ކޮލަމްބޯ (ސެޕްޓެމްބަރު 28) - ސްރީ ލަންކާ ފުޓްބޯޅަ ޓީމުގެ ވަގުތީ ކޯޗަކަށް ހަމަޖެއްސި ކުވެއިތުގެ އަބްދުﷲ އަލް މުތައިރީގެ ކޮންޓްރެކްޓް އާ ކުރަން މަޝްވަރާތައް ކުރިއަށްގެންދަމުން އަންނަ ކަމަށް މީޑިއާ ރިޕޯޓްތައް ބުނެފި އެވެ.

ލަންކާއާ ހަވާލުވެހުރި، އިނގިރޭސި ކޯޗު އެންޑީ މޮރިސަން އަށް ދިމާވި އަނިޔާގެ މައްސަލައަކާ ހުރެ، އޭނާ ސާޖަރީއެއް ހަދަން ޖެހުމުން އޭނާ ވަނީ ބްރޭކެއް ނަގައިފަ އެވެ. އެ މުއްދަތާ ދިމާވީ، އޭޝިއަން ކަޕް ކޮލިފައިން ޕްލޭއޮފްގައި ލަންކާ އާއި ކެމްބޯޑިއާ މެޗު ތާވަލުކުރި ދުވަސްވަރަށެވެ. އެ ގޮތުން، އޭޝިއަން ކަޕް ކޮލިފައިން ޕްލޭއޮފް ދެ މެޗުގައި ރަނގަޅަށް ކުޅެ، މުތައިރީގެ ކޯޗު ކަމުގައި، ކެމްބޯޑިއާ އަތުން ލަންކާ މޮޅުވުމާ ގުޅިގެން، އޭނާއާ މެދު ލަންކާގެ ފުޓްބޯޅަ ފެޑެރޭޝަނުން ތިބީ ހިތްހަމަޖެހިފަ އެވެ.

ލަންކާގެ މީޑިއާ ރިޕޯޓްތައް ބުނާގޮތުން، އަންނަ މަހުގެ ފީފާ ދުވަސްތަކުގައި މިޔަންމާއާ ދެކޮޅަށް ލަންކާ އިން ކުޅޭ އެކުވެރިކަމުގެ ދެ މެޗުގެ ނަތީޖާ އަށް ބެލުމަށް ފަހު މުތައިރީ އަށް އާ ކޮންޓްރެކްޓެއް ދިނުމުގެ ކަންކަން ލަންކާ ފުޓްބޯޅަ ފެޑެރޭޝަނުން ފައިނަލް ކުރާނެ އެވެ.

މި މަހު ނެރުނު ފީފާގެ ރޭންކިންގައި ސާފް ސަރަހައްދުން އެންމެ ބޮޑު ކުރިއެެރުމެއް ހޯދީ ލަންކާ އެވެ. ފީފާ އިން މި މަހު ނެރުނު، ކޮކާކޯލާ ފުޓްބޯޅަ ރޭންކިންގައި، ލަންކާ އޮތީ ދުނިޔޭގެ 200 ވަނައިގަ އެވެ. މިއީ، މިދިޔަ މަހަށް ބަލާއިރު ފަސް ދަރަޖައިގެ ކުރިއެރުމެކެވެ.

މުތައިރީ އަކީ އޭޝިއާގެ ފުޓްބޯޅައިގައި ތަޖުރިބާ ހުރި ކޯޗެކެވެ. ކިރްގިސްތާންގެ 17 އަހަރުން ދަށުގެ ޓީމަށް ވެސް ކޯޗުކޮށްދިން މުތައިރީ، ނޭޕާލް ކޯޗުކަން، 2022 ވަނަ އަހަރު ދޫކޮށްލުމަށް ފަހު، ދެން، މުތައިރީ ފެނުނީ އަފްގާނިސްތާންގެ ކޯޗުގެ މަގާމުންނެވެ. މިދިޔަ އަހަރު، އެކުވެރިކަމުގެ މެޗެއްގައި އަފްގާނިސްތާނުން ބަންގްލަދޭޝާ ކުޅެމުން، މުތައިރީ އާއި ބަންގްލަދޭޝްގެ ކޯޗިން ސްޓާފުންނާ ދެމެދު މައްސަލަތަކެއް ޖެހުނެވެ. އޭގެ ސަބަބުން، ފަހުން އަފްގާނިސްތާނުން ވަނީ މުތައިރީގެ އެއްބަސްވުން ނިމުމަކަށް ގެނެސްފަ އެވެ.