މާލޭގައި މިއަދު އަލިފާނުގެ ހާދިސާއެއް ހިނގި ހެންވޭރު ސޯސަން މަގު ކޮޅުގައި ހުންނަ ގާމަގު ކެފޭގައި އަނެއްކާވެސް އަލިފާން ރޯވެގެން ފުލުހުންނާއި ސިފައިން ހަރަކާތްތެރިވާން ފަށައިފި އެވެ.

ފުލުހުން މީޑިއާތަކަށް ފޮނުވި މެސެޖެއްގައި ވަނީ މިފަހަރުވެސް ރޯވެފައިވަނީ އެތަނުގައި ކަން ކަށަވަރުކޮށްދީފަ އެވެ. ނަމަވެސް ތަފުސީލެއް ނުދެ އެވެ. އެތަނުގައި މިވަގުތު ހުޅު ހިފާފައި ހުރި މަންޒަރު ފެންނަ ވީޑިއޯއެއްވެސް ދަނީ ދައުރުވަމުންނެވެ.

"އަލިފާން ރޯވެ ފެތުރެމުން ނުދޭ. ގިނަ އަދަދަކަށް ޓިނާއި ލަކުޑި ން ހަދާފައިވާ ތަނަކަށްވާތީ ދަށުގައި ހުރި ލަކުޑި ތަކުގައި އަލިފާނުގެ އަސަރުހުރުމުން ދޭތެރެ ދޭތެރެއިން ހުޅުހިފާގޮތް ވަނީ. މިހާރު ނިއްވާލާފަ މޮނިޓަރު ކުރަމުންދަނީ," އެމްއެންޑީއެފް އިން ބުނެފައިވެ އެވެ.

ގާމަގު ކެފޭގައި ރޯވިއިރު އެތަނުގެ މަތީގައި ބިދޭސީ މަސައްކަތްތެރިންތަކެއް ދިރިއުޅޭ ކަމަށްވެ އެވެ. އެތަނުގައި މިއަދު ރޯވި އަލިފާންގަނޑު ނިއްވާލީ އަލިފާނުގެ ރިޕޯޓު ލިބުނުތާ ގަޑިއިރެއްހާއިރު ފަހުން 3:30 ހާއިރު ކަމަށް ސިފައިން މިއަދު ބުންޏެވެ.

މެންދުރު ރޯވި އަލިފާނުގެ ހާދިސާގައި ދިވެހި އަންހެނަކާއި ބިދޭސީ އަންހެނަކު އޭޑީކޭއަށް ގެންގޮސް ފަރުވާދިނެވެ. އެ ދެމީހުންވެސް މިހާރު ވަނީ ދޫކޮށްލާފަ އެވެ.

ނޭޝަނަލް ޑިޒާސްޓާ މެނޭޖްމަންޓު އޮތޯރިޓީން މިރޭ ބުނި ގޮތުގައި މިއަދުގެ އަލިފާނުގައި ޖުމްލަ 37 މީހަކު ވަނީ ހާލުގަ ޖެހިފަ އެވެ. އެ މީހުންނަށް އެ އޮތޯރިޓީން ދަނީ އެހީތެރިވަމުން ކަމަށްވެސް ބުންޏެވެ.