ރާއްޖޭގެ ފުޓްބޯޅައިގެ ހާލަތު އެނގޭ ކަމަށާއި ކަންކަން ރަނގަޅުކުރަން ބޭނުންވަނީ ސަރުކާރާއި ފުޓްބޯޅަ ހިންގަން ތިބި ފަރާތްތަކުގެ ސަޕޯޓް ކަމަށް މާޒިޔާ ސްޕޯޓްސް އެންޑް ރެކްރިއޭޝަންގެ ކޯޗަކަށް މިއަދު ހަމަޖެއްސި ޔުއެފާ ޕްރޯ ލައިސަންސް ކޯޗު ޑްރަގަން ޑުކަނޯވިޗް ބުނެފި އެވެ.

މާޒިޔާ އިން އާ ކޯޗެއްގެ ދަށުން މަސައްކަތް މި ފެށީ، އޮކްޓޫބަރު މަހު ފަހުކޮޅުގައި ކުރިއަށްދާ އޭއެފްސީ ޗެލެންޖް ލީގުގައި ވާދަކުރުމަށެވެ.

އެ ގޮތުން، އަންނަ، އޮކްޓޫބަރު 26 ގައި ފަށަން ނިންމާފައިވާ އޭއެފްސީ ޗެެލެންްޖް ލީގުގައި މާޒިޔާ ހިމެނެނީ ނިސްބަތުން ވަރުގަދަ ގްރޫޕެއްގަ އެވެ. މާޒިޔާ ހިމެނޭ ގްރޫޕްގެ މެޗުތައް ސެންޓްރަލައިޒްކޮށް ކުޅޭނީ ކުވެއިތުގަ އެވެ. މާޒިޔާގެ ގްރޫޕްގައި އޮތީ ކުވެއިތުގެ އަލް އަރަބީ ސްޕޯޓްސް ކްލަބް، ތުރުކުމެނިސްތާންގެ އެފްސީ އަކްރަޑަގް އަދި ކިރްގިސްތާން އެފްސީ އަބްދީޝް އާޓާ އެވެ.

ފަސް ގައުމުގައި ކޯޗިންގެ 18 އަހަރުގެ ތަޖުރިބާ ހާސިލްކޮށްފައިވާ ޑްރަގަން، އަކީ މާޒިޔާގެ ކޯޗުކަމާ ހަވާލުވި ހަ ވަނަ ބިދޭސީ ކޯޗެވެ. އޭނާ، މާޒިޔާއާ ހަވާލުވިއިރު، ރާއްޖޭގެ ފުޓްބޯޅައިގައި ކުރިއަށް މި ދަނީ ޓްރާންސިޝަން މުއްދަތެކެވެ. ފީފާގެ ނިންމުންތަކާ އެކު، އެފްއޭއެމް ހިންގުން ނޯމަލައިޒިން ކޮމިޓީއެއްގެ ދަށުން ކުރިއަށްދާއިރު، ރާްއްޖޭގެ ޑޮމެސްޓިކް ފުޓްބޯޅަ ސީޒަން ފަށާނެ އިރެއް ނޭނގެ އެވެ.

މާޒިޔާއާ އެކު، މިއަދު ކޯޗުކަމުގެ އެއްބަސްވުމުގައި ސޮއިކުރުމަށް ފަހު، ނޫސްވެރިންގެ ސުވާލުތަކަށް ޖަވާބު ދެމުން، ޑްރަގަން ބުނީ، މިއީ ކޯޗިން ކެރިއަރުގައި ވެސް އެންމެ ޗެލެންޖް ބޮޑު މަސައްކަތަށްވާނެ ކަމަށެވެ.

"އަހަރެން ދުވަހަކު ވެސް މި ކަހަލަ ހާލަތެއްގައި މަސައްކަތެއް ނުކުރަން. އެކަމަކު، އަހަންނަށް އަމިއްލަ ނަފްސަށް އިތުބާރު އެބައޮތް. އަހަންނަށް އެބަފެނޭ މި ކްލަބްގެ މެނޭޖްމަންޓުން ކަންކަން ރަނގަޅުކުރަން މަސައްކަތްކުރާ މިންވަރު،" ބަންގްލަދޭޝާއި އިންޑޮނޭޝިއާގައި ކޯޗިން މަސައްކަތްކޮށްފައިވާ ޑްރަގަން ބުންޏެވެ.

"އަހަރެން، ރާއްޖެ އައީ މި ގައުމުގެ ފުޓްބޯޅައިގެ ހާލަތު އެނގިހުރެ، މި ހާލަތުގައި ވެސް އެންމެންގެ ސަޕޯޓާ އެކު، މާޒިޔާގެ ތާރީހުގައި ލިޔެވޭނެ އަދި މި ގައުމުގެ ފުޓްބޯޅަ ތާރީހަށް ޓަކައި ވެސް ތަފާތު މަސައްކަތެއް ކުރަން،"

މާޒިޔާ އަކީ އޭޝިއާގެ ގިނަ ބައެއް ދަންނަ، ރާއްޖޭގެ ބޮޑު ކްލަބެއް ކަމަށް ޑްރަގަން ވަނީ ބުނެފަ އެވެ. އަދި ރާއްޖޭގެ ޗެމްޕިއަންކަން، ޖެހިޖެހިގެން ހަތަރު ފަހަރަށް ހޯދާފައިވާ މާޒިޔާ އަށް މިހާތަނަށް ނުކުރެވި އޮތް ކަމަކީ، އޭއެފްސީ މުބާރާތެއްގެ އަނެއް ބުރަށް ދިއުން ކަމަށާއި އެކަން ކުރަން އޭނާ އަށް ވެސް ހާއްސަ "މޯޓިވޭޝަނެއް" އެބަހުރި ކަމަށް ޑްރަގަން ވަނީ ބުނެެފަ އެވެ.

