about 7 hours 2
މުހައްމަދު ޝަހްޒާން
ޕީއެންސީގެ ޕީޖީ ގުރޫޕު ދެ ފެކްޝަނަކަށް ބައިވެ، ބަހުސް ވަނީ ހޫނުވެފައި -- އާޓްވޯކް: އިސްމާއިލް އިމްދާދު / އަދަދު
about 7 hours 2
ސަރުކާރު ހިއްސާވާ ކުންފުނިތަކުގެ ތެރޭގައި ހިންގާ ކޮރަޕްޝަންތަކާ ގުޅިގެން ޕީއެންސީގެ މަޖިލިސް މެންބަރުން ތިއްބަވާ ވަޓްސްއެޕް ގުރޫޕު މިއަދު ހޫނުވެއްޖެ އެވެ.
ޕީއެންސީ ޕީޖީގެ ވަޓްސްއެޕް ގުރޫޕުގައި ބަހުސް ފުރަތަމަ ފެށުނީ ކޮރަޕްޝަނަށް މަގުފަހި ވާގޮތަށް ފެނަކައަށް ސްޕެއާތަކެއް ގަންނަން އުޅޭ ކަމަށް ބުނެ ސޯޝަލްމީޑިއާގައި ދެކެވެމުންދާ ވާހަކަތަކެއް މެންބަރަކު އެ ގުރޫޕަށް ހިއްސާ ކުރެއްވުމުންނެވެ.
ކޮރަޕްޝަންގެ ވާހަކަތަކާ ގުޅިގެން ބަހުސް ކުރެއްވީ ރައީސް ޑރ. މުހައްމަދު މުއިއްޒުއަށް ވަފާތެރި މެންބަރުންނާއި މަޖިލީހުގެ ރައީސް އަބްދުއްރަހީމް އަބްދުﷲ އަށް ވަފާތެރި މެންބަރުންގެ މެދުގަ އެވެ.
ސަރުކާރު ތެރޭގައި ކޮރަޕްޝަންގެ އަމަލުތަކެއް ހިނގަމުން ދާކަމަށް ވިދާޅުވެ އެކަމާ ދެކޮޅަށް ރައީސްއަށް ވަފާތެރި މެންބަރުން ވާހަކަދެއްކެވިއިރު، އަބްދުއްރަހީމްއަށް ވަފާތެރި މެންބަރުން ވަޑައިގެންނެވީ ނުސީދާކޮށް ރައްދު ދެއްވަމުންނެވެ.
"ގޯހަކީ ގޯސްކަން ގަބޫލުކޮށް، އިސްލާހު ކުރުމަކީ މެންބަރުންގެ ކިބައިން ވޯޓާސް [ކުރާ] އުއްމީދެއް، އަބަދުވެސް ހުޝާމަދު ކުރަމުން ގޮސް، ކުރިން ވެސް ވެރިކަން ހަލާކުވީ، އަޅުގަނޑުމެން މިއީ ފުއްޕާހަން ފުއްޕާ ޕެނަޑޯލް ބަންދުކުރި މީހުން، މި ވެރިކަން ވެއްޓެން ބޭނުން ނުވާތީ މިހެން މި ކިޔަނީ، ހުސް ވަގުން، އޭރުވެސް މިހާރުވެސް، ލަދުން ބޯހަލާކު" މާފަންނު ދެކުނު ދާއިރާގެ މަޖިލިސް މެންބަރު އަބްދުﷲ ރިފާއު ވިދާޅުވެފައިވެ އެވެ.
އޭނާގެ ވާހަކަތަކަށް ބާރު ދެއްވައި މާފަންނު މެދު ދާއިރާގެ މަޖިލިސް މެންބަރު އަސްމާ ރަޝީދު ވިދާޅުވީ ސަރުކާރުގައި ހިނގާ ކޮރަޕްޝަންގެ ސަބަބުން އާހިރުގައި ހުރިހާ ގެއްލުމެއް ލިބޭނީ ރައީސް މުއިއްޒުއަށް ކަމަށެވެ.
"އަޅުގަނޑުމެންނަކީ ދުވާލު ހަތަރުދަމު ސަރުކާރު ދިފާއު ކުރާނެ މީހުން، ކީއްތޯ ވާނީ އަޅުގަނޑުމެން މިދައްކަވާ ވާހަކަތައް އަޑުއަހައި ގަބޫލު ކުރިއްޔާ، އެބަ އެނގޭ ކޮރަޕްޝަން ހިނގާކަން، އަޅުގަނޑުމެން ހެކި ދައްކަފާނަން، މީގެ ހުރިހާ ގެއްލުމެއް ލިބެނީ ރައީސްއަށް، ކަމެއް ގޯސްކޮށް ހިނގާނަމަ އެ ވާހަކަ ނުދައްކައި، ފަހުން ނުކުންނަ ނަތީޖާ މާ ގޯސްވާނެ، ބުއްދިވެރި ގޮތަކީ ވާހަކަދެކެވި ރަނގަޅު ހައްލެއް ލިބިގެން ދިޔުން،" މާފަންނު މެދު ދާއިރާގެ މަޖިލިސް މެންބަރު، އަސްމާ ރަޝީދު ވިދާޅުވެފައިވެ އެވެ.
