ޗައިނާގެ ވެރިކަންކުރާ ޕާޓީ، ކޮމިއުނިސްޓު ޕާޓީ އޮފް ޗައިނާ (ސީޕީސީ) ގެ ދައުވަތަކަށް ރާއްޖޭގެ ވެރިކަންކުރާ ޕީޕަލްސް ނޭޝަނަލް ކޮންގްރެސް (ޕީއެންސީ) ގެ ބޮޑު ވަފުދެއް އެ ގައުމަށް ފުރައިފި އެވެ.

ޕީއެންސީން މިއަދު ބުނި ގޮތުގައި މިއީ ސީޕީސީގެ އިންޓަނޭޝަނަލް ޑިޕާޓުމެންޓުގެ ދައުވަތަކަށް ކުރާ ދަތުރެކެވެ. އެ ޕާޓީގެ ވަފުދުގައި ވަޒީރުންނާއި މަޖިލިސް މެންބަރުން އަދި ރައީސް އޮފީހުގެ އޮފިޝަލުންވެސް ހިމެނެ އެވެ.

ޕީއެންސީގެ ވަފުދުގައި އެންމެ އިސްކޮށް ހުންނެވީ ޓްރާންސްޕޯޓު މިނިސްޓަރު މުހައްމަދު އަމީން އެވެ. އޭގެ އިތުރުން އެ ޕާޓީގެ ގެ ސެކްރެޓަރީ ޖެނެރަލް ޒީނާޒް އަދުނާނުވެސް ޗައިނާއަށް ފުރި ވަފުދުގައި ހިމެނެ އެވެ.

ޕީއެންސީގެ ވަފުދުގައި ދެން ހިމެނެނީ:

• ހިތަދޫ މެދު ދާއިރާގެ މެންބަރު އަހުމަދު އަޒާން
• މަނަދޫ ދާއިރާގެ މެންބަރު ހުސްނީ މުބާރަކު
• ކުޅުދުއްފުށި އުތުރު ދާއިރާގެ މެންބަރު މުހައްމަދު ދާއޫދު
• ފުވައްމުލަކު ދެކުނު ދާއިރާގެ މެންބަރު އިބްރާހިމް ހުސެއިން
• ގެމަނަފުށި ދާއިރާގެ މެންބަރު އަސަދުﷲ ޝިހާބު
• އިސްދޫ ދާއިރާގެ މެންބަރު އިސްމާއިލް ޝަފީއު
• ކިނބިދޫ ދާއިރާގެ މެންބަރު އަލީ އަޝްރަގު
• މުލަކު ދާއިރާގެ މެންބަރު އިބްރާހިމް ނައުފަލް
• ރައީސް އޮފީހުގެ އަންޑަ ސެކެރެޓަރީ ފޯ ޕަބްލިކް ޕޮލިސީ، މުހައްމަދު ފިރުޒުލް އަބްދުﷲ ހަލީލު
• ރައީސް އޮފީހުގެ އިބްރާހިމް އަބާން އަބްދުއްލަތީފު
• ޑެޕިއުޓީ މިނިސްޓަރު އަމާނީ މުހައްމަދު

ވެރިކަންކުރާ ޕާޓީން ނެރުނު ބަޔާނުގައި ބުނީ މިއަދު ފެށި ދަތުރުގެ ނިންމާލާނީ މި މަހު 26 ގައި ކަމަށެވެ. ޕީއެންސީގެ ވަފުދުން މި ދަތުރުގައި ޗައިނާގެ ފަސް ސިޓީއަށް ޒިޔާރަތްކޮށް އެ ސިޓީތަކުގައި ހިންގާ އެކި ސިނާއަތްތަކުގެ މަސައްކަތް ބެލުމަށް ހަމަޖެހިފައިވާ ކަމަށްވެ އެވެ.

"މި ދަތުރުފުޅުގެ މަގުސަދަކީ ފަހުގެ ތާރީހެއްގައި ދުނިޔެ ދުށް އެންމެ ހަލުއި އިގުތިސޯދީ ކުރިއެރުން ޗައިނާއިން ހާސިލުކުރި ގޮތުގެ ތަޖުރިބާއިން ދަސްކުރެވެން ހުރި ކަންކަން ދަސްކޮށް ދެ ޕާޓީގެ މެދުގައި އޮތް ގުޅުން ބަދަހިކޮށް ތަޖުރިބާތައް ހިއްސާކުރުން،" ޕީއެންސީން ބުންޏެވެ.

އެ ޕާޓީގެ ވަފުދުން ސީޕީސީގެ އިންޓަނޭޝަނަލް ޑިޕާޓުމެންޓުގެ މިނިސްޓަރ ލިއު ޖިންޗާއޯއާ އަދި ޕާޓީގެ އިސްވެރިންނާއެކު މަޝްވަރާކޮށް ތަޖުރިބާ ހިއްދާކުރެވޭނެ ކަމަށެވެ.

ޕީއެންސީގެ އަސްލުކަމަށްވާ ޕީޕީއެމްގެ ވެރިކަމުގައި އޭރުގެ ސަރުކާރާ ޗައިނާއާ ވަރަށް ގާތް ގުޅުމެއް އޮތެވެ. ޗައިނާއިން ރާއްޖޭގެ ތަރައްގީއަށް އޭރު ބޮޑެތި އެހީތައް ދިނެވެ. ސިނަމާލެ ބްރިޖް އަޅަން ހަރަދުކުރި 200 މިލިޔަން ޑޮލަރުގެ ދެބައިކުޅަ އެއްބައި އެގައުމުން ހިލޭ އެހީގެ ގޮތުގައި އޭރު ދިނެވެ. ޗައިނާގެ ރައީސް ޝީޖިންޕިން ރާއްޖެއަށް ރަސްމީ ދަތުރެެއް ކުރެއްވީ ވެސް އެ ވެރިކަމުގަ އެވެ.