އދ. ގެ 79 ވަނަ އަހަރީ އާންމު ޖަލްސާގައި ބައިވެރިވެވަޑައިގަތުމަށް އެމެރިކާގެ ނިއުޔޯކަށް ރައީސް ޑރ. މުހައްމަދު މުއިއްޒު ކުރެއްވި ދަތުރަށް 2.4 މިލިއަން ރުފިޔާ ހަރަދުކުރި ކަމަށް އެ އޮފީހުން ހާމަކޮށްފި އެވެ.

މި ދަތުރު ރައީސް ކުރެއްވީ ސެޕްޓެމްބަރު 20 އިން 29 އަށެވެ. އެމަނިކުފާނާ އެކު ބޮޑު ވަފުދެއް ވެސް މި ދަތުރުގައި ބައިވެރިވެވަޑައިގަތެވެ. އެ މަޖިލީހުގައި ރައީސް ތަގުރީރު ކުރެއްވި އެވެ.

މިއަދު ރައީސް އޮފީހުން ހިއްސާކުރި މައުލޫމާތު ކަރުދާހުގައިވާ ގޮތުން ނުވަ ދުވަހުގެ އެ ދަތުރަށް 2,455,583.01ރ. ހަރަދުކުރި އެވެ. އެ ފައިސާ ހަރަދުކުރި ދާއިރާތަކުގެ އެއްވެސް ތަފްސީލެއް ހާމަނުކުރެ އެވެ.

ރައީސް އާއެކު އދ. ގެ މަޖިލީހަށް ދިޔަ ދިވެހި ވަފުދުގައި އޭރު ފޮރިން މިނިސްޓަރަކަށް ހުންނެވި މޫސާ ޒަމީރު އާއި އެންވަޔަރަމަންޓު މިނިސްޓަރު ތޯރިގު އިބްރާހިމް އަދި އެ ދެ މިނިސްޓްރީގެ އިސްވެރިން ހިމެނެ އެވެ. ވަފުދުގައި ބައިވެރިވި އޮފިޝަލުން ޖުމްލަ އަދަދެއް ސާފެއް ނޫނެވެ.

އަހަރީ އާންމު ޖަލްސާގެ ހަވާސާގައި ގިނަ އަދަދެއްގެ ބަޔަކާ ރައީސް ބައްދަލުކުރެއްވި އެވެ. އެ ބައްދަލުވުންތަކުން ރާއްޖެއަށް ގިނަ ކަންކަން ފަހިވި ކަމަށް ރައީސް އޮފީހުން ބުނި ނަމަވެސް އަދި މިހާތަނަށް އެކަމުގެ ތަފްސީލުތަކެއް ހާމަކޮށްފައި ނުވެ އެވެ.