14 އޮކްޓޯބަރު 2024 - 09:23 0
މުހައްމަދު ޝަހްޒާން
ވަޒީރުންގެ މަޖިލީހަށް ގެނައި ބަދަލުތަކުގެ ތެރެއިން އަލަށް އައްޔަނުކުރެއްވި މިނިސްޓަރުން -- ފޮޓޯ: ރައީސް އޮފީސް
14 އޮކްޓޯބަރު 2024 - 09:23 0
މިދިޔަ ސެޕްޓެމްބަރު 30، ގައި ވަޒީރުންގެ މަޖިލީހަށް ބަދަލު ގެނެސް، ފޮރިން، ފިނޭންސް އަދި ހެލްތު މިނިސްޓަރުންނަށް އަލަށް އައްޔަނު ކުރެއްވި ބޭފުޅުންނަށް ރުހުން ދިނުމުގެ މައްސަލަ ސަރުކާރުގެ މަސްއޫލިއްޔަތު ބަލާ ކޮމެޓީއަށް މިއަދު ފޮނުވައިފި އެވެ.
އެ ބޭފުޅުންނަށް ރުހުން ހޯދުމަށް އެދި ރައީސް ޑރ. މުހައްމަދު މުއިއްޒު މަޖިލީހަށް ފޮނުވާފައި ވަނީ ބަދަލުތައް ގެނައި ދުވަހެވެ. ނަމަވެސް އެ މައްސަލަ ތާވަލު ނުކުރެވި އޮތީ މަޖިލިސް ޗުއްޓީގައި އޮތުމުންނެވެ.
މިނިސްޓަރުންގެ މަގާމުތަކަށް ބަދަލުތަކެއް ރައީސް ގެންނެވީ، ފިނޭންސް މިނިސްޓަރަކަށް ހުންނެވި ޑރ. މުހައްމަދު ޝަފީގު އެ މަގާމުން އިސްތިއުފާ ދެއްވުމުންނެވެ. ނަމަވެސް އޭނާ އިސްތިއުފާ ދެއްވި ސަބަބެއް މިހާތަނަށް ސަރުކާރުން ވެސް އަދި އޭނާ ވެސް ހާމައެއް ނުކުރައްވަ އެވެ.
ޝަފީގު އިސްތިއުފާ ދެއްވުމާ ގުޅިގެން އޭނާގެ މަގާމަށް އައްޔަނުކުރެއްވީ ފޮރިން މިނިސްޓަރަކަށް ހުންނެވި މޫސާ ޒަމީރު އެވެ. ފޮރިން މިނިސްޓަރަކަށް އައްޔަނުކުރެއްވީ ހެލްތު މިނިސްޓަރަކަށް ހުންނެވި އަބްދުﷲ ހަލީލު އެވެ. ހެލްތު މިނިސްޓަރަކަށް އައްޔަނު ކުރެއްވީ ރައީސް އޮފީހުގެ ޕަބްލިކް ޕޮލިސީ ސެކްރެޓަރީގެ މަގާމުގައި ހުންނެވި އަބްދުﷲ ނާޒިމް އެވެ.
ސަރުކާރުގެ މިނިސްޓަރީތަކަށް ބަދަލުތަކެއް ރައީސް މުއިއްޒު ގެންނަވާފައި ވަނީ ދައުލަތުގެ މާލީ ހާލަތު އިންތިހާއަށް ގޯސްވެފައިވާ ދަނޑިވަޅެއްގަ އެވެ. ނަމަވެސް އެ ބަދަލުތަކާއި މާލީ ހަލަތާ އެއްވެސް ގުޅުމެއް އޮތް ކަމެއް ނޭނގެ އެވެ.
މި ލިޔުމާ ގުޅޭ ލިޔުންތައް
Comment