ދިރާގުން ބިޒްނަސް ސެންޓާ ކޯޕަރޭޝަން (ބީސީސީ) އިން އޮފީސް ހިންގަން ޖާގަ ދޫކުރާ "ސީޑް" އާއެކު ހަދާފައިވާ އެއްބަސްވުން އާކޮށްފި އެވެ.

ސީޑް ބައި ބީސީސީއިން ދިރާގާއެކު ހަދާފައިވާ އެއްބަސްވުމުގެ ދަށުން އެތަނުން ހަލުވި މިނެއްގައި ޑިޖިޓަލީ ކަނެކްޓްވާން ފުރުސަތު ފަހިކޮށްދެ އެވެ.

"ސީޑް ބައި ބީސީސީއާއެކު އެއްބަސްވުން އާކުރުމަކީ ލިބޭ އުފަލެއް. އޭގެއިން ދައްކުވަނީ ޑިޖިޓަލް ކޮމިއުނިޓީ އާއި ވިޔަފާރިތަކަށް ފަހިކޮށްދޭ ފުރުސަތު،" ދިރާގުގެ މެނޭޖާ ކޯޕަރޭޓް ސޯޝަލް ރެސްޕޮންސިބިލިޓީ، ބިޝާރާ ހަމީދު ވިދާޅުވި އެވެ.

ސީޑް ބައި ބީސީސީގެ ޑިރެކްޓާ، ކޮމާޝަލް، މުހައްމަދު ޖައުޝަން ވިދާޅުވީ ދިރާގުން ފަހިކޮށްދޭ ފުރުސަތުތަކަށް ޝުކުރު އަދާކުރާ ކަަމަށާއި، އެ ކުންފުންޏާއެކު ތަން ބޭނުންކުރާ ފަރާތްތަކަށް ފަސޭހަ ގޮތްތަކެއް ހަމަޖައްސައިދެވޭނެ ކަމަށެވެ.

ސީޑް ބައި ބީސީސީއިން ވިޔަފާރިތަކަށާއި، ފްރީލާންސްކޮށް މަސައްކަތްކުރާ ފަރާތްތަކާއި، ގޭގައި ތިބެގެން މަސައްކަތްކުރާ ފަރާތްތަކުގެ އިތުރުން ކިޔަވާކުދިންނަށް ޖާގަ ދޫކުރެ އެވެ.

ދިރާގުން އަންނަނީ ރާއްޖޭގެ ޑިޖިޓަލް ކޮމިއުނިޓީއަށް އެހީތެރިވުމަށް އެކި ގޮތްގޮތަށް މަސައްކަތްތައް ކުރަމުންނެވެ.