ޕެރިސް (އޮކްޓޫބަރު 21) - ފްރެންޗް ލީގުގައި ރޭ ސްޓްރާސްބޯ އަތުން 4-2 އިން ޕީއެސްޖީ މޮޅުވި މެޗުގަައި އެ ޓީމުގެ ސަޕޯޓަރުން ނަސްލީ ގޮތުން ދިމާކުރުމަށް އަޑުގަދަކޮށްފައިވާ މައްސަލައެއްގެ ތަހުގީގު ފަށައިފި އެވެ.

ދާދި ފަހުން، މާސޭއާ ގުޅުނު ޕީއެސްޖީ އަށް ކުރިން ކުޅުނު ފްރާންސްގެ މިޑްފީލްޑަރު، އޭޑްރިއަން ރަބިއޯ އަށް އަމާޒުކޮށް، ޕީއެސްޖީ ސަޕޯޓަރުން އަންނަނީ މިދިޔަ މެޗުތަކުގައި އަޑުގަދަކުރަމުންނެވެ. މާސޭ އަކީ ފްރާންސްގައި ޕީއެސްޖީގެ އެންމެ ބޮޑު ވާދަވެރިންނެވެ.

އެ ގޮތުން، ރޭ ސްޓްރާސްބޯއާ ދެކޮޅަށް ޕީއެސްޖީ ކުޅުނު މެޗުގައި އެ ޓީމުގެ ސަޕޯޓަރުންގެ އެ އަޑުތައް ގަދަވެ، ސްޓޭޑިއަމްގެ އެނައުންސަރު ވެސް ވަނީ އެކަން ހުއްޓާލަން އަންގައިފަ އެވެ.

ފްރެންޗް ލީގުގެ ޑިސިޕްލިނަރީ ކޮމިޓީން މި މައްސަލަ ބަލަން ފެށުމާ އެކު، ޕީއެސްޖީން ވަނީ ސަޕޯޓަރުންގެ ފަރާތުން އެ ފެނުނު ކަންކަން ކުށްވެރިކޮށް ބަޔާނެއް ނެރެފަ އެވެ.

"ޕީއެސްޖީ ދަނޑަކީ ފުޓްބޯޅައިގެ ރޫހުގައި ކަންކަން ހިނގާ ތަނަކަށް ހެދުމަށް ކުރަން ޖެހުނު ކޮންމެ ކަމެއް، މި ކްލަބުން ކުރާނެ،" ޕީއެސްޖީގެ ބަޔާނުގައިވެ އެވެ.

ރޭ ޕީއެސްޖީ މޮޅުވިއިރު، ލަނޑުތައް ޖެހީ، ސެނީ މަޔޫލޫ، ބްރެޑްލީ ބަކޯލާ، މާކޯ އަސެންސިއޯ އަދި ލީ ކަންގް އިން އެވެ. ސްޓްރާސްބޯގެ ލަނޑުތައް ޖެހީ، ސޭކޫ މާރާ އާއި ޕާޕޭ ޑިއޯން އެވެ.

ފްރެންޗް ލީގުގެ އެއް ވަނައިގައި އޮތް ޕީއެސްޖީ އާއި ދެ ވަނައިގައި އޮތް މޮނާކޯ އަށް ވަނީ އަށް މެޗުން 20 ޕޮއިންޓް ލިބިފަ އެވެ.