ރައީސް ޑރ މުހައްމަދު މުއިއްޒުގެ ކްރިމިނިލް ޖަސްޓިސް އެޑްވައިޒަރުގެ މަގާމުގައި ހުންނެވި މުހުތާޒު މުހުސިން ފޮރިން މިނިސްޓްރީގެ ސްޓޭޓް މިނިސްޓަރެއްގެ މަގާމަށް ބަދަލުކޮށްފި އެވެ.

ކުރީގެ ޕްރޮސެކިއުޓާ ޖެނެރަލްކަން ވެސް ކުރައްވާފައިވާ މުހުތާޒު ފޮރިން މިނިސްޓްރީއަށް ބަދަލުކުރި ސަބަބެއް ނޭނގުނު ނަމަވެސް ސަރުކާރުގެ ތަރުޖަމާނު ހީނާ ވަލީދު ވަނީ އޭނާ ފޮރިން މިނިސްޓްރީއަށް ބަދަލުކުރިކަން "އަދަދު" ނޫހަށް ކަށަވަރު ކޮށްދީފަ އެވެ.

އެކްސްގައި މުހުތާޒު ބޭނުން ކުރައްވާ އެކައުންޓުގެ ބަޔޯ ގައި ވެސް މިހާރު ލިޔުއްވާފައި ވަނީ "ފޯމާ ކްރިމިނަލް ޖަސްޓިސް އެޑްވައިޒާ އެޓް ޕްރެސިޑެންސީއެމްވީ" ކަމަށެވެ.

މުހުތާޒު ފޮރިންއަށް ބަދަލުކޮށްފައި މިވަނީ ޕްރޮސެކިއުޓާ ޖެނެރަލްގެ މަގާމަށް އޭނާ އައްޔަނު ކުރައްވަން ރައީސް މުއިއްޒު ބޭނުންފުޅުވެވަޑައިގަންނަވާ ކަމަށް ކުރީގެ ރައީސް އަބްދުﷲ ޔާމީން އަބްދުލްގައްޔޫމް ތުހުމަތު ކުރައްވާފައި ވަނިކޮށެވެ.

މިދިޔަ ބުރާސްފަތި ދުވަހުގެ ރޭ ޕީއެންއެންއެފްގެ އޮފީހުގައި ބޭއްވި ޖަލްސާއެއްގައި ވާހަކަދައްކަވަމުން ޔާމީން ވިދާޅުވީ މިހާރު ހުސްވެފައިވާ ޕީޖީގެ މަގާމަށް އައްޔަނު ކުރުމަށް ސަރުކާރުން މަސައްކަތް ކުރަނީ މުހުތާޒު މުހުސިނުގެ އިތުރުން އަބްދުއްރަހީމްގެ ދަނބިދަރިއެއް ކަމަށެވެ.

މުހުތާޒު ޕީޖީ ކަމާ ހަވާލުވެވަޑައިނުގަންނަވާނެ ކަމަށް އޭނާގެ އަރިސް ބައެއް ބޭފުޅުން "އަދަދު" އަށް މައުލޫމާތު ދިނެވެ.