އއ. އުކުޅަހު ބަނދަރުގައި ހަތަރު މީހަކު އަރުވައިގެން ސައިކަލު ދުއްވި މީހަކު ހައްޔަރުކޮށްފައިވާ ކަމަށް ފުލުހުން ބުންޏެވެ.

ފުލުހުން މިއަދު ބުނީ، މި މައްސަލާގައި ޑޭޒީމާގެ، އއ. އުކުޅަސް، އަހުމަދު ނަސީމު، 29، ހައްޔަރުކުރީ އާދިއްތަ ދުވަހު ހަވީރު ކަމަށެވެ. އޭނާގެ ބަންދާމެދު ގޮތެއް ނިންމުމަށް ކޯޓަށް ހާޒިރުކުރުމުން ހަތް ދުވަސް ޖަހާފައިވާ ކަމަށްވެ އެވެ.

ހަތަރު މީހުން އަރުވައިގެން ބާރު ސްޕީޑުގައި ދުއްވި ސައިކަލު ހުއްޓުވަން މަސައްކަތް ކުރުމުން ނަސީމު ފުލުހުންގެ އަމުރަށް ނުކިޔަމަންތެރިވި ކަމަށާއި ހަޑިހުތުރު ބަހުން ހަޅޭއްލަވައި އަޑުގަދަކޮށް އެ ސަރަހައްދުގެ އާންމު މަސްލަހަތު ނަގާލި ކަމަށްވެސް ފުލުހުން ބުންޏެވެ.

އަދި، އެ ވަގުތު މަޑުނުކޮށް ބާރު ސްޕީޑުގައި އެތަނުން އޭނާ ދިޔަ ކަމަށްވެސް ވެ އެވެ. ފުލުހުން ބުނީ މި މައްސަލަ ފުލުހުން އިތުރަށް ތަހުގީގުކުރަމުން އަންނަ ކަމަށެވެ.