ދިވެހިރާއްޖެ އާއި އިންޑިއާ ދެމެދު އަސްކަރީ ގުޅުން ވަރުގަދަކުރުމަށް ބާއްވަމުން އަންނަ ޑިފެންސް ކޯޕަރޭޝަން ޑައިލޮގުގެ ފަސް ވަނަ ބައްދަލުވުން އިންޑިއާގެ ނިއުދިއްލީގައި އިއްޔެ ބާއްވައިފި އެވެ.

މި ބައްދަލުވުމުގައި ރާއްޖޭގެ ފަރާތުން ބައިވެރިވެވަޑައިގެންނެވީ މޯލްޑިވްސް ނޭޝަނަލް ޑިފެންސް ފޯސް (އެމްއެންޑީއެފް) ގެ ޗީފް ޖެނެރަލް އިބްރާހިމް ހިލްމީ އެވެ. އަދި އިންޑިއާގެ ފަރާތުން ބައިވެރިވެވަޑައިގެންނެވީ އެ ގައުމުގެ ޑިފެންސް ސެކްރެޓަރީ ޝްރީ ގިރިދަރް އަރަމަން އެވެެ.

ޑިފެންސް މިނިސްޓްރީން ބުނި ގޮތުގައި މި ބައްދަލުވުމުގައި ދެ ގައުމުގެ ދިފާއީ އެއްބާރުލުމަށް ބޭނުންވާ ކަންކަމުގައި މަޝްވަރާ ކުރުމުގެ ފުރުސަތު ފަހިވެގެން ދިޔަ އެވެ. އަދި މިކަމަށް ބޭނުންވާ އެކިއެކި މަޝްރޫއުތައް ހިންގުން އަވަސް ކުރުމާ ބެހޭގޮތުން މަޝްވަރާކުރެވުނެވެ.

އޭގެ އިތުރުން މަތީ ފެންވަރުގެ އެކްސްޗޭންޖްތަކާއި ކެޕޭސިޓީ ޑިވެލޮޕްމަންޓް މަޝްރޫއުތައް ފަދަ އާންމު މަސްލަހަތު އޮތް އެހެން ދާއިރާތަކާ ބެހޭ ގޮތުންނާއި އަދި ކުރިއަށް އޮތް ދެ ގައުމުގެ އަސްކަރީ ތަމްރީނުގައި ބައިވެރިވުމާ ބެހޭގޮތުން ވެސް މަޝްވަރާކުރެވުނު ކަމަށް ޑިފެންސުން ބުންޏެވެ.

އެންމެ ފަހުން ޑިފެންސް ކޯޕަރޭޝަން ޑައިލޮގުގެ ބައްދަލުވުމެއް ބޭއްވީ މާޗް 19، 2023 ގަ އެވެ.