ރިޔާދު, ސައުދި އަރަބިއްޔާ (ސެޕްޓެމްބަރު 3) - އެންމެ ރަނގަޅު ވަގުތު ޖެހުމުން ޕޯޗުގަލް ފުޓުބޯޅަ ޓީމަށް ކުޅުން ހުއްޓާލާނެ ކަމަށް ޕޯޗުގަލްގެ ތަރި، ކްރިސްޓިއާނޯ ރޮނާލްޑޯ ބުނެފި އެވެ.

ޕޯޗުގަލްގެ ގައުމީ ޓީމަށް 212 މެޗުން 130 ގޯލު ޖަހައިދިން ރޮނާލްޑޯ ވަނީ ނޭޝަންސް ލީގަށް ޕޯޗުގަލް އިން ނެގި ސްކޮޑުގައި ހިމަނައިފަ އެވެ.

މި އަހަރުގެ ޖަރުމަނުގައި ކުރިއަށްދިޔަ ޔޫރޯ ފުޓުބޯޅަ މުބާރާތުގައި ރޮނާލްޑޯގެ ފަރާތުން ދަށް ކުޅުމެއް ފެނިގެންދިޔުމާއެކު ގިނަ ބަޔެއްގެ ފާޑުކިޔުން ވަނީ އަމާޒުވެފަ އެވެ. އަދި އެ މުބާރާތަށް ފަހު, ޕޯޗުގަލްގެ ލެޖެންޑަރީ ޑިފެންޑަރު ޕެޕޭ ރިޓަޔާ ކުރުމުން ގިނަ ބަޔަކު ވަނީ ރޮނާލްޑޯ ރިޓަޔާ ކުރާނެ ކަމަށް ބުނެފަ އެވެ.

އެކަމަކު، ރޮނާލްޑޯ ބުނީ އޭނާ އަދި ޕޯޗުގަލް ޓީމުން ރިޓަޔާ ކުރަން ނުވިސްނާ ކަމަށެވެ. އަދި ވަގުތު ޖެހުމުން ޕޯޗުގަލް ޓީމުން ރިޓަޔާ ވާނެ ކަމަށް އޭނާ ބުންޏެވެ.

"އަހަރެން އަމިއްލަ ނަފުސަށް އަހަރެން އަށް ނުކުޅެވޭކަން އިހުސާސްވާ ދުވަހު, މީހަކު އަހަރެން ކައިރީ ނުބުންޏަސް ރިޓަޔާ ވާނަން. އެހެންވީމަ އަހަރެން އެ ވަގުތު ޖެހުމުން ރިޓަޔާވާން މިހުރީ ތައްޔާރައް އެއީ އަހަންނަށް ނަގަން އުނދަގޫ ނިންމުމަކަށް ނުވާނެ" ރޮނާލްޑޯ ބުންޏެވެ.

ރޮނާލްޑޯ ވަނީ މީގެ ކުރިން އޭނާ ކުޅުން ހުއްޓާލާނެ ދުވަހެއް ބުނަން ނޭނގޭ ކަމަށް ހާމަކޮށްފަ އެވެ. އެ ފަހަރު ރޮނާލްޑޯ ބުނީ އަދި ދެ ތިން އަހަރު އޭނާ އެންމެ މަތީ ލެވަލްގައި ކުޅޭނެ ކަމަށެވެ.

ދާދި ފަހުން ލޯންޗްކުރި ރޮނާލްޑޯގެ ޔޫޓިއުބް ޗެނަލްގައި ވާހަކަ ދައްކަމުން ބުނީ, ކެރިއަރު ނިންމާލުމުގެ ކުރިން 1000 ގޯލް ޖަހަން ބޭނުން ކަމަށް ބުނެފަ އެވެ. އަދި ޔޫރޯގައި ޕޯޗުގަލް ޓީމުގެ ފަރާތުން ފެނިގެންދިޔައީ އެވްރެޖް ކުޅުމެއް ކަމަށާއި، ޕޯޗުގަލް އަށް އެ އަށް ވުރެ ރަނގަޅަށް ކުޅެވޭނެ ކަމަށް ރޮނާލްޑޯ ގަބޫލުކުރެ އެވެ.