ޓެލެގުރާމު ޗެނަލްތަކެއް މެދުވެރިކޮށް ބަރަހަނާ މަންޒަރުތައް ފެންނަ ފޮޓޯތަކާއި ވީޑިއޯތައް ދައުރުކުރުން ހުއްޓުވުމަށް ފުލުހުން ކުރިއަށްގެންދާ ތަހުގީގު ތެރެއިން ކުޑަކުދިންގެ އޮރިޔާން ކާޑު ވިއްކުމަށް 43 ޗެނަލް ބޭނުންކުރިކަން އެނގިފައިވާ ކަމަށް އެ އިދާރާއިން ބުނެފި އެވެ.

ފުލުހުންގެ ސައިބާ ކްރައިމް ސެންޓަރުން ހިންގި އޮޕަރޭޝަނެއްގައި ތިން މީހަކު ހައްޔަރުކޮށް ފުލުހުން ވަނީ ތަހުގީގު ފަށައިފަ އެވެ. އެކަމާ ގުޅިގެން ނެރުނު ބަޔާނުގައި ފުލުހުން ވަނީ އޭގެ ތެރެއިން ބައެއް ޗެނަލްތަކުގައި ކުޑަކުދިންގެ އޮރިޔާން ކާޑު ދައުރުކުރި ކަން ހާމަކޮށްފަ އެވެ.

"ކުޑަކުދިންގެ އޮރިޔާން މަންޒަރު ދައްކުވައިދޭ ފޮޓޯއާއި ވީޑިއޯ ޕޯސްޓުކުރުމަށް 43 ޗެނަލް ހިންގާފައިވާކަން ވެސް ތަހުގީގަށް އެނގިފައިވޭ," ފުލުހުން ބުނެފައިވެ އެވެ.

އެކަމާ ގުޅިގެން ފުލުހުން އާންމުކުރި މައުލޫމާތުން އެނގޭ ގޮތުގައި ބަރަހަނާ ފޮޓޯތަކާއި ވީޑިއޯތައް ދައުރުކުރި 571 ޗެނަލެއް ވަނީ ފުލުހުންގެ ބެލުމުގެ ދަށަށް ގެނެސްފައިވެ އެވެ. އެ ޗެންލަތަކުން 241،651 ފޮޓޯއާއި 86،618 ވީޑިއޯ ދައުރުކޮށްފައި ވާއިރު އޭގެ ތެރޭގައި 18 އަހަރުން ދަށުގެ ކުޑަކުދިންގެ ފޮޓޯ އާއި ވީޑިއޯ ވެސް ހިމެނެ އެވެ.

މި މައްސަލައާ ގުޅިގެން ހައްޔަރުކުރީ އދ. މަހިބަދޫ، ބަހާރުގޭ، ޒުބައިރު އަލީ، 45، އާއި ދަފްތަރު ނަންބަރު ރސ14751، ނާސިފް އަލީ، 46، އަދި ކ. ކާށިދޫ، ސިލިންކޯ، އިސްމާއިލް ރަބީހު، 29، އެވެ.

މީސްމީޑިއާގައި މިގޮތަށް ފޮޓޯ އާއި ވީޑިއޯ ލީކްވެ ބްލެކްމޭލެގެ ޝިކާރައަކަށް ވެފައިވާ ފަރާތްތަކުން ފުލުހުންގެ ސައިބާ ކްރައިމް ސެންޓަރު ނަންބަރު 9136262 އަށް ގުޅާ މައުލޫމާތު ހިއްސާކުރުމަށް ފުލުހުން އެދެ އެވެ.