ވިލާ ކޮލެޖުގެ 2024 ގެ ސެޕްޓެމްބަރު އިންޓޭކުގެ ކިޔެވުން ފެށުމުގެ ގޮތުން އެ ކޮލެޖުގައި އޮރިއެންޓޭޝަން އިއްޔެ ހަފްތާ ފަށައިފި އެވެ.

ވިލާ ކޮލެޖުން ބުނީ އޮރިއެންޓޭޝަން ބުރާސްފަތި ދުވަހުގެ ނިޔަލަށް ކުރިއަށް ގެންދާނެ ކަމަށާއި އެ ސެޝަންތަކުގެ އެހީގައި އެ ކޮލެޖަށް އަލަށް ވަންނަ ދަރިވަރުންނަށް ތައުލީމީ އެކި އުކުޅުތަކާއި، ފޯރުކޮށްދޭ ވަސީލަތްތަކުގެ މައުލޫމާތާއި، ކޮލެޖުގެ އެކި އިޖުރާއަތްތަކާއި އަދި ކެމްޕަސްގައި ހުރި އެކިއެކި ވަސީލަތްތަކަށް އަހުލުވެރި ކުރެވިގެންދާނެ ކަމަށެވެ.

ސެޕްޓެމްބަރު އިންޓޭކުގައި ކިޔަވަން ފެށި ދަރިވަރުންނަށް ވިލާ ކޮލެޖުގެ ރެކްޓާ، ޑރ. އަހްމަދު އަންވަރު ވަނީ އޮރިއެންޓޭޝަން ސެޝަންގައި ދަރިވަރުންނަށް އުނގެނުމަށްޓަކައި ގަދައަޅާ މަސައްކަތްކުރުމަށް ނަސޭހަތްތެރިވެ ތައުލީމު އުނގެނުމުގައި ނަޒާހަތްތެރިކަމުގެ މުހިންމުކަމަށް އަލި އަޅުއަޅުއްވާލަފަ އެވެ.

އޮރިއެންޓޭޝަންގެ ފުރަތަމަ ސެޝަން ނިންމާލުމަށްފަހު، ދަރިވަރުންނަށް ޝައުގުވެރި އެކި ހަރަކާތްތަކެއް ކުރިއަށް ގެންދިޔަ އެވެ.

އެ ހަރަކާތްތަކުގައި އެހެން ދަރިވަރުންނާއި ބައްދަލްވުމުގެ ފުރުސަތު ލިބި، ވިލާ ކޮލެޖުގެ ބައެއް ވަސީލަތްތައް ފެނުމުގެ ފުރުސަތު ވެސް ލިބިގެންދިޔަ އެވެ.

މި އަހަރުގެ ސެޕްޓެމްބަރު މަހުގެ އިންޓޭކުގައި 77 ޕްރޮގްރާމެއް ފެށުމަށް ވަނީ ހަމަޖެހިފަ އެވެ.