އަންނަ މަހުގެ ފީފާ ބްރޭކްގައި ބަންގްލަދޭޝް އާއި ރާއްޖޭގެ ދެމެދުގައި އެކުވެރިކަމުގެ ދެ މެޗު ކުޅޭ ގޮތަށް ނިންމައިފި އެވެ.

ބަންގްލަދޭޝްގެ ފުޓްބޯޅަ ފެޑެރޭޝަނުން މިއަދު އިއުލާނުކުރި ގޮތުގައި ދެ މެޗު ކުޅޭނީ އަންނަ މަހުގެ 13 އާއި 16 ވަނަ ދުވަހު ބަންގްލަދޭޝްގަ އެވެ.

މިއީ، އަހަރަކަށް ވުރެ ގިނަ ދުވަސް ފަހުން ގައުމީ ޓީމުން ކުޅޭނެ ފުރަތަމަ މެޗުތަކެވެ. އެންމެ ފަހުން ގައުމީ ޓީމުން މެޗެއް ކުޅެފައިވަނީ މިދިޔަ އަހަރުގެ އޮކްޓޫބަރު މަހުގެ 17 ވަނަ ދުވަހު، ވޯލްޑް ކަޕް ކޮލިފައިންގައި ބަންގްލަދޭޝާ ދެކޮޅަށެވެ.

އެ ގޮތުން، އެ ފަހަރުގެ ވޯލްޑް ކަޕް ކޮލިފައިންގައި މާލޭގައި ކުޅުނު މެޗު 1-1 އިން އެއްވަރުވިއިރު، ބަންގްލަދޭޝް އިން ވަނީ އެ ގައުމުގައި ކުޅުނު މެޗުން 2-1 އިން މޮޅުވެފަ އެވެ.

އެންމެ ފަހުން ބަންގްލަދޭޝްއާ ދެކޮޅަށް ރާއްޖޭން ކުޅުނު ފަސް މެޗަށް ބަލާއިރު ތިން މެޗުން ބަންގްލަދޭޝް މޮޅުވިއިރު، ރާއްޖެ މޮޅުވީ އެއް މެޗުންނެވެ. އަނެއް މެޗު ވަނީ އެއްވަރުވެފަ އެވެ. އެ ގޮތުން، ރާއްޖެ އަތުން ބަންގްލަދޭޝް މޮޅުވީ، 2021 ވަނަ އަހަރު ލަންކާގައި ބޭއްވި ފޯ ނޭޝަންސް ކަޕާއި މިދިޔަ އަހަރުގެ ސާފް ޗެމްޕިއަންޝިޕާއި ވޯލްޑް ކަޕް ކޮލިފައިންގަ އެވެ. ރާއްޖެ މޮޅުވީ، 2022 ވަނަ އަހަރު މާލޭގައި ކުޅުނު އެކުވެރިކަމުގެ މެޗެއްގަ އެވެ. އެއްވަރުވީ، މިދިޔަ އަހަރު މާލޭގައި ކުޅުނު ވޯލްޑް ކަޕް ކޮލިފައިން ފުރަތަމަ ލެގުގަ އެވެ.

ނޮވެމްބަރު މަހު، ނޭޕާލުން ތިން ގައުމެއްގެ މެދުގައި ކުޅޭ، އިންވިޓޭޝަނަލް މުބާރާތެއް ބާއްވަން މަސައްކަތް ފަށައި، ގައުމުތަކަށް ދައުވަތު ފޮނުވިއިރު، އޭގެ ތެރޭގައި ރާއްޖެ ވެސް ހިމެނެ އެވެ. ރާއްޖޭން ނޭޕާލް ފުޓްބޯޅަ ފެޑެރޭޝަނުގެ އެ ދައުވަތު ގަބޫލުކޮށް، އެ މުބާރާތުގައި ކުޅެން ނިންމި ނަމަވެސް އެ މުބާރާތް ފަހުން މި ވަނީ ކެންސަލްކޮށްފަ އެވެ.

ނޮވެމްބަރު މަހު، ގައުމީ ޓީމުން ކުޅޭ މެޗުތަކުގައި ވެސް ޓީމަށް އިރުޝާދުދޭނީ ކޯޗު އަލީ ސުޒޭން އެވެ.

ރާއްޖޭގެ ފުޓްބޯޅަ ސީޒަން ފެށޭނެ ސީދާ ތާރީހެއް ނޭނގެއިރު، ގައުމީ ޓީމުގެ މެޖޯރިޓީ ކުޅުންތެރިން ހިމެނޭ، މާޒިޔާ ސްޕޯޓްސް އެންޑް ރެކްރިއޭޝަނުން އަންނަނީ މި މަހު ފަހުކޮޅުގައި، ފަށާ އޭއެފްސީ ޗެލެންްޖް ލީގަށް ފަރިތަކުރަމުންނެވެ.