ވިލާ ކޮލެޖަށް ވަޑައިގެންނެވި ފުރަތަމަ ފުލްބްރައިޓް ސްކޯލާ އަދި އެސޯސިއޭޓް ޕްރޮފެސާ ޑރ. ޗާލްސް ވެނޯވާއަށް ރަސްމީކޮށް މަރުހަބާ ކިޔައިފި އެވެ.

ވިލާ ކޮލެޖުގައި ބޭއްވި ރަސްމިއްޔާތުގައި ވިލާ ކޮލެޖުގެ އިސްބޭފުޅުންނާއި އަދި ޔޫއެސް މިޝަން ޓު ދި މޯލްޑިވްސްގެ ފަރާތުން ޑެޕިއުޓީ ޗީފް އޮފް މިޝަން އަނަންދް ކްރިޝްނާ، ޕަބްލިކް އެފެއާޒް އޮފިސާ ޝެރިލް ނީލީ އަދި ޕަބްލިކް އެންގޭޖްމަންޓް ސްޕެޝަލިސްޓް އާމިނަތު ޝިޒްލީން ބައިވެރިވެ ވަޑައިގެންނެވި އެވެ.

މިނިސްޓްރީ އޮފް ފޮރިން އެފެއާޒްގެ ފަރާތުން ސީނިއާ އަންޑާ ސެކްރެޓަރީ ހަސަން ހުސައިން ޝިހާބު (ޔޫރަޕް، އެމެރިކާސް އަދި އޯޝަނިއާ ޑިޕާޓްމަންޓް) އާއި އެސިސްޓެންޓް ޑިރެކްޓާ ފާތިމަތު ޒެއިނާ އަބްދުﷲ ސައީދު (ޔޫރަޕް، އެމެރިކާސް އަދި އޯޝަނިއާ ޑިޕާޓްމަންޓް) ބައިވެރިވެ ވަޑައިގެންނެވި އެވެ.

އެސޯސިއޭޓް ޕްރޮފެސާ ޑރ. ޗާލްސް ގެ ތައާރަފްއެއް ދެއްވުމަށްފަހު އެމަނިކުފާނު މަސައްކަތް ކުރިއަށް ރޭވިފައިވާ ގޮތުގެ ތަފްސީލް ވިލާ ކޮލެޖުގެ ސްކޫލް އޮފް ސައިކޮލޮޖީ ގެ ހެޑް އޮފް ސްކޫލް ޑރ. އާއިޝަތު ނަޝީދާ އެ ރަސްމިއްޔާތުގައި ދެއްވި އެވެ.

އެއަށް ފަހު ޑރ. ޗާރލްސްއަށް މަރުޙަބާ ދެންނެވުމުގެ ގޮތުން ވާހަކަފުޅު ދެއްކެވީ ޑރ. އަހުމަދު އަންވަރެވެ. އޭނާގެ ވާހަކައިގައި ވިލާ ކޮލެޖުގައި ރިސާޗް ކަލްޗާއެއް ގާއިމް ކުރުމަށް ކުރެވެމުންދާ މަސައްތަކަށް ވެސް އަލިއަޅުއްވާލެއްވި އެވެ.

އެ ރަސްމިއްޔާތުގައި ޔޫއެސް މިޝަންގެ ފަރާތުން ޑެޕިއުޓީ ޗީފް އަނަންދް ކްރިޝްނާ ދެއްކެވި ވާހަކަފުޅުގައި ވިލާ ކޮލެޖު ޓީމަށް ޝުކުރު އަދާކުރައްވައި، ރަސްމިއްޔާތަށް ދައުވަތު ދެއްވި ކަމަށްޓަކައި ޝުކުރު އަދާކުރައްވައި، ބައިނަލްއަގްވާމީ އެއްބާރުލުމާއި ޕާޓްނަޝިޕްތަކާއެކު ކުރިއަށް ގެންދެވޭނެ ގޮތްތަކާ ބެހޭ ގޮތުން މަޝްވަރާ ކުރެއްވި އެވެ.

ވިލާ ކޮލެޖަށް ވަޑައިގެންނެވި ފުރަތަމަ ފުލްބްރައިޓް ސްކޯލާ ޕްރެސަރަށް ހޫނު މަރުހަބާއެއް ދެންނެވުން -- ފޮޓޯ: ވިލާ ކޮލެޖު

ރަސްމިއްޔާތުގައި ބައިވެރިންނާއި މުހާތަބުކޮށް ޑރ. ޗާލްސް އިލްމާއި އާ އުފެއްދުންތައް ކުރިއެރުވުމުގައި ދިރާސާއިން އަދާކުރާ މުހިންމު ދައުރުގެ ވާހަކަ ފާހަގަކުރެއްވި އެވެ. އަދި ދިރާސާގެ ހޯދުންތައް ފެތުރުމަކީ ހަމަ އެހާމެ މުހިންމު ކަމެއްކަން ފާހަގަކުރައްވައި ވިސްނުންތަކާއި ހޯދުންތައް ހިއްސާކުރުމަކީ ޖަމާއަތުގައި ކުރިއެރުމާއި ތަރައްގީއަށް މަގުފަހިވާ ކަމެއް ކަމަށް ވިދާޅުވި އެވެ.

އެ ރަސްމިއްޔާތުގައި ޑރ. ޗާލްސް ވެނޯވާއަށް ވިލާކޮލެޖުގެ އެޖަންކްޓް އެސޯސިއޭޓް ޕްރޮފެސާގެ މަގާމު ދެއްވުން ވެސް އޮތެވެ. މަގާމުގެ ލިޔުން ހަވާލުކޮށް ދެއްވީ ޑރ. އަލީ ނަޖީބު އެވެ.

އެސޯސިއޭޓް ޕްރޮފެސަރ ޑރ. ޗާރލްސް ވެނޯވާއަކީ އެމެރިކާގެ ސަރުކާރުން ހިންގާ ފުލްބްރައިޓް ސްކޯލާޝިޕް ޕްރޮގްރާމުގެ ދަށުން ރާއްޖެއަށް ވަޑައިގެންނެވި ބޭފުޅެކެވެ. މިއީ އެ ޕްރޮގްރާމް ގެ ދަށުން ވިލާ ކޮލެޖަށް ބޭފުޅަކު ވަޑައިގެންނެވި ފުރަތަމަ ފަހަރެވެ.

ޑރ. ޗާލްސް ވިލާ ކޮޖެގައި ހަތަރު މަސް ދުވަހުގެ މުއްދަތަށް މަސައްކަތް ކުރައްވާނެ އެވެ. އެމަނިކުފާނުގެ މަސައްކަތް ހާއްސަ ކުރައްވާނީ ރިސާޗް، ކަރިކިއުލަމް އަދި ޕެޑަގޮޖީގެ ދާއިރާއަށެވެ.