ރައްޔިތުންގެ މަޖިލީހުގެ ރައީސް އަދި ޕީއެންސީގެ ޗެއާޕާސަން އަބްދުއްރަހީމް އަބްދުﷲ އަކީ ސިޔާސީ ލީޑަރެއްގެ ފަހަތުގައި އެއް އިރެއްގައި ވެސް އިހުލާސްތެރިކަމާއެކު ހުންނެވި ބޭފުޅެއް ނޫން ކަމަށް، ކުރީގެ ރައީސް އަބްދުﷲ ޔާމީން ވިދާޅުވެއްޖެ އެވެ.

ޕީއެންއެފް އޮފީހުގައި ރޭ ބޭއްވި ޖަލްސާގައި ޔާމީން ވިދާޅުވީ 2013 ވަނަ އަހަރު ބޭއްވި ރިޔާސީ އިންތިހާބުގައި ވެސް އަބްދުއްރަހީމް އެންމެ ފުރަތަމަ ހުންނެވީ ޖުމްހޫރީ ޕާޓީގެ ލީޑަރު ގާސިމް އިބްރާހީމް ވެރިކަމަށް ގެންނެވުމަށް ކަމަށެވެ. އަދި ޕީޕީއެމްގެ އެތެރޭގެ އިންތިހާބުގައި ނައިބު ރައީސްގެ މަގާމު ލިބިވަޑައި ނުގަތުމުން އަބްދުއްރަހީމް ހުންނެވީ މެލޭޝިއާއަށް ވަޑައިގެން އެ ގައުމުގައި ކަމަށް ޔާމީން ވިދާޅުވި އެވެ.

އަބްދުއްރަހީމް މެލޭޝިއާއިން ރާއްޖެ ވަޑައިގަތީ ކުރީގެ ރައީސް މައުމޫނު އަބްދުލް ގައްޔޫމް ވިދާޅުވެގެން ކަމަށް ޔާމީން ވިދާޅުވި އެވެ.

"އެގޮތަށް އުޅުއްވި ބޭކަލެއް އަބްދުއްރަހީމަކީ. އަބްދުއްރަހީމްއަކީ މާގިނަ ސިޔާސީ މަސައްކަތްތަކެއް ކޮށްގެން ގެނެސް އަޅުގަނޑު ގޮނޑީގައި ވެޑުވި މީހެއް ކަމަށް [ޓޫރިޒަމް މިނިސްޓަރު] ފައިސަލަށް ހީވާ ކަމަށް ވަންޏާ މިހާރު ދެން ބޭނުންވީ މި ކަހަލަ ކަންކަމުގައި ހަގީގަތް އޮޅުން ފިލުވައިދޭން. އަބްދުއްރަހީމް 2013 ގައި ހުރީ ރައީސް ޔާމީން ހޮވޭތޯއެއް ނޫން. އަބްދުއްރަހީމް މަސައްކަތް ކުރެއްވީ ގާސިމާއެކީ. "ގާސިމް ކެޓީމަ އެ ހިސާބުން ދެން އަބްދުއްރަހީމްގެ މަސައްކަތް ފެނިގެން ދިޔައީ،" ޔާމީން ވިދާޅުވި އެވެ.

"މި ކަހަލަ ވާހަކަ އަޅުގަނޑު މި ހުންނަނީ ނުދައްކަން. އަޅުގަނޑަށް މާޒީއަކީ މާޒީ. އެކަމަކު ގަބުރު ކޮނެގެން ކަށިނަގާ ހިސާބަށް ދާކަށް ވަންޏާ ދެން މީގެ ހަގީގަތްތައް އެނގެންވާނެ. އަދި މިކަހަލަ ލައްކަ ވާހަކަ ހުންނާނެ."

މި ސަރުކާރުގެ ދެ ބައިކުޅަ އެއްބައި އަބްދުއްރަހީމް އަށް ދެއްވާފައި އޮތުމަކީ ރައީސް މުއިއްޒުގެ ނުކުޅެދުއްތެރިކަން ކަމަށް ވެސް ޔާމީން ވިދާޅުވި އެވެ.

ފައިސަލް އަކީ ވެސް ޕީޕީއެމްގެ ހަރަކާތްތަކުގައި އުޅުއްވި ބޭފުޅެއް ނޫން ކަމަށް ވެސް ޔާމީން ވިދާޅުވި އެވެ.

އަބްދުއްރަހީމް ދާދި ފަހުން ވަނީ ޔާމީނަށް ވަރަށް ބޮޑަށް ފާޑުވިދާޅުވެފަ އެވެ. ރިޔާސީ ލޯންޗު "ފިނިފެންމާ" 2015 ވަނަ އަހަރު ގޮއްވާލުމުގެ އަޑީގައި ހުންނެވީ އެއިރުގެ ރައީސް އަބްދުﷲ ޔާމީން ކަމަށް ވެސް އަބްދުއްރަހީމް ތުހުމަތު ކުރެއްވި އެވެ. އަދި ޗައިނާ-މޯލްޑިވްސް ފްރެންޑްޝިޕް ބުރިޖުގެ އެއް ލޭނު މަދުވެގެން ރައީސް އަބްދުﷲ ޔާމީން، އޭރުގެ ހައުސިން މިނިސްޓަރު މުއިއްޒަށް ރޮވެންދެން ބަވައިލި ކަމަށް ވެސް އަބްދުއްރަހީމް ވަނީ ވިދާޅުވެފަ އެވެ.