އިންޑިއާއާ ދެކޮޅު ވައުދުތަކެއްވީ ރިޔާސީ އިންތިހާބު ކާމިޔާބު ކުރުމުގެ ބޭނުމުގައި ކަމަށް ރައީސް ޑރ. މުހައްމަދު މުއިއްޒު ވިދާޅުވި ކަމަށް ސްރީ ލަންކާގެ ކުރީގެ ރައީސް ރަނިލް ވިކްރަމްސިންހު ވިދާޅުވެއްޖެ އެވެ.

މި ހަފުތާ ބަންދުގައި ބޭއްވި ލަންކާގެ ރިޔާސީ އިންތިހާބުގައި ނާކާމިޔާބީއާ ކުރިމަތިވި ރަނިލް މިފަދައިން ވިދާޅުވީ، ސެޕްޓެމްބަރު 19، ގައި އިންޑިއާގެ ފަސްޓް ޕޯސްޓަށް ދެއްވި ހާއްސަ އިންޓަވިއުއެއްގަ އެވެ.

"ރައީސް މުއިއްޒު މިހާރު އިންޑިއާއާ ކުރިއަށްވުރެ އެކުވެރި. އިންތިހާބަށް ފަހު އެ މަނިކުފާނު އަޅުގަނޑު ގާތު ވިދާޅުވި އިންތިހާބު ކާމިޔާބު ކުރުމަށް [އިންޑިއާއާ ދެކޮޅު] ވައުދުތަކެއް ވާން ޖެހުނޭ،" ރަނިލް ވިދާޅުވި އެވެ.

ޖޫން މަހު އިންޑިއާގެ ބޮޑުވަޒީރު ނަރެންދުރަ މޯދީ ތިންވަނަ ދައުރަކަށް ހުވާކުރެއްވި ރަސްމިއްޔާތުގައި ރައީސް މުއިއްޒު އާއި މޯދީއާ ދެމެދު އޮތް "ކެމިސްޓްރީ" ނުވަތަ ގުޅުން ބަދަހިވެފައިވާކަން ފާހަގަކުރެވުނު ކަމަށް ވެސް ރަނިލް ވިދާޅުވި އެވެ. އެ ރަސްމިއްޔާތަށް ރަނިލް ވެސް ނިއު ދިއްލީއަށް ވަޑައިގަތެވެ.

އެގޮތަށް ގުޅުން ބަދަހިވީ އިންޑިއާ އާއެކު ކުރިއަށް ދިއުމަކީ އެންމެ ރަނގަޅު ގޮތްކަން ރައީސް މުއިއްޒުއަށް ވިސްނިގެންތޯ ފަސްޓް ޕޯސްޓުގެ ނޫސްވެރިޔާ ޕަލްކާ ޝަރުމާ ސުވާލު ކުރި އެވެ.

ރައްދުގައި ރަނިލް ވިދާޅުވީ އެ ސުވާލު ކުރަން ޖެހޭނީ ރައީސް މުއިއްޒުއާ ކަމަށެވެ.

ނޮވެމްބަރު 17، 2023 ގައި ރައީސް މުއިއްޒު ވެރިކަމުގެ ހުވާ ކުރެއްވި ރަސްމިއްޔާތުގައިވެސް ރަނިލް ބައިވެރިވެވަޑައިގެންނެވި އެވެ.

"އިންޑިއާ އައުޓް" ވައުދުތަކާއި ބަދަލުވި ސިޔާސަތުތައް

މިހާރު ވެރިކަމުގައި އޮތް ޕީއެންސީ ކޯލިޝަނުން 2018 އިން 2023 އާ ހަމައަށް އިދިކޮޅުގައި އޮވެ އެންމެ ހަރުއަޑުން ކުށްވެރިކުރަމުން ދިޔައީ ނިމިދިޔަ އެމްޑީޕީ ސަރުކާރުން އިންޑިއާއާއެކު ބާއްވަމުން ދިޔަ ގުޅުމަށެވެ. އޭރު "އިންޑިއާ އައުޓް" ގެ ނަމުގައި މާލޭގައި ބޮޑެތި އެއްވުންތަކާއި މުޒާހަރާތައްވެސް ބޭއްވި އެވެ. އެ ހަރަކާތްތަކުގައި ރައީސް މުއިއްޒުވެސް ބައިވެރިވެވަޑައިގެންނެވި އެވެ.

