ޓޭބަލް ޓެނިސް އެސޯސިއޭޝަން ކަޕްގެ ޑިވިޝަން އެކެއްގެ ފިރިހެން ސިންގަލްސް ޗެމްޕިއަންކަން މޫސާ މުންސިފް އަހުމަދު ހޯދިއިރު، އަންހެން ޗެމްޕިއަންކަން، ފާތިމަތު ދީމާ އަލީ ހޯދައިފި އެވެ.

ދީމާ، އެސޯސިއޭޝަން ކަޕްގެ ތަށި ދިފާއުކުރިއިރު، މިދިޔަ އަހަރު ފިރިހެން ޑިވިޝަން ކާމިޔާބުކުރި މުހައްމަދު ޝައްފާން އިސްމާއިލް، ގައުމުގައި ނެތުމުން މި ފަހަރުގެ މުބާރާތުގައި ނުކުޅެ އެވެ.

ޝައްފާން މިދިޔަ އަހަރު ތަށި ހޯދީ ފައިނަލުގައި މުންސިފް ބަލިކޮށްފަ އެވެ.

މިއަދު ހަވީރު ކުޅުނު ފައިނަލްގައި މުންސިފް ވަނީ ފޯރިގަދަ މެޗަކަށް ފަހު، ސްރީލަންކާގެ ރަސިކާ މަނޯޖް އަތުން 4-3 އިން މޮޅުވެފަ އެވެ. މެޗުގައި، ފުރަަތަމަ ސެޓު، މަނޯޖް 11-09 އިން ގެންގޮސްފައިވަނިކޮށް، މުންސިފް ވަނީ ދެން ކުޅުނު ތިން ސެޓު، 08-11، 08-11 އދި 11-07 އިން ގެންގޮސްފަ އެވެ. އެކަމަކު، މަނޯޖް ވަނީ ދެން ކުޅުނު ދެ ސެޓު، 11-06 އާއި 11-04 އިން ގެންގޮސް، ނަތީޖާ ނެރޭ ސެޓަކަށް މެޗު ގެންގޮސްފަ އެވެ. މުންސިފް އެ ސެޓުން ކުރިހޯދީ 11-13 އިންނެވެ.

އަންހެން ޑިވިޝަން ފައިނަލުގައި ދީމާ ވަނީ، 4-0 އިން ރަފާގެ މައްޗަށް ކުރިހޯދައިފަ އެވެ. ދީމާ ސެޓުތައް ގެންދިޔައީ، 12-10، 11-07، 11-03 އަދި 11-06 އިންނެވެ.

ދީމާ ވަނީ މި ފަހަރުގެ މުބާރާތުގެ 19 އަހަރުން ދަށުގެ އަންހެން ސިންގަލްސް ޗެމްޕިއަންކަމާއި 19 އަަހަރުން ދަށުގެ މިކްސް ޑަބަލްސް ޗެމްޕިއަންކަން، އަހްޔާރު އަހުމަދު ހާލިދުއާ އެއް ޕެއާ އަކަށް ކުޅެގެން ހޯދައިފަ އެވެ. އެކަމަކު، ދީމާ އާއި އަހްޔާރު އަށް ޑިވިޝަން އެކެއްގެ މިކްސް ޑަބަލްސް އިން ލިބުނީ ރަނަރަޕް އެވެ.

ނަވާރަ އަހަރުން ދަށުގެ ފިރިހެން ސިންގަލްސް ޗެމްޕިއަންކަން ހޯދީ އަހްޔާރު އެވެ. އަދި އަހްޔާރު ވަނީ ޑިވިޝަން އެކެއްގެ ފިރިހެން ޑަބަލްސްގެ ރަނަރަޕް ހޯދައިފަ އެވެ. އެއީ، އިބްރާހިމް އައުޒަމް އަޒީމްއާ އެއް ޕެއާ އަކަށް ކުޅެގެންނެވެ.

