މީހަކަށް މަރުގެ އިންޒާރު ދިން ދެ މީހުން ހައްޔަރުކޮށް އެ މީހުންގެ ބަންދުގެ މުއްދަތަށް ފަސް ދުވަސް ޖަހައިފި އެވެ.

ޖަމާއަތް ހަދައިގެން މާރާމާރީ ހިންގުމާއި ބިރުދެއްކުމާއި އިންޒާރުދިން މައްސަލައިގައި ފަސް ދުވަހުގެ ބަންދުގެ މުއްދަތު ޖަހާފައި ވަނީ ވިކާޝް އަހުމަދު 25އ، ސޯސަންވިލާ، ގއ. ވިލިނގިލި އާއި އަހުމަދު އީމާން މުހައްމަދު 27އ، ޔާސްމީންވިލާ، ގދ. ފަރެސްމާތޮޑާ އެވެ.

އެ ދެ މީހުންގެ ބަންދަށް ފަސް ދުވަސް ޖަހާފައި ވަނީ ވަކީލެއްގެ ފުރުސަތަކަށް އެދިފައި ވާތީ ޝަރީއަތް ކުރުމާބެހޭ ޖިނާއީ އިޖުރާއަތު ގަވާއިދުގެ 14 ވަނަ މާއްދާގެ ދަށުންނެވެ. އެ ދެ މީހުންގެ ވެސް ހައްޔަރާއި ބަންދުގެ ލޮގު އެބައޮތް ކަމަށް ފުލުހުން ބުނެފައިވެ އެވެ.

އެ މީހުންނާ ދެކޮޅަށް ފުލުހުން ވަނީ ހެކީގެ ގޮތުގައި، އަނިޔާ ލިބުނު މީހާގެ ބަޔާނާއި ސީސީޓީވީ ފުޓޭޖުތަކާއި ސީސީޓީވީ ފުޓޭޖު ސްނެޕްޝޮޓުތަކުގެ އިތުުރުން ފުލުހުންގެ އިންޓެލިޖެންސް ރިޕޯޓު ހުށަހަޅައިފަ އެވެ.

އެ ހެކީގެ މައްޗަށް ބިނާކޮށް ކްރިމިނަލް ކޯޓުން ނެރުނު އަމުރުގައި ބުނެފައި ވަނީ އެމީހުންގެ ފަރާތުން މުޖުތަމައުގެ ސަލާމަތަށް ނުރައްކަލެއް ކުރިމަތިވެދާނެ ކަމަށެވެ.