ވަޅި ހަރައި މަރާލާނެ ކަމަށް ބުނެ ލޯބިވެރިޔާއަށް އިންޒާރު ދިން ފިރިހެން ފުލުހެއްގެ މައްސަލަ ބަލަމުންދާ ކަމަށް ފުލުހުން ބުނެފި އެވެ.

ފުލުހުންގެ މީޑިއާ އޮފިޝަލަކު ބުނީ އެ މައްސަލަ ތަހުގީގު ކުރަމުން ދަނީ ފުލުހުންގެ ފެމިލީ އެންޑު ޗައިލްޑް ޕްރޮޓެކްޝަން ޑިޕާޓުމެންޓުން ކަމަށެވެ. އެ މައްސަލައަކީ ތަހުގީގު ކުރަމުންދާ މައްސަލައަކަށް ވާތީ އިތުރު ތަފުސީލެއް ފުލުހުން ނުދެ އެވެ.

އިންޒާރު ދިން ކަމަށް ބުނާ މީހާގެ އޯޑިއޯ ސޯޝަލް މީޑިއާގައި މިހާރު ދަނީ ދައުރުވަމުންނެވެ. އެ އޯޑިއޯއިން މީހަކާ މުހާތަބުކޮށް ވަރަށް ހުތުރު އެއްޗެހި ކިޔާ އަޑު އިވެ އެވެ. އަދި، ވަޅި ޖަހާނެ ކަމަށާއި ޒިންދަގީ ދުއްވާލާނެ ކަމަށް ބުނެ އެ ފިރިހެން މީހާ އިންޒާރުދޭ އަޑު އެ އޯޑިއޯއިން އިވެ އެވެ.

އިންޒާރު ލިބުނުު އަންހެން މީހާ ފޭސްބުކުގައި ކުރި ޕޯސްޓެއްގައި ބުނީ އޭނާ ތަހައްމަލު ކުރަމުން ދަނީ ނަފުސާނީ ބިރުވެރިކަމެއް ކަމަށާއި އޯޑިއޯއިން އަޑު އިވޭ ފުލުސް މީހާގެ ފުށުން މަރުގެ ހަމަލާއެއް ވެސް ލިބިފައިވާ ކަމަށެވެ.

"އަޅުގަނޑު މިއަދު ތަހައްމަލު ކުރަމުން މިދަނީ ނަފުސާނީ ބިރުވެރި ކަމެއް. މި މީހާގެ ފަރާތުން އަޅުގަނޑަށް މަރުގެ ހަމަލާ ހުރީ އައިސްފައި. އަޅުގަނޑަކަށް ނޭނގެ މިކަމުން އަޅުގަނޑު ރަނގަޅުވާން ނަގާނީ ކިތައް އަހަރުކަމެއް ވެސް،" އޭނާ ބުނެފައިވެ އެވެ.

އަންހެން މީހާއަށް ބިރުދެއްކި ފުލުސް މީހާއަކީ ކާކު ކަމެއް ފުލުހުން ހާމައެއް ނުކުރެ އެވެ.