މުންސިފް ވަނީ، ފިރިހެން ސިންގަލްސްގެ އިތުރުން، ޑިވިޝަން އެކެއްގެ ފިރިހެން ޑަބަލްސް ޗެމްޕިއަންކަން، އަލީ އާދަމް މަނިކް (އަލިބެ)އާ އެއް ޕެއާ އަކަށް ކުޅެގެން ހޯދައިފަ އެވެ. އަދި މިކްސް ޑަބަލްސް ޗެމްޕިއަންކަން ލިބުނީ މުންސިފް އާއި ރަފާގެ ޕެއާ އަށެވެ.

އުމުރުފުރާ ކެޓަގަރީތަކަށް ބަލާއިރު، 13 އަހަރުން ދަށުގެ ފިރިހެން ސިންގަލްސް ޗެމްޕިއަންކަން ހޯދި، މުހައްމަދު ހަލަފް ރާފިއު ވަނީ 15 އަހަރުން ދަށުގެ ފިރިހެން ޑަބަލްސް ޗެމްޕިއަންކަން، އުމެއިރު މުހައްމަދު މުއިއްޒުއާ އެއް ޕެއާ އަކަށް ކުޅެގެން ހޯދައިފަ އެވެ.

ފަނަރަ އަހަރުން ދަށުގެ ފިރިހެން ސިންގަލްސް ޗެމްޕިއަން، އުމެއިރު ވަނީ އެ އުމުރުފުރާގެ ޑަބަލްސްގެ އިތުރުން، 17 އަހަރުން ދަށުގެ ފިރިހެން ޑަބަލްސް ޗެމްޕިއަންކަން، ޒީކް ހަސަން ލަތީފްއާ އެއް ޕެއާ އަކަށް ކުޅެެގެން ހޯދައިފަ އެވެ. އަދި 17 އަހަރުން ދަށުގެ މިކްސް ޑަބަލްސްގެ ރަނަރަޕްކަން ހޯދީ އުމެއިރު އާއި މިޝްކާ މުހައްމަދު އިބްރާހިމްގެ ޕެއާ އެވެ.

ތޭރަ އަހަރުން ދަށުގެ އަންހެން ސިންގަލްސް ޗެމްޕިއަންކަން ހޯދި އައިޝަތު އަލްސާ ނާފިޒު ވަނީ 15 އަހަރުން ދަށުގެ އަންހެން ސިންގަލްސް ޗެމްޕިއަންކަން ވެސް ހޯދައިފަ އެވެ. އަދި 15 އަހަރުން ދަށުގެ އަންހެން ޑަބަލްސް ޗެމްޕިއަންކަން ހޯދީ އަލްސާ އާއި އައިޝަތު މަލަކް މުއިއްޒުގެ ޕެއާ އެވެ.

ސަތާރަ އަހަރުން ދަށުގެ ފިރިހެން ސިންގަލްސް ޗެމްޕިއަން، ޒީކް ވަނީ އެ އުމުރުފުރާގެ ފިރިހެން ޑަބަލްސް ޗެމްޕިއަންކަމާއި މިކްސް ޑަބަލްސް ޗެމްޕިއަންކަން ހޯދައިފަ އެވެ، މިކްސް ޑަބަލްސް ކުޅުނީ މިންހާ މަހުޖޫބު ޝުޖާއުއާ އެއް ޕެއާ އަށެވެ. އަދި ޒީކް ވަނީ މިންހާއާ އެއް ޕެއާ އަށް ކުޅެގެން، 19 އަހަރުން ދަށުގެ މިކްސް ޑަބަލްސްގެ ރަނަރަޕް ހޯދުމުގެ އިތުރުން 19 އަހަރުން ދަށުގެ ފިރިހެން ސިންގަލްސްގެ ރަނަރަޕްކަން ހޯދައިފަ އެވެ.

ޑިވިޝަން ދޭއްގެ ފިރިހެން ސިންގަލްސް ޗެމްޕިއަނަކީ، އަޒީމް ޝިހާމް އެވެ. އެ ޑިވިޝަނުގެ އަންހެން ޗެމްޕިއަންކަން، ފާތިމަތު ފަޒްލާ ރަޝީދު ހޯދިއިރު، ވެޓެރަންސް ޗެމްޕިއަނަކީ، އަލިބެ އެވެ.