އެކަމަކު، އެ ވަރުގެ ކަމެއް ހާސިލްކުރަން ބަލާއިރު އޮތް ޗެލެންޖް ވެސް ކުޑައެއް ނޫން ކަމަށް ޑްރަގަން ގަބޫލުކުރެ އެވެ.

"ޔަގީންކަމެއް، އަހަރެމެން ކުރިމަތީގައި މި އޮތް ޗެލެންޖް، ވާދަކުރަން ޖެހޭ ޓީމުތަކަށް ބަލާއިރު، އެ މީހުން އަންނާނީ ލީގުތަކުގައި ކުޅެފައި، މެޗުތަކެއް ކުޅެފައި. އެ މީހުން ތައްޔާރުވެފައި އޮންނާނީ. އަހަރެމެން ވެސް ޖެހޭނެ ވީ ގޮތެއް ބަލައިގެން ވިޔަސް ތައްޔާރުވެވޭތޯ ބަލަން. އަހަންނަށް އެބަފެނޭ، މެނޭޖްމަންޓުން މެޗުތަކެއް ލިބޭތޯ އެ ކުރާ މަސައްކަތް މި ކަންކަމަށް ސަޕޯޓް ދޭންވީ، ސަރުކާރުންނާއި ފެޑެރޭޝަނުން ވެސް، އެންމެން އެކުގައި ނޫނީ މި ކަމެއް ނުކުރެވޭނެ،" ޑްރަގަން ބުންޏެވެ.

ޔޫރަޕުން ބޭރުގައި ޑްރަގަންގެ ފުރަތަމަ ތަޖުރިބާ އައި ބަންގްލަދޭޝްގަ އެވެ. އެ ގޮތުން،، 2013-2014 ވަނަ އަހަރުގެ ސީޒަނުގައި، ޑުކަނޯވިޗް ވަނީ ބަންގްލަދޭޝްގެ ޝެއިހް ރަސެލް އެފްސީގައި ކޯޗުކަން ކޮށްފަ އެވެ. ޝެއިހް ރަސެލް ޓީމަށް ކޯޗުކޮށްދިން ފުރަތަމަ ބިދޭސީ ކޯޗު، ޑްރަގަން، ވަނީ އެ ޓީމަށް ބަންގްލަދޭޝްގެ ޕްރެޒިޑެންޓްސް ކާމިޔާބުކޮށް، އޭއެފްސީ ކަޕަށް ގެންގޮސްދީފަ އެވެ.

ޑްރަގަންގެ ކޯޗިން ކެރިއަރުގައި އެންމެ ގިނަ ތަޖުރިބާތަކެއް ކޮށްފައިވަނީ އިންޑޮނޭޝިއާގަ އެވެ. އޭނާ ވަނީ، 2016-2017 ވަނަ އަހަރު އިންޑޮނޭޝިއާ ކްލަބް، ބޯނެއޯ ސަމަރިންޑާ އަށް ކޯޗުކޮށްދިނުމުގެ އިތުރުން، 2019-2021 އަށް އިންޑޮނޭޝިއާގެ ކްލަބް، ޕީއެސްއައިއެސް ސަމަރަންގެ ޓެކްނިކަލް ޑިރެކްޓަރު ކަމާއި ކޯޗުކަން ކޮށްފަ އެވެ. އަދި 2022 ވަނަ އަހަރު ވެސް އެ ޓީމުގައި ކޯޗިންގެ މަސައްކަތްކޮށްފައިވެ އެވެ.

ރާއްޖެ އަކީ ފުޓްބޯޅައިގެ ހުނަރު އޮތް ގައުމެއްކަން އެނގޭ ކަމަށާއި މާޒިޔާގެ މެޗުތަކުގެ ވީޑިއޯ އިން ވެސް އެކަން ޔަގީންކުރެވިފައިވާ ކަމަށެވެ. ދެން، ބޭނުންވަނީ ރަނގަޅު ލީގެއް އޮތުން ކަމަށާއި އެ ގޮތަށް ނޫނީ، ރާއްޖޭގެ ގައުމީ ޓީމަކަށް ވެސް ބޭނުންވާ ލެވަލަށް ނުދެވޭނެ ކަމަށް ޑްރަގަން ވަނީ ބުނެފަ އެވެ.

ޑްރަގަންއާ އެކު، މާޒިޔާ އިން ކުރިއަށް އޮތް ދުވަސްތަކުގެ ތެރޭގައި ޕްރީ ސީޒަން ޕްރެކްޓިސް ފަށާނެ އެވެ.