އޮގަސްޓް 29، ގަ މާފުށީ ޖަލުގައި ހުޅުވި "ސަގާފީ ގޯތި" ގައި ގައިދީން ހަދާ ތަކެތި އާންމުންނަށް ވިއްކަން ހުޅުވާލާނެ ކަމަށް މޯލްޑިވްސް ކަރެކްޝަނަލް ސާވިސް އިން ބުނެފި އެވެ.

"އަދަދު" އާ ވާހަކަ ދައްކަމުން ކަރެކްޝަންސްގެ މީޑިއާ އޮފިޝަލު އާމިނަތު ޔުސްރީ އަހްމަދު ވިދާޅުވީ މިހާރު ކުރިއަށްދަނީ "ސަގާފީ ގޯތި" ގެ މަސައްކަތްތަކަށް އެތަނުގައި މަސައްކަތް ކުރާ މުވައްޒަފުން ތަމްރީނުކުރުން ކަމަށެވެ.

އެ ތަމްރީނުތަކަށްފަހު ގައިދީންނަށް ވެސް ތަމްރީނު ފޯރުކޮށްދޭން ނިންމާފައިވާ ކަމަށް އޭނާ ވިދާޅުވި އެވެ.

"ސަގާފީ ގޯތީގައި ދައްކުވައިދޭ މަސައްކަތްތަކަށް އޮފިސަރުން ޓްރެއިންކޮށް، ދެން ފަށާނީ ގައިދީންނަށް ދަސްކޮށްދޭން. ގައިދީން ތައްޔާރު ކުރާ ތަކެތި ވިއްކުމަށް އާންމުންނަށް ހުޅުވާލާނެ،" ޔުސްރީ ވިދާޅުވި އެވެ.

ގައިދީން އުފައްދާ ތަކެތި ވިކުމުން އޭގެން ކޮންމެވެސް ޕަސެންޓެއް އާމްދަނީއެއްގެ ގޮތުގައި ލިބޭނެކަން ފާހަގަކުރައްވާ ޔުސްރީ އިތުރަށް ވިދާޅުވީ "ސަގާފީ ގޯތި" އަދި އާންމުންނަށް ހުޅުވާލާނެ ދުވަހެއް ސީދާ ބުނަން ނޭނގެ ކަމަށެވެ.

"ސަގާފީ ގޯތި" ހުޅުވައިދެއްވީ ރައީސް ޑރ. މުހައްމަދު މުއިއްޒުގެ އަނބިކަނބަލުން، ސާޖިދާ މުހައްމަދެވެ. މީގެ އިތުރުން ހޯމް މިނިސްޓަރު އަލީ އިހުސާން އާއި ގައުމިއްޔަތު މިނިސްޓަރު އާދަމް ނަސީރު އިބުރާހިމް ވެސް އެ ރަސްމިއްޔާތުގައި ބައިވެރިވެ ވަޑައިގެންނެވި އެވެ.

މަސައްކަތުގައި ގައިދީން ހޭދަކުރާ ދުވަސްތައް އެމީހުންގެ ހުކުމުން ކަނޑާލުމަށް ނިންމާފައިވާ ކަމަށް ރަސްމިއްޔާތުގައި ވާހަކަ ދައްކަވަމުން ހޯމް މިނިސްޓަރު އިހުސާން ވިދާޅުވެފައިވެ އެވެ.