ޑްރަގް ކޯޓަށް ގެންދަންވެގެން ފުލުހުން ބަލާ ދިޔުމުން ފިލަން އުޅުމުގެ ތެރޭގައި އިމާރާތެއްގެ މަތިން ވެއްޓި މައިބަދަ ބިނދި، ސިކުނޑިއަށް ލޭ އެޅުމުން ވެސް ނަގައި ވެހިކަލަށް އަރުވައިގެން ކަސްޓޯޑިއަލް ޖަލަށް މީހަކު ގެންދިޔަ މައްސަލައިގައި ފުލުހުންނަށް ދައުވާ ކުރެވޭނެތޯ ބަލަން ފަށައިފި އެވެ.

އެ މައްސަލައިގައި އަނިޔާވީ އަޒްމީލް ޖަލީލް، 38، އަށެވެ. އެކަންތައް ހިއުމަން ރައިޓްސް ކޮމިޝަނުން ބެލުމަށްފަހު އެ މައްސަލައިގައި ހިމެނޭ ފުލުހުންގެ މައްސަލަ ޕްރޮސެކިއުޓާ ޖެނެރަލްގެ އޮފީހަށް ފޮނުވި އެވެ. ނަމަވެސް ބައެއް ކަންކަން ފުރިހަމަ ކުރަން ޕީޖީި އޮފީހުން ވަނީ އެ މައްސަލަ އަނބުރާ އެޗްއާރްސީއެމްއަށް ފޮނުވައިފަ އެވެ.

އަޒްމީލަށް އަނިޔާވީ ޖުލައި 15، ގެ މެންދުރު 2:15 ހާއިރު ޑްރަގް ކޯޓުގެ އަމުރެއް ތަންފީޒު ކުރަން މާފަންނު ގެއަކަށް ގޮސް ހަރަކާތްތެރިވަނިކޮށް، ފިލަން އުޅުމުގެ ތެރޭގައި ގޭގެ ފުރަތަމަ ފަންގި ފިލާއިން ވެއްޓިގެން ކަމަށް ފުލުހުން ބުނެ އެވެ.

މަތިން ވެއްޓުމުން ވެސް ފަރުވާ ދިނުމުގެ ބަދަލުގައި ނުވަތަ ހޮސްޕިޓަލަށް ގެންދިޔުމުގެ ބަދަލުގައި ފުލުހުން އަޒްމީލް ގެންދިޔައީ ކަސްޓޯޑިއަލް ޖަލަށެވެ. ހޮސްޕިޓަލަށް ގެންދިޔައީ އޭގެ ދެ ގަޑިއިރު ފަހުން ހަވީރު 4:20 ހާއިރެވެ.

ޕީޖީ އޮފީހުގެ ތަރުޖަމާނު އަހުމަދު ޝަފީއު "އަދަދު" އާ ވާހަކަ ދައްކަވަމުން ވިދާޅުވީ އަޒްމީލުގެ މައްސަލަ އެ އޮފީހުގެ މަޝްވަރާއަށް ގެނައުމުން އިތުރު ކަންކަން ސާފު ކުރުމަށް އަލުން މައްސަލަ އެޗްއާރްސީއެމްއަށް ފޮނުވާފައިވާނެ ކަމަށެވެ. އަދި ވިދާޅުވީ އެ މައްސަލައިގައި ބަލަމުންދަނީ އިހުމާލުވުމުގެ ކުށުގެ ދައުވާ ކުރެވޭތޯ ކަމަށެވެ.

"އެ މައްސަލަ ޕީޖީ އޮފީހުގެ މަޝްވަރާއަށް ގެނައި. ތަހުގީގާ ގުޅިގެން އިތުރު ކަންކަން ސާފު ކުރަން ބުނެފައި ވާނީ. ދައުވާ ކުރެވިދާނެތޯ ބަލަމުން ދަނީ ފުލުހުން އިހުމާލުވުމަށް،" ޝަފީއު ވިދާޅުވި އެވެ.

އެ މައްސަލައިގައި އެޗްއާރްސީއެމްއިން ބުނީ އެ މައްސަލައާ މެދު ގޮތެއް ނިންމުމުގެ ކުރިން ޕީޖީން ބޭނުންވާ އިތުރު މައުލޫމާތު ފުރިހަމަ ކުރުމަށް އަންގާފައިވާތީ އެ މަސައްކަތް ކުރަމުންދާ ކަމަށެވެ.

އެޗްއާރްސީއެމްއިން އަޒްމީލުގެ މައްސަލަ ބަލަމުންދަނީ އެންޓި ޓޯޗާ ގާނޫނުގެ ދަށުންނެވެ. އެ މައްސަލައިގައި ފުލުހުން އަޒްމީލް ހޮސްޕިޓަލަށް ނުގެން ގޮސް ގިނަ ވަގުތުތަކެއް ފަރުވާ ލިބުން ލަސްވުމުން ކަންބޮޑުވާ ކަމަށް ކުރިން އެ ކޮމިޝަނުން ބުނެފައިވެ އެވެ.

އެޗްއާރްސީއެމްއިން ބުނީ މީހަކު ހައްޔަރު ކުރުމުގެ ތެރޭގައި އެއްވެސް މީހަކަށް އަނިޔާއެއް ލިބި ސިއްހީ ފަރުވާ ބޭނުންވާ ހާލަތުގައި، އެ މީހަކު ސްޓޭޝަނަށް ގެންދިއުމުގެ ބަދަލުގައި ސިއްހީ ހިދުމަތްދޭ ތަނަކަށް ގެންދަން މީގެ ކުރިން ވެސް ކޮމިޝަނުން ފުލުހުންނަށް ލަފާދީފައިވާނެ ކަމަށެވެ.

އަޒްމީލް ހައްޔަރުކުރިއިރު ފުލުހުން ބޮޑީކެމް ބޭނުން ކޮށްފައެއް ނުވެ އެވެ. އެ ހާދިސާއަށް ފަހު ބަންދު އަމުރު ތަންފީޒު ކުރަންދާ ފުލުހުން ބޮޑީ ކެމް ބޭނުން ކުރަން ވަނީ ނިންމައިފަ އެވެ.

އަޒްމީލަށް ލިބުނު ޒަހަމްތަކަށް އެ ދުވަހުން ފެށިގެން ދަރުމަވަންތަ ހޮސްޕިޓަލުގެ އައިސީޔޫގައި ފަރުވާ ދެމުން ދިޔަ އެވެ. ނަމަވެސް މަޑުމަޑުން އޭނާގެ ހާލު ރަނގަޅުވެ، މިދިޔަ ސެޕްޓެމްބަރު މަހުގެ ކުރީކޮޅު ވަނީ ގެއަށް ބަދަލުކޮށްފަ އެވެ.

އަޒްމީލުގެ އާއިލާއިން ބުނީ މިހާރު އޭނާ އަންނަނީ ފިޒިއޯތެރަޕީ އަދި ސްޕީޗް ތެރަޕީ ނަގަމުން ކަމަށާއި ހާލު ކުރިއަށްވުރެ ރަނގަޅުވެފައިވާ ކަމަށެވެ.