ރައީސް ޑރ. މުހައްމަދު މުއިއްޒުގެ ސިޔާސަތުތަކާއެކު ރާއްޖެ ދެން ދެކޭނީ ޑިމޮކްރަސީގެ މުޅިން އާ ބާބެއް ކަމަށް ވެރިކަން ކުރާ ޕާޓީ، ޕީޕަލްސް ނޭޝަނަލް ކޮންގްރެސް (ޕީއެންސީ) އިން ބުނެފި އެވެ.

މިއަދު ފާހަގަކުރާ ޑިމޮކްރެސީ ދުވަހުގެ މުނާސަބަތުގައި ޕީއެންސީން ނެރުނު ބަޔާނެއްގައި ބުނީ، ރައީސް މުއިއްޒު ގެންނަވާ އާ ބާބު ފެށިގެންދާނީ، މި "ޒައާމަތުގައި" ދައުލަތް ހިންގުމަށް އެމަނިކުފާނު ގެންނަވަން ފަށްޓަވާފައިވާ އިސްލާހީ ބަދަލުތަކާއި، އެމަނިކުފާނު ގެންގުޅުއްވާ އިގުތިސޯދީ އިޖުތިމާއީ ސިޔާސަތުތަކުގެ ސަބަބުން ކަމަށެވެ.

އެ ޕާޓީގެ ރައީސް އަދި ކޯލިޝަނުގެ ލީޑަރުގެ ގޮތުގައި ހުންނެވި ރައީސް މުއިއްޒު ކުރައްވަމުން ގެންދަވާ މަސައްކަތްތަކަށް އެ ބަޔާނުގައި ޝުކުރު ދަންނަވާފައިވެ އެވެ.

"އެއް ޕާޓީއަށްވުރެ ގިނަ ޕާޓީ ބައިވެރިވާ ސިޔާސީ ނިޒާމު ރާއްޖެއަށް ތައާރަފުކުރެވުނުތާ 16 އަހަރަށްވުރެ ގިނަ ދުވަސް ފާއިތުވެފައިވެގެން ގޮސްފައިވާއިރު، ދުސްތޫރީ ގޮތުންނާއި އިދާރީ ގޮތުން ގެންނަންޖެހޭ މުހިއްމު ބޮޑެތި ބަދަލުތަކެއް ހުރިކަން ފާހަގަކުރެވިފައިވީ ނަމަވެސް އެފަދަ އިސްލާހުތަކެއް ގެނައުމުގެ މަސައްކަތް ވަނީ ނުކުރެވިފަ،" އެ ބަޔާނުގައިވެ އެވެ.

ނަމަވެސް މި ވެރިކަމުގެ ފުރަތަމަ ނުވަ މަހު ގާނޫނުތަކަށާއި ނިޒާމަށް މުހިންމު ބަދަލުތަކެއް ގެނެވި، އިތުރު އިސްލާހުތައް ގެނައުމުގެ މަސައްކަތް ކުރެވެމުންދާ ކަމަށް ޕީއެންސީން ބުންޏެވެ.

އެގޮތުން ވެރިކަންކުރާ ޕާޓީން ފާހަގަކުރި ކަންކަމުގެ ތެރޭގައި، މަޖިލީހުގެ މެންބަރުންގެ އަދަދު އެއްވަރެއްގައި ހިފެހެއްޓުމާއި ބޮޑެތި އިންތިހާބުތައް އެއް ތާރީހެއްގައި ބޭއްވުމަށް ގާނޫނަށް އިސްލާހު ގެނައުމަށް ކުރެވޭ މަސައްކަތައް އެ ޕާޓީން ފާހަގަކޮށްފައިވެ އެވެ.

މީގެ އިތުރުން ރާއްޖެއިން ބޭރުގެ ސިފައިން ފޮނުވާލުމާއި ރާއްޖޭގައި އޮތް ބަދަލުހިފުމުގެ ރޫހު ނައްތާލާ ކޯޓުތަކަށް އަތް ބޭނުން ހުއްޓާލި ކަމަށް ރައީސް ވިދާޅުވާ ވިދާޅުވުމަކީވެސް ޑިމޮކްރަސީއަށް ލިބުނު ކާމިޔާބީތަކެއްގެ ގޮތުގައި ޕީއެންސީން ވަނީ ފާހަގަކޮށްފަ އެވެ.

ރައީސް މުއިއްޒު ވަނީ ކުރިއަށް އޮތް ފަސް އަހަރުގެ ތެރޭ ޖުމްލަ 200 ބިލެއް ރައްޔިތުންގެ މަޖިލީހަށް ހުށަހަޅާނެ ކަމަށް ވިދާޅުވެ ގާނޫނު އަސާސީ އިސްލާހު ކުރައްވާނެ ކަމުގެ އިޝާރާތްތަކެއްވެސް ދެއްވާފަ އެވެ. މަޖިލީހުގެ 75 އަށްވުރެ ގިނަ މެންބަރުންނާއެކު ސީދާ މެޖޯރިޓީ އޮތީ ސަރުކާރަށެވެ.