އަށް ދިން ޖަވާބުގައި، އާޓެޓާ ބުނީ، އޭނާ އެއްވެސް މެޗަކަށް ނުކުންނައިރު، ބަލިވެއްޖެނަމަ ވާނެގޮތަކާ މެދު ނުވިސްނާ ކަމަށެވެ.

"އަހަރެން އަބަދުވެސް ވިސްނަނީ ޕޮޒިޓިވްކޮށް، ބަލިވެއްޖެނަމަ ވާނެ ގޮތެއް ބަލައިފިއްޔާ. މޮޅަކަށް ފޯކަސް ކުރަން އުނދަގޫވާނެ. އަހަރެމެން އެސްޓަން ވިލާ މެޗަށް ނުކުތްއިރު ވެސް އެންމެން ދެއްކީ ބަލިވެއްޖިއްޔާ ވާނެ ކަންކަމުގެ ވާހަކަ. އެކަމަކު، އަހަރެން ހުރީ ޕޮޒިިޓިވްކޮށް. އެހެންވެ، މި ބުނަނީ ލިވަޕޫލާ ކުޅޭއިރު ވެސް ވިސްނުމަކީ އަދި ގަބޫލުކުރަނީ އާސެނަލްގެ މޮޅަކަށް،" އާޓެޓާ ބުންޏެވެ.

މިދިޔަ ސީޒަނުގައި އާސެނަލުން ލިވަޕޫލް ދަނޑުގައި އެއްވަރުކުރިއިރު، އަމިއްލަ ދަނޑުގައި ކުޅުނު މެޗުން މޮޅުވި އެވެ. އެހެންކަމުން، އާޓެޓާ ހުރީ އިތުބާރާ އެކު މި ފަހަރު ވެސް ކާމިޔާބު ހޯދަން މަސައްކަތް ފަށައިގެންނެެވެ.

މިރޭގެ މެޗަށް ނުކުންނައިރު އާސެނަލްގެ ވިލިއަމް ސަލީބާ ހުރީ ސަސްޕެންޝަނުގަ އެވެ. އަނިޔާގެ ސަބަބުން ރިކާޑޯ ކަލަފިއޯރީ އަށް މި މެޗު ގެއްލިދާނެ ކަމަށް ބެލެވޭއިރު، ޔަގީނުންވެސް އަނިޔާއާ ހެދި ޔޫރިއަން ޓިމްބާ، ޓަކެހީރޯ ޓޮމިޔާސޫ އަދި ކިއެރަން ޓިއެރަނީ އަށް މި މެޗުގައި ނުކުޅެވޭނެ އެވެ.

އާސެނަލާއި ލިވަޕޫލް ކުޅޭ މެޗު ފަށާނީ މިރޭ 21:30 ގަ އެވެ.