އިންޑިއާ އާއި ރާއްޖެ އާ ދެމެދު އިއްޔެ ސޮއި ކުރި ކަރަންސީ ސްވޮޕް އެގްރީމެންޓަކީ މި ވަގުތު ރާއްޖޭގެ އިގުތިސާދަށް ލިބިގެންދިޔަ ވަރަށް ބޮޑު ލުޔެއް ކަމަށް ފޮރިން މިނިސްޓަރު، އަބްދުﷲ ހަލީލް ވިދާޅުވެއްޖެ އެވެ.

އިންޑިއާގެ ނިއު ދިއްލީގައި ހުންނަވައި މީޑިއާތަކަށް ދެއްވި އިންޓަވިއުއެއްގައި ހަލީލް ވިދާޅުވީ ކަރަންސީ ސްވޮޕް އެއްބަސްވުމުގެ ސަބަބުން އިންޑިއާ އާއި ރާއްޖޭގެ ވިޔަފާރިވެރިންނަށް ވެސް ފުރުސަތުތަކެއް ފަހިވެގެންދާނެ ކަމަށެވެ.

"ރާއްޖެ އިގުތިސާދީ ގޮތުން މި އައި ކަންތައްތަކަށް ބަލާއިރުގައި މި ހުތޫރަތްތެރި ވަގުތުގައި ހަގީގަތުގައި އިންޑިއާގެ މި އެހީތެރިކަން ވެގެންދާނެ ރާއްޖޭގެ ރައްޔިތުންނަށް ރާއްޖޭގެ އިގުތިސާދަށް ލިބިގެން ދާނެ ވަރަށް ބޮޑު ލުޔަކަށް، ވިޔަފާރިވެރިންނަށް ދެ ގައުމުގެ ދޭތެރޭގައި ވިޔަފާރި ކުރަން ލިބޭ، ފަސޭހަވުމަށް ލިބޭ ވަރަށް ބޮޑު ފުރުސަތަކަށް ވެގެންދާނެ،" ހަލީލް ވިދާޅުވި އެވެ.

އިންޑިއާ އާ އެކު ސޮއި ކުރެވުނު ކަރަންސީ ސްވޮޕް އެގްރީމެންޓުގެ ސަބަބުން ޑޮލަރަށް ބަރޯސާވުން ވެސް ވަރަށް ބޮޑަށް ކުޑަވެ، ރާއްޖެއަށް ކުރިމަތިވެފައިވާ މާލީ ދަތިކަމުން އަރައިގަންނަން އެހީއަކަށް ވެގެންދާނެ ކަމަށް ހަލީލު ވިދާޅުވި އެވެ.

ރާއްޖެ އާއި އިންޑިއާ އާ ދެމެދު އިއްޔެ ސޮއި ކުރި ކަރަންސީ ސްވޮޕް އެއްބަސްވުމުގެ ދަށުން ރާއްޖެއަށް 400 މިލިއަން ޑޮލަރު ނުވަތަ ޔޫރޯގެ އިތުރުން 30 ބިލިއަން އިންޑިއަން ރުޕީސް ލިބޭނެ އެވެ. އެ އެއްބަސްވުމުގެ ދަށުން ދެ ކަރަންސީ ވިންޑޯއަކުން އެމްއެމްއޭއަށް ސްވޮޕް ނެގުމަށް މަގުފަހިވާނެ ކަމަށް އެ ބޭންކުން އިއްޔެ ބުންޏެވެ.

ހަލީލު ވިދާޅުވީ ރައީސް މުއިއްޒު އިއްޔެ އިންޑިއާގެ ވެރިންނާ ކުރެއްވި މަޝްވަރާތަކުގައި ރާއްޖެ އާއި އިންޑިއާ އާ ދެމެދު މިނިވަން ވިޔަފާރީގެ އެއްބަސްވުމެއް އެކުލަވައިލުމުގެ ވާހަކަތައް ވެސް ދެއްކެވި ކަމަށެވެ.

އިއްޔެ އެއްބަސްވި ރާއްޖެ އާއި އިންޑިއާގެ ގުޅުން ކުރިއަށް އޮތް ތަނުގައި ބައްޓަން ކުރާނެ ގޮތުގެ އެއްބަސްވުމުގެ ސަބަބުން ވެސް ދިވެހި ރައްޔިތުންނަށް އިޖުތިމާއީ ގޮތުންނާއި އިގުތިސާދީ ގޮތުން ވެސް ފައިދާތަކެއް ވާނެ ކަމަށް ހަލީލު ވިދާޅުވި އެވެ.

"ވަރަށް ކާމިޔާބު ދަތުރެއްގެ ގޮތުގައި އަޅުގަނޑުމެންނަށް ފާހަގަކުރެވޭ ދަތުރުފުޅަކަށް އިރާދަކުރެއްވިއްޔާ މި ދަތުރު ވެގެންދާނެ،" ހަލީލް ވިދާޅުވި އެވެ.