ރާއްޖޭގައި ނަސާރާ ދީން ފެތުރުމަށް މަސައްކަތް ކުރި ކަމަށް ކަނޑަައަޅައި، ކުރީގެ ރައީސް މައުމޫންގެ ވެރިކަމުގައި ރާއްޖެއަށް ނާދެވޭ ގޮތަށް ޑީޕޯޓު ކޮށްލި އިނގިރޭސިވިލާތުގެ ރައްޔިތެއް ކަމަށްވާ ޑޭވިޑް ހާޑިންހަމްއާ އެކު ނަގާފައިވާ ފޮޓޯގެ ހަގީގަތް ރައީސް، ޑރ. މުހައްމަދު މުއިއްޒު ވިދާޅުވެދެއްވައިފި އެވެ.

ފްރެންޑްސް އޮފް މޯލްޑިވްސްގެ ނަމުގައި އިނގިރޭސިވިލާތުގައި ޖަމިއްޔާއެއް ހަދައިގެން މަސައްކަތް ކުރާ އެކްޓިވިސްޓު، ހާޑިންހަމް އާއެކު ރައީސް މުއިއްޒު ނަންގަވާފައިވާ ފޮޓޯއެއް ސޯޝަލްމީޑިއާގައި ދައުރުވާން ފެށީ ކާކުކަން ނޭނގޭ އެކްސް އެކައުންޓަކުން އެ ފޮޓޯ ސޯޝަލް މީޑިއާއަށް ދޫކޮށްލުމުންނެވެ.

ހާޑިންހަމް އާއެކު ނަގާފައިވާ އެ ފޮޓޯގައި ރައީސް މުއިއްޒުގެ އިތުރުން މި ސަރުކާރުގެ ހައުސިން މިނިސްޓަރު ޑރ. އަލީ ހައިދަރު އާއި އެމްއައިޓީޑީސީގެ މިހާރުގެ ޑެޕިއުޓީ މެނޭޖިން ޑިރެކްޓަރު، ނިޝްވާން އައްބާސް އާއި އިނގިރޭސިވިލާތަށް މި ސަރުކާރުން ކަނޑައަޅާފައި ހުންނަވާ ޑެޕިއުޓީ ހައިކޮމިޝަނަރު، މުހައްމަދު އަހުމަދު ހުއްޓެވެ.

ރައީސް މުއިއްޒު ވިދާޅުވީ އެ ފޮޓޯއަކީ އިނގިރޭސިވިލާތުގައި ކިޔަވަން އުޅުއްވި ދުވަސްވަރު އިސްލާމް ދީނުގެ ދިފާއުގައި ހާޑިމްއާ ޖަދަލު ކުރުމަށް ދިޔަ ދުވަހެއްގައި ނަގާފައިވާ ފޮޓޯއެއް ކަމަށެވެ.

"އަޅުގަނޑުމެން އެދުވަހު އެތަނަށް ދިޔައީ އޭރުގައި ފްރެންޑްސް އޮފް މޯލްޑިވްސް ކަންނޭނގެ ކިޔާ ޖަމިއްޔާއަކުން، އެ އިނގިރޭސި މީހާ ހަދާފައި އޮތް ޖަމިއްޔާއެއް، އޭރުގެ އެމްޑީޕީގެ އިސްވެރިންނާ އެކީ، އެމީހުން ލާދީނީ ކަންތައްތައް ކުރާތީ، އަޅުގަނޑުމެންގެ ގައުމާ ނުގުޅޭ ވާހަކަތައް ދައްކާތީ ކޮންފްރަންޓު ކުރަން ދިޔައީ،" ރައީސް މުއިއްޒު ވިދާޅުވި އެވެ.

"އަޅުގަނޑުމެން އެތަނުގައި ކޮންފްރަންޓު ކުރީ އެ ބައްދަލުވުމުގައި، ސުވާލުތައް ކުރިމަތި ކުރީ، ކޮށް ނިންމާފައި ނުކުމެ ފޮޓޯއެއް ނަގަން ހިނގާށޭ ބުނީމާ، ދެން އަޅުގަނޑު ހުންނާނީ ވެސް ވަރަށް ދުރުގައި އޭނައާ ފަހަތު ރޯގައި، އަޅުގަނޑު ދެން ފޮޓޯގައި ހުންނާނެ، ދެން ފޮޓޯއިން އެއްޗެއް ސާބިތުވަންޏާ ވާންވީ، ހަގީގަތް އޮތީ އެކަމު މި ދެންނެވި ގޮތަށް."

ނަސާރާ ދީން ރާއްޖޭގައި ފަތުރަން މަސައްކަތް ކުރި ކަމަށް ކަނޑައަޅައި ހާޑިންހަމް ޑީޕޯޓުކޮށްލީ 2005 ވަނަ އަހަރު އެވެ. ނަސާރާ ދީން ފަތުރަން މަސައްކަތް ކުރުމުގެ އިތުރުން އޭނާގެ މައްޗަށް ކުރީ ހަރުކަށި ފިކުރުގެ ބަޔަކު ބޭނުން ކޮށްގެން ރާއްޖެއަށް ހަތިޔާރު އެތެރެ ކުރަން މަސައްކަތް ކުރި ކަމުގެ ތުހުމަތެވެ.

ރައީސް ވިދާޅުވީ އިދިކޮޅު ފަރާތްތަކުން ހަދަމުން ދަނީ ހުސް ދޮގު ކަމަށެވެ. ދޮގު ހަދަން އެމީހުންނަށް މަޖުބޫރުވެފައި ވަނީ ޕީއެންސީ ކުރިމަތީގައި ހަދާނެ ގޮތް ހުސްވެފައި ވާތީ ކަމަށެވެ.

"މިހާރު ސިޔާސީ މައިދާނުގައި އަޅުގަނޑަށް މި ފެންނަނީ، އަޅުގަނޑަށް މިއޮއްހައި ދުވަހު ވެސް ފެނުނު މަންޒަރު ފެންނަނީ، ދޮގު ދޮގު ދޮގު، ދޮގު ހެދުން، އިންތިހާއަށް ދޮގު ހެދުން، އަދިވެސް އިތުރަށް ދޮގު ހެދުން، އެ ދޮގުން ސަލާމަތްވާން ވެސް ދޮގު ހެދުން، ދެން އިތުރު ކަމެއް ނެތް، އަޅުގަނޑު އޭގެ ބަދަލުގައި ހަދަނީ ތެދު، ޖަވާބު ވެސް ދެނީ ތެދުން، ރައްޔިތުން ގަބޫލު ކުރަނީ ތެދު، އެކަން ވޯޓުން ފެންނަން އެބައޮތް،" ރައީސް ވިދާޅުވި އެވެ.

އެމްއެމްޕީއާރުސީގެ ފައިސާއިން 14 މިލިއަން ރުފިޔާ ރައީސް މުއިއްޒުއަށް ލިބިވަޑައިގެންފައިވާ ކަމަށް ޕީއެންއެފްގެ ޖަލްސާއެއްގައި ކުރި ތުހުމަތަށް ވެސް ރައީސް ރޭ ރައްދު ދެއްވި އެވެ. އެގޮތުން އެމަނިކުފާނު ވިދާޅުވީ މިދިޔަ ސަރުކާރުގައި އެމްއެމްޕީއާރުސީގެ ހިޔާނާތާ ގުޅޭ އެތައް ލިސްޓެއް ނެރުނު ނަމަވެސް އެއިން އެއްވެސް ލިސްޓެއްގައި އެމަނިކުފާނުގެ ނަމެއް ނޯންނާނެ ކަމަށެވެ.