ރާއްޖޭގެ މަތީ ތައުލީމު ދޭ މަރުކަޒެއްގައި ފުރަތަމަ ފަހަރަށް ގާއިމުކުރި "ވީ ވޭވްސް – ބްރެއިން އެންޑް ބިހޭވިއާ ލެބް" ވިލާ ކޮލެޖުގައި ހުޅުވައިފި އެވެ.

ދުނިޔޭގެ ނަފުސާނީ ސިއްހަތުގެ ދުވަހާ ގުޅުވައިގެން ކޮންމެ އަހަރަކުވެސް ވިލާ ކޮލެޖުގައި ބާއްވާ ހާއްސަ "ސައިކޮލޮޖީ ސިމްޕޯޒިޔަމް" ގެ ތެރެއިން އެ "ބްރެއިން ލެބް" ހުޅުވައި ދެއްވީ ނޭޝަނަލް ސެންޓަ ފޯ މެންޓަލް ހެލްތުގެ ޕްރިންސިޕަލް ކްލިނިކަލް ސައިކޮލޮޖިސްޓް، ޑރ. އާފިޔާ އަލީ އެވެ.

އެ ރަސްމިއްޔާތުގައި ޑރ. އާފިޔާ ވިދާޅުވީ އެފަދަ ލެބެއް ގާއިމުކުރުމުން، ސައިކޮލުޖީ އަދި ކްލިނިކަލް ދާއިރާއިން ފަރުވާ ހޯދާ ފަރާތްތަކަށް ފަހުގެ ޓެކްނޮލޮޖީގެ އެހީގައި ފަރުވާ ދިނުން ހަރުދަނާވެގެންދާނެ ކަމަށެވެ.

އެ ރަސްމިއްޔާތުގައި "ބްރެއިން ލެބް" ގައި ސިކުނޑީގެ ހިނގުންތައް ބެލުމަށް ބޭނުންކުރާ އިލެކްޓްރޯ އެންސެފަލޯގްރާމް (އީއީޖީ) ބޭނުން ކުރާގޮތް ވަނީ ދައްކާލާފަ އެވެ.

އީއީޖީގެ އެހީގައި ބްރެއިން ވޭވްސް މޮނިޓާ ކުރާގޮތާއި، ނިއުރޯ ސައިންސް އަދި ސައިކޮލޮޖީގެ ދާއިރާއިން ދިރާސާގެ މައްޗަށް ބިނާކޮށް، ޑިޕްރެޝަން، އެންޒައިޓީ، އޯޓިޒަމް، އެޓެންޝަން ޑެފިސިޓް ޑިސްއޯޑާސް، އަލްޒައިމާސް، އަދި ޑިމެންޝިއާ ފަދަ ކަންތައްތަކަށް ފަރުވާ ދިނުމަށް ކުރިއެރުން ލިބިގެންދާނެ ކަމަށް ވިލާ ކޮލެޖުން ބުންޏެވެ.

ރަސްމިއްޔާތުގައި ވިލާ ކޮލެޖުން ނެރޭ ސައިކޮލޮޖީ ބުލެޓިންގެ ހަތަރުވަނަ، ފަސްވަނަ، އަދި ހަވަނަ އަދަދު ވެސް ވަނީ ނެރެފައެވެ.

އެ ބުލެޓިންގައި ވިލާ ކޮލެޖުގައި ތައުލީމު ހާސިލުކުރާ ދަރިވަރުން، ސައިކޮލޮޖީ އަދި ކައުންސެލިންގެ އެކި ދާއިރާއާ ގުޅޭގޮތުން ލިޔެފައިވާ ލިޔުންތައް ހިމަނާފައިވެ އެވެ.

އޭގެ އިތުރުން، ވިލާ ކޮލެޖުގައި ސައިކޮލޮޖީ އަދި ކައުންސެލިންގެ ދާއިރާއިން މިހާރު ކިޔަވާ ދަރިވަރުންގެ ޕެނަލް ޑިސްކަޝަން އަދި ރިސާޗް ޕްރެޒެންޓޭޝަންތައް ވެސް "ސައިކޮލޮޖީ ސިމްޕޯޒިޔަމް" ގައި ވަނީ ހުށަހަޅާފަ އެވެ.

ވިލާ ކޮލެޖުން ބުނީ އެފަދަ ޕެނަލް ޑިސްކަޝަން އަދި ރިސާޗް ޕްރެޒެންޓޭޝަންތައް ބޭއްވުމުގެ މަގުސަދަކީ ދާއިރާގެ އެކި މައުލޫއުތަކަށް، ވިލާ ކޮލެޖުގައި ކިޔަވާ ކުދިން އަހުލުވެރިކުރުމަށާއި، އެ ކުދިންގެ ގާބިލުކަން އިތުރުކުރުން ކަމަށެވެ.