އަވަށްޓެރި ސްރީލަންކާގެ މަޝްހޫރު ފަތުރުވެރިކަމުގެ މަންޒިލެއް ކަމަށްވާ އަރުގަމް ބޭ ސަރަހައްދަށް ހަމަލާއެއް ދީފާނެ ކަމުގެ ތުހުމަތުގައި ދެ މީހަކު ހައްޔަރު ކޮށްފި އެވެ.

ލަންކާގެ ޓެރެރިޒަމް އިންވެސްޓިގޭޝަން ޑިވިޝަން (ޓީއައިޑީ) ގެ އޮފިޝަލުންނާ ހަވާލާދީ ލަންކާގެ ނޫސްތަކުން ބުނީ ހައްޔަރުކުރީ އިޒްރޭލުގެ ފަތުރުވެރިންނަށް އަމާޒުކޮށް ހަމަލާއެއް ދީފާނެ ކަމުގެ ތުހުމުތު ކުރެވޭ ދެ މީހުން ކަމަށެވެ.

އަރުގަމް ބޭއަށް ޓެރަރިސްޓް ހަމަލާއެއް ދީފާނެ ކަމަށް ބުނެ އެތަނަށް ދަތުރު ނުކުރުމަށް އެދި އެ ގައުމުގައި ހުންނަ އެމެރިކާގެ އެމްބަސީން އިއްޔެ ވަނީ އެލާޓެއް ނެރެފަ އެވެ.

އެމެރިކާގެ އެލާޓާ ގުޅިގެން އިނގިރޭސިވިލާތް، ނިއުޒިލޭންޑް، އޮސްޓްރޭލިއާ އަދި ރަޝިއާއިން ވެސް ވަނީ ލަންކާއަށް ޓްރެވެލް އެޑްވައިޒަރީއެއް ނެރެފަ އެވެ.

އޭގެއިތުރުން އިޒްރޭލުގެ ނެޝަނަލް ސެކިއުރިޓީ ކައުންސިލުން ވަނީ އަރުގަމް ބޭގެ އިތުރުން ބީޗު ސަރަހައްދުތަކުގައި އުޅެމުންދާ އެ ގައުމުގެ ރައްޔިތުން ދިޔުމަށް އަންގާފަ އެވެ.