އެ ހަރަކާތްތަކުގެ ތެރެއިން ރިޔާސީ ކެމްޕޭނުގެ ވައުދުތަކަށްވެސް "އިންޑިއާ އައުޓް" ގެ އަސަރު ފޯރި އެވެ. ރައީސް މުއިއްޒު ވެރިކަމަށް ވަޑައިގެންނެވީ ރާއްޖޭގައި ތިބި އިންޑިއާ ސިފައިންނާއި އެ ގައުމުގެ އަސްކަރިއްޔާ ފޮނުވާލުމަށާއި އެ ގައުމާއެކު ހަދާފައި އޮތް "އަޑި ނޭނގޭ" އެއްބަސްވުންތައް ބާތިލުކޮށް ހާމަކުރުމަށް ވައުދުވެވަޑައިގަންނަވަމުންނެވެ.

ރާއްޖޭގައި އެތައް ހާސް އިންޑިއާ ސިފައިން ތިބި ކަމަށް ބައެއް ނޫސްތަކުން ރިޕޯޓުކުރި ހަބަރުތައް ރައީސް ވަނީ ބައިނަލްއަގުވާމީ މީޑިއާތަކުގައިވެސް ރިއާޔަތްކުރައްވާފަ އެވެ. ވެރިކަމަށް ވަޑައިގެންވެސް އިންޑިއާއިން ރާއްޖެއަށް "ބުލީ" ކުރާކަމަށް ވިދާޅުވެ ނުސީދާ ބަހުގެ ހަމަލާތަކެއްވެސް ދެއްވި އެވެ.

ނަމަވެސް ވެރިކަމުގެ ދެތިން މަސް ނިމުމާއެކު އިންޑިއާ އާ ދެކޮޅަށް އޮތް ސަރުކާރުން ގެންގުޅުނު ރާގު ވަނީ ބަދަލުވެފަ އެވެ. އިންޑިއާ ސިފައިންގެ ގޮތުގައި ސަރުކާރުން އިއުލާނުކުރި 77 މީހަކު ފޮނުވާލާ އެ މީހުން ބަދަލުގައި ގެނައީ އެ ގައުމުގެ ޑިފެންސް މިނިސްޓްރީގެ ދަށުން ހިންގާ ކުންފުންޏެއްގެ ބައެކެވެ. އިންޑިއާއިން ބޭނުންވި ގޮތަށް އެމްޑީޕީ ވެރިކަމުގައިވެސް ރާއްޖޭގައި ބޭނުންކުރި އިންޑިއާގެ ދެ ހެލިކޮޕްޓަރާއި ޑޯނިއާ ބޯޓު އަދިވެސް ދަނީ ދުއްވަމުންނެވެ.

އިންޑިއާއާއެކު ހަދާފައިވާ ތިން އެއްބަސްވުމެއްގެ މައްސަލަ ހިތަދޫ މެދު ދާއިރާގެ މެންބަރު އަހްމަދު އަޒާން ރައްޔިތުންގެ މަޖިލީހުގެ ސަލާމަތީ ހިދުމަތްތަކާބެހޭ ކޮމިޓީ (241 ކޮމިޓީ) އަށް ހުށަހަޅައި، ސަބް ކޮމިޓީއަކުން އެކަން ބަލަން ފާސްކުރިތާ ތިން މަސްވިއިރު އެ މަސައްކަތް އޮތީ މަޑުޖެހިފަ އެވެ.

އިންޑިއާއަށް ބަދު ބަސްތައް ރައްދުކުރުމަށް ފަހު، އިންޑިއާއާ ގުޅުން ބަދަހިކޮށް އެހީ ހޯދަން ރައީސް މުއިއްޒު މިހާރު ގެންދަވަނީ މަސައްކަތް ކުރައްވަމުންނެވެ.

އިންޑިއާ އައުޓު ކެމްޕޭނު ވެސް ހިންގެވީ ރައީސް ޔާމީން ބޭނުންވާތީ ކަމަށް ވެސް ޕީއެންސީގައި މިހާރު ތިއްބެވި ބައެއް ވެރިން ވިދާޅުވެފައިވެ އެވެ. އެގޮތަށް ރާގު ބަދަލުކުރީ އިންޑިއާއާ ގާތް ގުޅުމެއް އުފެއްދުމުގެ ބޭނުމުގައި އަދި އެ ކްމެޕޭނަކީ ސީދާ ރައީސް މުއިއްޒުގެ ތާއިދު ކުރެއްވި ކަމެއް ނޫންކަން ދެއްކުމަށެވެ.