ބިދޭސީންގެ ފީ އާއި ޖޫރިމަނާގެ ގޮތުގައި އެއް ލައްކަ އަށްވުރެ މަދުން ފައިސާ ދައްކަންހުރި ފަރާތްތަކުގެ ނަން އާންމުކޮށް ފިޔަވަޅު އެޅުމުގެ ކުރިން ހޯމްލޭންޑް ސެކިއުރިޓީ މިނިސްޓްރީން އިންޒާރެއް ނެރެފި އެވެ.

ސަރުކާރުގެ ގެޖެޓުގައި އެ މިނިސްޓްރީން އިއްޔެ ކުރި އިއުލާނެއްގައި ބުނީ ބީދޭސީންގެ ފީ އާއި ޖޫރިމަނާގެ ގޮތުގައި އެއްލައްކަ އަށްވުރެ މަދު އަދަދެއް ދައްކަން ޖެހޭ ފަރާތްތަކުން، މި މަހުގެ 16 ވަނަ ދުވަހުގެ ނިޔަލަށް ފައިސާ ދައްކާ ހަލާސް ނުކޮށްފިނަމަ، އެ ފަރާތްތަކުގެ މައުލޫމާތު އާންމުކޮށް އިޢުލާން ކުރުމާއިއެކު، އެކްސްޕެޓް ސިސްޓަމް މެދުވެރިކޮށް އެފަރާތްތައް ސަސްޕެންޑްކޮށް އައު ހުއްދަތައް ދޫކުރުން މެދުކަނޑާލާނެ ކަމަށެވެ.

އެ އިއުލާނުގައި އިތުރަށް ބުނެފައިވާ ގޮތުގައި ގިނަ އަދަދެއްގެ ވަޒީފާދޭ ފަރާތްތަކުން އެއްފަހަރާ އެންމެހާ ފީތަކާއި ޖޫރިމަނާތައް ދައްކާ ހަލާސްކުރުމަށް ދަތިވާކަމުގެ ޝަކުވާ މި މިނިސްޓްރީ އަށް ވަނީ ލިބިފަ އެވެ. އެހެންކަމުން، މިއަދުން ފެށިގެން އެކްސްޕެޓް ސިސްޓަމް މެދުވެރިކޮށް ވަކި މުއްދަތެއްގެ ތެރޭގައި ދައްކަންޖެހޭ ފައިސާ ދައްކާ ހަލާސްކުރުމަށް ސަރުކާރާއެކު އެއްބަސްވުމަކަށް އައުމުގެ ފުރުސަތު، ފައިސާ ދައްކަން ދަތިވާ ފަރާތްތަކަށް ލިބޭނެ ކަމަށް އިއުލާނުގައި ބުނެފައިވެ އެވެ.

ބިދޭސީންނާ ގުޅޭ ފީ އާ ޖޫރިމަނާ ނުދައްކާ، ފަރާތްތަކުގެ ތެރެއިން އެއް ލައްކަ ރުފިޔާ އަށްވުރެ އިތުރަށް ނުދައްކާ ފަރާތްތައް މިދިޔަ ޖުލައި މަހުގެ ފަހުކޮޅު މިނިސްޓްރީން އިއުލާނު ކުރި އެވެ. ޖުމްލަ 636.5 މިލިއަނަށްވުރެ ރުފިޔާ، ނުދައްކާ ހުރި 1،026 ފަރާތެއްގެ މައުލޫމާތު އޭރު އާންމު ކުރުމާއި ގުޅިގެން، ހޯމްލޭންޑް މިނިސްޓްރީ އަށް ބައެއް ފަރާތްތަކުގެ ނުރުހުން އަމާޒުވި އެވެ.

މިނިސްޓްރީން ބުނެފައިވާ ގޮތުގައި އެ ލިސްޓު އާންމު ކުރުމުގެ ނަތީޖާއެއްގެ ގޮތުން 182.9 މިލިއަން ރުފިޔާ ހޯދިފައިވެ އެވެ.