ޑަބްލިން، އަަޔަލެންޑް (ސެޕްޓެމްބަރު 8) - ޔުއެފާ ނޭޝަންސް ލީގުގައި ރޭ ކުޅުނު މެޗުތަކުން ޖަރުމަނާއި ނެދަލެންޑްސް އަދި އިންގްލެންޑް މޮޅުވެ، މުބާރާތުގެ ފެށުން ރަނގަޅުކޮށްފި އެވެ.

ނޭޝަންސް ލީގުގެ، ލީގު ބީގެ ގްރޫޕް ތިނެއްގައި އިންގްލެންޑުން ކުޅުނީ އަޔަލެންޑާ އެވެ. ވަގުތީ ކޯޗު ލީ ކާސްލީގެ ފުރަތަމަ މެޗުގައި އަޔަލެންޑް އަތުން އިންގްލެންޑް ވަަނީ 2-0 އިން މޮޅުވެފަ އެވެ.

މި މެޗުގައި، އިންގްލެންޑްގެ ލަނޑުތައް ޖެހީ، ޑެކްލަން ރައިސް އާއި ޖެކް ގްރީލިޝް އެވެ. މި ދެ ކުޅުންތެރިންނަކީ ވެސް ކުުރިން އަޔަލެންޑަށް ކުޅެފައިވާ ކުޅުންތެރިންނެވެ. ލަނޑު ޖެހުމަށް ފަހު ރައިސް އުފާފާޅުކޮށްފައެއް ނުވެ އެވެ.

ނޭޝަންސް ލީގުގެ، ލީގު އޭގެ، ގްރޫޕް ތިނެއްގައި ޖަރުމަނުން ރޭ އަމިއްލަ ދަނޑުގައި ކުޅުނީ ހަންގޭރީއާ އެވެ. ޖަރުމަނު މޮޅުވީ 5-0 އިންނެވެ. ޖަރުމަނުން ފުރަތަމަ ހާފުގައި ލީޑުނެގީ، ނިކްލަސް ފުލްކްރޫގް ޖެހި ގޯލުންނެވެ. ދެ ވަނަ ހާފުގައި، ޖަމާލް މުސިއާލާ، ފްލޯރިއަން ވާޓްޒް އަދި އަލެކްސަންޑަ ޕަވްލޮވިޗް ލަނޑުތައް ޖަހާފައި ވަނިކޮށް، ކައި ހަވާޓްޒް ވަނީ، ޕެނަލްޓީ އަކުން ޖަރުމަނުގެ ފަހު ގޯލު ޖަހައިފަ އެވެ.

ޖަރުމަނާ އެއް ގްރޫޕެއްގައި އޮތް ނެދަލެންޑްސް އިން ވަނީ، 5-2 އިން ބޮސްނިއާ ބަލިކޮށްފަ އެވެ. ޖޯޝުއާ ޒާކްޒީގެ ގޯލުން ނެދަލެންޑްސް އިން ލީޑުނަގާފައިވަނިކޮށް، ބޮސްނިއާ އިން އެއްވަރުކުރީ، އެރްމެޑިން ޑެމިރޯވިޗް ޖެހި ގޯލުންނެވެ. ޓިޖާނީ ރައިންޑާސް އާއި ކޯޑީ ގަކްޕޯގެ ގޯލުތަކުން، ނެދަލެންޑްސް އިން ލީޑުފުޅާކުރިއިރު، އެޑިން ޖެކޯ ވަނީ ބޮސްނިއާ އަށް ލަނޑެއް ޖަހައިދީ އުންމީދެއް ހޯދައިދީފަ އެވެ.

ނެދަލެންޑްސްގެ ފަހު ދެ ގޯލު ޖެހީ، ވައުޓް ވެގްހޯސްޓް އާއި ޒަވީ ސިމޯންސް އެވެ.