ރިޔާދު، ސައުދީ އަރަބިއްޔާ (އޮކްޓޫބަރު 24) - ސައުދީ އަރަބިއްޔާ ގައުމީ ފުޓްބޯޅަ ޓީމުގެ ކޯޗުކަން އިޓަލީގެ ރޮބާޓޯ މަންޗިނީ ވަނީ ދޫކޮށްލައިފަ އެވެ.

އިޓަލީގެ ކުރީގެ ކުޅުންތެރިޔާ، މަންޗިނީ މި ގޮތަށް ނިންމައިފައިވަނީ، ސައުދީ ފުޓްބޯޅަ ފެޑެރޭޝަނާ މަޝްވަރާކުރުމަށް ފަހު އެވެ.

އިޓަލީ ގައުމީ ޓީމުގެ ކޯޗުކަން ދޫކޮށްލިތާ ދެ ހަފްތާ ފަހުން، މަންޗިނީ، މިދިޔަ އަހަރުގެ އޮގަސްޓް މަހު ސައުދީގެ ކޯޗަކަށް ސޮއިކުރީ ހަތަރު އަހަރުގެ ކޮންޓްރެކްޓެއްގަ އެވެ. އެކަމަކު، އެ މަގާމުގައި އެއް އަހަރުވިތަނާ މަންޗިނީ މި ވަނީ ސައުދީ ފެޑެރޭޝަނާ އެކު، މަޝްވަރާކޮށް އެއްބަސްވުން ނިމުމަކަށް ގެނެސްފަ އެވެ.

މަންޗިނީ، ސައުދީއާ އެކު ހެދި ކޮންޓްރެކްޓްގައިވާ ގޮތުން އޭނާ އަށް އަހަރެއްގެ މައްޗަށް 28 މިލިއަން ޑޮލަރު ލިބެ އެވެ. މިއީ ގައުމީ ޓީމްތަކަށް ކޯޗުކަންކޮށްދޭ ކޯޗުންނާ ބަލާއިރު ރެކޯޑު އަދަދެކެވެ. ވޯލްޑް ކަޕްތަކުގައި ވާދަކުރާ ދުނިޔޭގެ ބޮޑެތި ގައުމުތަކުގެ ކޯޗުންނަށް އަހަރެއްގެ މައްޗަށް އެވަރެޖްކޮށް ލިބޭނީ 8-10 މިލިއަން ޑޮލަރެވެ.

ސައުދީގެ ފުޓްބޯޅަ ފެޑެރޭޝަނުން މަންޗިނީއާ ހަވާލުކުރި މައިގަނޑު ދެ ޓާގެޓަކީ އަންނަ އަހަރުގެ އޭއެފްސީ އޭޝިއަން ކަޕް ކާމިޔާބުކުރުމާއި 2026ގެ ވޯލްޑް ކަޕަށް އެޓީމް ކޮލިފައިކޮށްދިނުމެވެ. އެކަމަކު، މި އަހަރުގެ އޭޝިއަން ކަޕްގެ ގަދަ 16 އިން ސައުދީ ވަނީ ކަޓައިފަ އެވެ. އެ ގޮތުން،، ދެކުނު ކޮރެއާ އަތުން ޕެނަލްޓީ ޖަހައިގެން ގަދަ 16 ބުރުގައި ސައުދީ ކެޓި މެޗުގައި ހިނގާދިޔަ ކަމަކުން ވެސް މަންޗިނީއާ މެދު ނުރުހުން އަމާޒުވި އެވެ.

ސައުދީން އެއް ގޯލުގެ ލީޑެއްގައި އޮއްވައި، ދެކުނު ކޮރެއާ އިން އެއްވަރުުކުރީ އިތުރު ވަގުތުގެ ނުވަ ވަނަ މިނިޓްގައި ގޯލު ޖަހައިގެންނެވެ. ނަތީޖާ ނެރެން އިތުރު ވަގުތުގެ ދެ ހާފް ކުޅުމަށް ފަހު ވަނީ ޕެނަލްޓީ ޖަހައިފަ އެވެ. ޕެނަލްޓީގައި ކޮރެއާ މޮޅުކޮށްދިން ޕެނަލްޓީ އެ ޓީމުގެ ހްވާން ހީ ޗާން ފޮނުވާލުމުގެ ކުރިން، މަންޗިނީ ވަނީ ޓަނަލް ތެރެއިން ޗޭންޖިން ރޫމަށް ގޮސްފަ އެވެ.

އެކަމާ ބެހޭގޮތުން މެޗަށް ފަހު ނޫސްވެރިން ސުވާލުކުރުމުން، މަންޗިނީ ބުނީ، ޗޭންޖިން ރޫމަށް ދިޔައީ މެޗު ނިމުނުކަމަށް ހީކޮށް ކަމަށާއި އެކަމާ މާފަށް އެދޭ ކަމަށެވެ. ސައުދީގެ ޓީވީއެއް ކަމަށްވާ އެސްއެސްސީ އަށް ދިން އިންޓަވިއުއެއްގައި، ސައުދީ ފުޓްބޯޅަ ފެޑެރޭޝަންގެ ރައީސް ޔާސިރު ވިދާޅުވީ، މަންޗިނީގެ ފަރާތުން ފެނުނު އެ ކަންތައްތަކަކީ ބަލައިގަންނަން އުނދަގޫ ކަމެއް ކަމަށެވެ.

މަންޗިނީ، ސައުދީ ކޯޗުކަން ދޫކޮށްލާފައި މި ވަނީ ފެޑެރޭޝަނާ އެކު ގިނަ ދުވަސްތަކެއް ވަންދެން ހިތްހަމަނުޖެހުންތަކެއްގައި އުޅުމަށް ފަހު އެވެ.