މުމްބާއި، އިންޑިއާ (އޮގަސްޓް 27) - އަންނަ އޮކްޓޫބަރު މަހު، ބަންގްލަދޭޝްގައި ބާއްވަން ޝެޑިއުލްކޮށްފައި އޮތް އައިސީސީ ވިމެންސް ޓީ20 ވޯލްޑް ކަޕް، ޔުނައިޓެޑް އަރަބް އެމިރޭޓްސް (ޔޫއޭއީ) އަށް ބަދަލުކޮށްފައިވާއިރު، އެ މުބާރާތުގެ ޝެޑިއުލަށް ވެސް ބަދަލު ގެނެސްފި އެވެ.

ބަންގްލަދޭޝް މި ވަގުތު ދާހިލީ ހަމަނުޖެހުމަކަށް ގޮސްފައިވާއިރު، މި މަހު ކުރީކޮޅުގައި، ބަންގްލަދޭޝްގައި ކުރިއަށްދާ މުޒާހަރާތައް ހޫނުވެ، ބޮޑުވަޒީރު ޝެއިހް ހަސީނާ އިސްތިއުފާ ދެއްވައި، އެ ގައުމު ދޫކުރައްވައި ފިއްލެވި އެވެ.

ކުރިއަށް އޮތް މަސްތަކުގައި ބަންގްލަދޭޝްގެ ހާލަތު ބަދަލުވާނެ ގޮތެއްގެ ސީދާ މަންޒަރު ސާފުނުވާތީ، އިންޓަނޭޝަނަލް ކްރިކެޓް ކައުންސިލް (އައިސީސީ) އިން މުބާރާތުގެ ހޯސްޓް ބަދަލުކޮށް، މި މަހު 20 ވަނަ ދުވަހު އިއުލާނުކުރީ، ޔޫއޭއީގައި މުބާރާތް ބާއްވަން ނިންމާފައިވާ ކަމަށެވެ.

ދުނިޔޭގެ ގަދަ 10 ޓީމުގެ މެދުގައި، އޮކްޓޫބަރު 3 އިން 20 އަށް ކުރިއަށްދާ ޓީ20 ވިމެންސް ވޯލްޑް ކަޕްގެ މެޗުތައް މިހާރު ކުޅެނީ ދެ ދަނޑެއްގަ އެވެ. އެއީ، ދުބާއީ ސްޓޭޑިއަމާއި އާއި ޝާރުޖާ ސްޓޭޑިއަމްގަ އެވެ. ދެ ދަނޑެއްގައި މެޗުތައް ކުޅުމުގެ ގޮތުން ޝެޑިއުލް ރިވައިސްކުރިއިރު، ހަތް މެޗެއް ކުޅޭ ތާރީހަށް ބަދަލު ގެނެސްފައިވެ އެެވެ.

ލަންކާ ނޫނީ އިންޑިއާގައި މުބާރާތް ބާއްވަން ވެސް ވާހަކަ ދެކެވުނެވެ. އެކަމަކު، އެ ދެ ގައުމުން ވެސް ފުރުސަތުގެ ބޭނުންހިފަން ބޭނުމެއް ނުވި އެވެ.