ސަރުކާރު ތެރޭގައި ހިންގާ ކޮރަޕްޝަންގެ ވާހަކަތަކާ ދެކޮޅަށް ޕީއެންސީގެ މަޖިލިސް މެންބަރުން ވާހަކަދައްކަން ފެށްޓެވުމުން އަބްދުއްރަހީމްއަށް ވަފާތެރި ބައެއް މަޖިލިސް މެންބަރުން ވަނީ ރައީސްއަށް ތައުރީފު ކޮށްފައި ހުރި ބައެއް ޕޯސްޓުތައް އެ ގުރޫޕަށް އަޅައިފަ އެވެ. އެކަމަށް ރައްދު ދެއްވައި ރައީސްއަށް ވަފާތެރި މެންބަރުން ވިދާޅުވެފައި ވަނީ އެ ޕޯސްޓުތައް އަޅަނީ މައުލޫއު އޮޅުވައިލަން ކަމަށެވެ.
"ފެނަކަ ހިންގަވާވަރުން ބޯހަލާކު،" އުނގޫފާރު ދާއިރާގެ މަޖިލިސް މެންބަރު އިބްރާހިމް ޝިފާޒް ވިދާޅުވެފައިވެ އެވެ.
ސޯޝަލް މީޑިއާގައި ދައުރުކޮށްފައިވާ ފެނަކައިގެ ބިލަށް އިޝާރަތް ކުރައްވައި މުލަކު ދާއިރާގެ މެންބަރު އިބްރާހީމް ނައުފަލް ވިދާޅުވީ އެފަދަ ބިލެއް އޭނާގެ ދާއިރާއަށް ނުހެދުމަށެވެ.
ރައީސްއަށް ވަފާތެރި މެންބަރުން ދައްކަވަމުންދިޔަ ވާހަކަތަކާ ގުޅިގެން ޕީއެންސީގެ ޕީޖީ ލީޑަރު، އިބްރާހިމް ފަލާހު ވިދާޅުވީ ބަދަހި ބައެއްގެ ގޮތުގައި މެންބަރުން މަސައްކަތް ކުރުމަށް އެދޭ ކަމަށެވެ. ރައީސްއަށް ވަފާތެރި ބައެއް މެންބަރުންނަށް ރައްދު ވެސް އޭނާ ދެއްވި އެވެ.
ފެނަކައިގެ ބިލުތަކަށް ރިޕްލައި ކުރައްވައި، ހުޅުމާލެ އުތުރު ދާއިރާގެ މަޖިލިސް މެންބަރު ހުސެއިން ޝަރީފު ވިދާޅުވީ ހައުސިން ޑިވެލޮޕްމެންޓު ކޯޕަރޭޝަން (އެޗްޑީސީ) ގައި ވެސް އޮތީ ކޮރަޕްޝަނާއި ވައްކަން ކަމަށެވެ. އަދި، އެކަން ދިފާއުކޮށް ހުޅުވޭނީ ކޮން އަނގައެއްތޯ އޭނާ ސުވާލު އުފެއްދެވި އެވެ.
އެ ބަހުސްގެ ތެރެއިން އަބްދުއްރަހީމްއަށް ވަފާތެރި މެންބަރެއްގެ ގޮތުގައި ފާހަގަކުރެވޭ، ވިލިމާލެ ދާއިރާގެ މަޖިލިސް މެންބަރު، މުހައްމަދު އިސްމާއިލް ވިދާޅުވީ ގޯސްކޮށް ކަންތައްތަކެއް ހިނގާނަމަ، އެ މައްސަލަތައް ހުށަހަޅަން ޖެހޭނީ އެކަންކަން ހައްލު ކުރެވޭނެ ބަޔަކަށް ކަމަށެވެ.
"ކަންކަން ގޯސްކޮށް ހިނގާނަމަ އެކަމެއް ހިއްސާ ކުރަންވާނީ އެކަމާ ގުޅުންހުރި ފަރާތްތަކަށް ނުވަތަ ހައްލު ކުރެވޭނެ ފަރާތްތަކަށް،" މުހައްމަދު އިސްމާއިލް ވިދާޅުވި އެވެ.
ޕީއެންސީ ޕީޖީ ގުރޫޕުގައި ހިނގި ބަހުސް އާ ގުޅިގެން މަޖިލީހުގެ ރައީސް، އަބްދުއްރަހީމް އެއްވެސް އެއްޗެއް ވިދާޅެއް ނުވެ އެވެ.
ޕީއެންސީގެ މަޖިލިސް މެންބަރުންގެ މެދުގައި ހޫނު ބަހުސްއެއް ހިނގާފައި މިވަނީ ސަރުކާރު ހިއްސާވާ ގިނަ ކުންފުނިތަކަކަށް ކޮރަޕްޝަންގެ ތުހުމަތު ކުރެވިފައި ވަނިކޮށެވެ. އެގޮތުން ފެނަކައިގެ އިތުރުން އެޗްޑީސީ އާއި ސްޓެލްކޯ އަދި، ފިއުލް ސަޕްލައި މޯލްޑިވްސްއަށް ކުރެވޭ ކޮރަޕްޝަންގެ ތުހުމަތުތަކުގެ އަޑު މިފަކަށް އައިސް އަންނަނީ ގަދަވަމުންނެވެ.
Comment