މޯލްޑިވްސް ނޭޝަނަލް ޑިފެންސް ފޯސް (އެމްއެންޑީއެފް) ގެ ޒިންމާތައް އެއްވެސް ހާލެއްގައި އެހެން ގައުމަކާ ހަވާލުކުރާ ފަދަ ވާހަކައެއް އިންޑިއާގެ ދަތުރުގައި ދައްކާފައި ނުވާނެ ކަމަށް ޑިފެންސް މިނިސްޓަރު ގައްސާން މައުމޫން ވިދާޅުވެއްޖެ އެވެ.

ގައްސާން ވިދާޅުވީ ރައީސް ޑރ. މުހައްމަދު މުއިއްޒު އިންޑިއާއަށް މިހާރު ކުރައްވަމުން ގެންދަވާ ދަތުރުގަ އާއި އަދި އެހެން ދަތުރުތަކުގައި ވެސް ރާއްޖޭގެ މިނިވަންކަމަށް ބުރޫއަރާ ފަދަ އެއްވެސް ކަމެއް ނުކުރައްވާނެ ކަމަށެެވެ.

"ދިވެހިރާއްޖޭގެ މިނިވަންކަމާއި ސިޔާދަތާއި އިސްތިގުލާލަށް ޒައްރެއްގެ މިންވަރަށް ވެސް ބުރޫއަރާ ފަދަ ކަމެއް މި ދަތުރުފުޅުގައި ވެސް އެހެން ދަތުރުފުޅެއްގައި ވެސް ރައީސް ޑރ މުހައްމަދު މުއިއްޒު ކުރައްވާފައެއް ނެތް," ގައްސާން ވިދާޅުވި އެވެ.

އެއްވެސް އެއްބަސްވުމެއްގެ ދަށުން ދިވެހީންގެ ފުރިހަމަ ސިޔާދަތީ ބާރު ގެއްލޭފަދަ ނޫނީ ނުރައްކާވާ ފަދަ ކަމެއް ރައީސް މުއިއްޒުގެ ސަަރުކާރުން ކުރައްވާފައެއް ނެތް ކަމަށާ އަދި ނިންމާފައިވަނީ ދިވެހި ރައްޔިތުންނަށް ފައިދާކުރަނިވި ގިނަ މަސައްކަތްތަކެއްކަން ވެސް ގައްސާންގެ ވާހަކައިގައި ފާހަގަކުރި އެވެ.

އިންޑިއާއަށް ރައީސް މުއިއްޒު މިހާރު ކުރައްވަމުން ގެންދަވާ ދަތުރުގައި ނިންމެވި ކަންތައްތަކާއި ވީ އެއްބަސްވުންތަކުގައި އޮތީ ރާއްޖެއިން އެދޭ ހާލަތްތަކުގައި އެދޭ ގޮތަކަށް ދިވެހި އަސްކަރިއްޔާގެ ގާބިލިއްޔަތުކަން އިތުރުކުރުމުގެ މަސައްކަތް ކުރިއަށް ގެންދިއުމަށެވެ.

އެމްއެންޑީއެފް އިން ރާއްޖޭގެ މިނިވަންކަމާއި ސިޔާދަތާއި އިސްތިގުލާލު ދިވެހިން ބޭނުންވާ ގޮތަށް ހިމާޔާތް ކުރައްވާނެ ކަމަށްވެސް ގައްސާން ވިދާޅުވި އެވެ.

އިންޑިއާ ރައީސް މުއިއްޒު ކުރައްވަމުން ގެންދަވާ ރަސްމީ ދަތުރު ނިންމާލުމަށްފަހު މިއަދު މާލެ އައުމަށް ވަނީ ހަމަޖެހިފަ އެވެ. އަދި މި ދަތުރުގައި ގިނަ އެއްބަސްވުންތަކުގައި ވަނީ ސޮއިކޮށް އެއްބަސްވެފަ އެވެ. އަދި ސަރުކާރުގެ ވެރިން މި ދަތުރު ސިފަކުރައްވަނީ ކާމިޔާބު ދަތުރެއްގެ ގޮތުގަ އެވެ.