ގައުމީ ދިގު ފެތުމުގެ މުބާރާތު (އޯޕަން ވޯޓާ ސްވިމިން ކޮމްޕެޓިޝަން)ގެ ފަސް ކިލޯމީޓަރު ފެތުމުގެ ފިރިހެން ބައިގެ ޗެމްޕިއަންކަން މުހައްމަދު ރިހާން ޝިހާމް ދިފާއުކުރިއިރު, އަންހެން ބައިގެ ޗެމްޕިއަންކަން އަޔާނާ އަރީފް ހޯދައިފި އެވެ.

ކުޑަގިރި ޕިކްނިކް އައިލަންޑްގައި ކުރިއަށްދިޔަ މި ފަހަރުގެ މުބާރާތުގެ ފިރިހެން ބައިގެ ޗެމްޕިއަންކަން ރިހާން ހޯދިއިރު, މި ކެޓަގަރީގެ ދެ ވަނަ އަށް ދިޔައީ ޔާސީން މުހައްމަދު ޔޫސުފް އެވެ. އަދި ތިން ވަނަ އަށް ދިޔައީ މުބާލް އައްޒާމް އެވެ. މިއީ، ރިހާން މި މުބާރާތް ޖެހިޖެހިގެން ކާމިޔާބުކުރި ދެ ވަނަ ފަހަރެވެ.

ފަސް ކިލޯމީޓަރުގެ އަންހެން ކެޓަގަރީގެ ޗެމްޕިއަންކަން ހޯދީ އަޔާނާ އެވެ. މިއީ، އަޔާނާ މި މުބާރާތުގެ ޗެމްޕިއަންކަން ހޯދި ފުރަތަަމަ ފަހަރެވެ. އަޔާނާއާ އެންމެ ކައިރިން ވާދަކުރީ އައިޝަތު އެލީނާ ޝާހިދާ އާއި ލައިބާ ހަސަން މަނިކެވެ.

މީގެ އިތުރުން، ޖޫނިއާ ކުދިންނަށް ހާއްސަކޮށް ތިން ކިލޯމީޓަރުގެ ކެޓަގަރީ އެއްވެސް ކުރިއަށް ގޮސްފައިވާއިރު, އެ ކެޓަގަރީން ފިރިހެން ބައިގެ ޗެމްޕިއަންކަން ހޯދީ ދާނިޔަލް އަމީން ފައިސަލް އެވެ. އަދި އަންހެން ޗެމްޕިއަންކަން ހޯދީ ޒޯހާ އަޒްލީ ނަސީމް އެވެ.

މި މުބާރާތުގައި، ނެޝަނަލް ލެވަލްގައި ފަސް ކިލޯމީޓަރު ފަތާއިރު، ޖޫނިއާ ނެޝަނަލް ލެވަލްގައި ތިން ކިލޯމީޓަރަށް ފަތާނެ އެެެވެ. ސްވިމިން ޗެލެންޖްގައި އެއް ކިލޯމީޓަރު ފަތާނެ އެވެ. އަދި ކިޑްސް ސްވިމް ޗެލެންޖް ފަން އިވެންޓެއްގެ ގޮތުގައި ކުރިއަށްދާއިރު، މި އިވެންޓުގައި 500 މީޓަރަށް ފަތާއިރު، ރޭސް ނިންމާ ކޮންމެ ކުއްޖަކަށް، ފިނިޝިން މެޑަލް ދޭނެ އެވެ.

މިއީ، އޯޕަންވޯޓާ ސްވިމިން މުބާރާތް ކުޑަގިރީގައި ބޭއްވި ދެ ވަނަ ފަހަރެެވެ. މާލެއާ 15 ވަރަކަށް މިނެޓު ރާސްތާއެއްގައި އޮތް ބަންގަލް ފަޅުގައި ހެދި 8.5 ހެކްޓަރުގެ ކުޑަގިރީގައި، މިދިޔަ އަހަރު ބޭއްވި މުބާރާތަށް ވުރެ މި ފަހަރުގެ މުބާރާތަށް ލިބުނު ތަރުހީބު ބޮޑެވެ.