ރާއްޖޭގައި ހުންނަ ޔުނައިޓެޑް އަރަބް އެމިރޭޓްސް (ޔޫއޭއީ) އެމްބަސީ ހިންގި ގ. ނިއުޝާއަށް ކުލި ނުދައްކާ މައްސަލަ ސިވިލް ކޯޓަށް ނުބެލޭނެ ކަމަށް މިދިޔަ ބުރާސްފަތި ދުވަހު އެ ކޯޓުން ނިންމައިފި އެވެ.

ސިވިލް ކޯޓުން ކުރި ހުކުމުގައި ބުނީ ގ. ނިއުޝާ، އާމިނަތު އަހުމަދު ދީދީ ހުށަހަޅާފައިވާ އެ މައްސަލައިގައި ދައުވާ ލިބޭ ޔޫއޭއީ އެމްބަސީއަކީ ޑިޕްލޮމެޓިކް އިމްތިޔާޒް ލިބިފައިވާ ތަނެއް ކަމުން އެ ކޯޓުގައި އެ ދައުވާ ކުރިއަށް ނުގެންދެވޭނެ ކަމަށެވެ.

"ޑިޕްލޮމެޓިކް އިމްތިޔާޒް ލިބިފައިވާ ފަރާތެއް ކަމުގައިވީ ހިނދު، ޑިޕްލޮމެޓިކް އިމްތިޔާޒް ލިބިގެންވާ ފަރާތެއްގެ މައްޗަށް ދިވެހިރާއްޖޭގެ ކޯޓެއްގައި ދައުވާ އުފުލައިގެން ނުވާނެ ކަމަށް ގާނޫނު ނަންބަރު 32/2021 (މަދަނީ އިޖުރާއަތުގެ ގާނޫނު) ގެ 88 ވަނަ މާއްދާގައި ބަޔާންކޮށްފައި އޮތަތީ، މި ދައުވާއަކީ މި ކޯޓުގައި ކުރިއަށް ގެންދެވޭނެ ދައުވާއެއް ނޫން ކަމަށް ކަނޑައަޅައި ހުކުމް ކޮށްފިން،" ސިވިލް ކޯޓުގެ ހުކުމުގައި ބުންޏެވެ.

ޔޫއޭއީ އެމްބަސީގެ މައްޗަށް އެ ދައުވާ އުފުލީ ގ. ނިއުޝާގެ ތިން ފަންގިފިލާ މެއި 1، 2020، އިން ފެށިގެން އޮކްޓޯބަރު، 2022، ގެ ނިޔަަލަށް ކުއްޔަށް ދޭން ޖެހޭ 42،957.40 ޑޮލަރު އާއި އެއްވެސް ނޯޓިސްއެއް ދިނުމެއް ނެތި އެއްބަސްވުން އުވާލުމުން ތިން މަސް ދުވަހުގެ ކުއްޔަށްވާ 48،720 ޑޮލަރުގެ އިތުރުން ގާނޫނީ ހަރަދުގެ ގޮތުގައި 750 ޑޮލަރު އެކީ އެއްފަހަރާ ހޯދުމަށް އެދި އެވެ.

އެ ދައުވާއާ ގުޅިގެން ދައުވާ ލިބޭ ޔޫއޭއީ އެމްބަސީއަށް ދައުވާ ފޯމާއި ލިޔެކިޔުންތައް ފޮނުވަން މަސައްކަތް ކުރި ނަމަވެސް، އެ އެމްބަސީއަށް ދައުވާ ފޯމާއި ލިޔުންތައް ރައްދު ނުވާ ކަމަށް ސިވިލް ކޯޓުން ބުންޏެވެ.

ރާއްޖޭގައި ހުންނަ ބޭރު ގައުމުތަކުގެ އެމްބަސީތަކާއި ހައިކޮމިޝަންތަކަކީ "ވިއެނާ ކޮންވެންޝަން އޮން ޑިޕްލޮމެޓިކް ރިލޭޝަންސް 1961" ގެ ދަށުން ޑިޕްލޮމެޓިކް އިމްތިޔާޒް ލިބިގެންވާ ތަނެކެވެ.

ނަމަވެސް ސިވިލް ކޯޓުގެ ނިންމުން ހައި ކޯޓުގައި އިސްތިއުނާފް ކުރުމަށް 30 ދުވަހުގެ މުއްދަތެއް އެ ކޯޓުން ވަނީ ދީފަ އެވެ.