ސަރުކާރުގެ ހަރަދުތައް ހަމަޖައްސަން ބޭންކް އޮފް މޯލްޑިވްސް (ބީއެމްއެލް) އިން ބޮޑެތި އަދަދުތަކުން ތަކުރާރުޖޮށް ފައިސާ ދޫކުރަމުން ގެންދިއުމަކީ އެ ބޭންކަށް ކުރިމަތިވެފައި އޮތް ބޮޑު ރިސްކެއް ކަމަށް ކުރީގެ ރައީސް އަބްދުﷲ ޔާމީނު ސިފަކުރައްވައިފި އެވެ.

ބުރާސްފަތި ދުވަހުގެ ރޭ ޕީއެންއެފް އިން ބޭއްވި ޖަލްސާގެ އޯޑިއަންސްގައި އިންނަވައި، ޔާމީނު ވިދާޅީ ބޭންކް އޮފް މޯލްޑިވްސްގެ ބޯޑުން މަސައްކަތްކުރަން ޖެހޭނީ ބޭންކަކީ "އެކްސެސިވްލީ" ރިސްކަށް ހުޅުވައިލެވޭ ތަނަކަށް ނުހަދަން ކަމަށާ އެ ބޭންކަކީ ވެންޗާ ލޯނު ދޭ ތަނެއް ނޫން ކަމަށެވެ. ބީއެމްއެލް އަކީ އެހާ ވަރަށް ރިސްކަށް ހުށަހެޅިގެންވާނެ ތަނެއް ނޫން ކަމަށް ވެސް އެމަނިކުފާނު ވިދާޅުވި އެވެ.

ބީއެމްއެލް އިން ސަރުކާރަށް މިފަހުން ދޫކުރި ގާތްގަނޑަކަށް ބިލިޔަނެއްހާ ރުފިޔާ ދޫކުރީ ޔާމީނު ތުހުމަތުކުރެއްވި ގޮތުގައި އެ ބޭންކްގެ ރިސްކް އެސެސްމެންޓް ޑިޕާޓްމަންޓުން އެކަން އެގޮތަށް ނުކުރަން ލަފާދީފައި ވަނިކޮށެެވެ.

"ރިސްކް އެސެސްމެންޓް ޑިޕާޓްމަންޓުން މިއޮތީ ކަނޑައެޅިގެން މިކަން ނުކުރާން ބުނެފައި. އެއީ އޭގެ ކުރިން ވެސް ބޭންކުން ނަގައިފި 600 މިލިޔަން، ހަމަ ދިވެހި ދައުލަތުގެ މުވައްޒިފުންނަށް މުސާރަދޭން،" ޔާމީން ވިދާޅުވި އެވެ.

ބޭންކުން އެއް ކްލަޔަންޓެއްގެ ގޮތުގައި ސަރުކާރަށް އެހާ ގިނަ ފައިސާ ދަރަންޏަށް ދޫކުރުމުގައި އޮތް އެންމެ ބޮޑު ރިސްކަކީ ސަރުކާރުން އެފައިސާ އަނބުރާ ނުދައްކައިފި ހާލަތެއްގައި އެ ފައިސާ ހޯދަން ކުރެވޭނެ ކަމެއް ނެތުމެވެ.

"ދިވެހި ސަރުކާރު ގޮވައިގެން ދައުލަތަކުން ދައުވާއެއް ނުކުރެވޭނެ، ބޭންކަކަށް ދައުވާއެއް ނުކުރެވޭނެ. އެމްއެމްއޭ އަކުން މި ގެއްލުނު ފައިސާއެއް އަންޑަރައިޓެއް ނުކުރާނެ،" ޔާމީން ވިދާޅުވި އެވެ.

އެމަނިކުފާނު ވިދާޅުވީ ސަރުކާރަށް ދޫކުރި ފައިސާ ނުހޯދި ހޭދަވާ ކޮންމެ ދުވަހަކީ ރައްޔިތުންނަށް ލޯނު ދޫކޮށްގެން ބީއެމްލްއަށް އިތުރު ފައިސާ ހޯދަން ހުރަސް އެޅޭ ދުވަހެއް ކަމަށެވެ.

ބީއެމްއެލްގެ ބޯޑުގެ މެންބަރުކަން ވެސް ކުރިން ކުރައްވާފައިވާ ބޭފުޅެއްގެ ހައިސިއްޔަތުން ޔާމީނު ވިދާޅުވީ ބޭންކްގެ ރިސްކް އެސެސްމެންޓް ޑިޕާޓްމަންޓުން ވަކި ގޮތަކަށް ކަމެއް ނުކުރަން ބުނެފި ނަމަ އެކަމެއް ކޮށްގެން ނުވާނެ ކަމަށެވެ.

"އެކަމަކު މިއޮތީ، ބޯޑުގައި މިހާރު ތިބީ ސިޔާސީ ބަޔަކަށް ވާތީ ބޯޑުން އެއޮތީ އެކަން ކޮށްފައި[ އެއް ކްލަޔަންޓެއްގެ ގޮތުގައި ސަރުކާރަށް ގިނަ އަދަދެއްގެ ފައިސާ ދޫކޮށްފައި]،" ޔާމީނު ވިދާޅުވި އެވެ.

އެމަނިކުފާނު ވިދާޅުވި ގޮތުގައި އެއީ ބޭންކެއްގެ ބޯޑަށް ކަންތައް ކުރެވޭނެ ގޮތެއް ވެސް ނޫން ކަމަށެވެ.