ރައީސް ޑރ. މުހައްމަދު މުއިއްޒު އަދި ރައްޔިތުންގެ މަޖިލީހުގެ ރައީސް އަބްދުއްރަހީމް އަބްދުﷲ އަށް އެމްއެމްޕީއާރުސީ ހިޔާނާތުގެ ފައިސާ، ކުރީގެ ނައިބު ރައީސް އަހުމަދު އަދީބު ދެއްވި ކަމަށް ބުނެ ސޯޝަލް މީޑިއާގައި ފަތުރަނީ އަސްލެއް ނެތް ރިޕޯޓެއް ކަމަށް ފުލުހުން ބުނެފި އެވެ.

ފުލުހުންގެ ތަރުޖަމާނު އަދި އެސިސްޓަންޓު ކޮމިޝަނަރު އަހުމަދު ހަމައެކަނި ވިދާޅުވީ، ރައީސް އާއި އަބްދުއްރަހީމަށް ތުހުމަތުތަކެއް އަމާޒުވާ ގޮތަށް އޮތް ފުލުހުންގެ ތަހުގީގު ބަޔާނެއް ކަމަށް ބުނެ ސޯޝަލް މީޑިއާގައި ފަތުރަމުންދަނީ ސައްހަ ރިޕޯޓެއް ނޫން ކަމަށެވެ. އޭގެ އިތުރު ތަފުސީލެއް އޭނާ ނުދެއްވަ އެވެ.

މިހާރު ސޯޝަލް މީޑިއާގައި ދައުރުވަމުންދަނީ، ކުރީގެ ރައީސް އަބްދުﷲ ޔާމީނުގެ ވެރިކަމުގައި، އެމަނިކުފާނު ހައްޔަރުކުރަން ފެބްރުއަރީ 7، 2016، ގައި ނެރުނު ކޯޓު އަމުރާ ގުޅިގެން ފުލުހުން ތައްޔާރުކުރި ކަމަށް ބުނާ ރިޕޯޓެކެވެ. އޭގައި ފުލުހުންނާއި ސިފައިންގެ ތެރެއިން އަދި ސަރުކާރުގެ ތެރެއިން މިކަމުގައި ބައިވެރިވި ފަރާތްތަކުގެ ވާހަތައް ހިމެނެ އެވެ.

ލީކުވީ، ފުލުހުން އަސްލެއް ނޫން ކަމަށް ބުނާ ރިޕޯޓުގެ ހަތަރު ސަފުހާ އެވެ.

އެގޮތުން، އަދީބާ ގުޅުވައި، ވަޒީރުންގެ މަޖިލީހާއި ރައީސް އޮފީހުގެ ސިއްރު ބައްދަލުވުންތަކުގެ އިތުރުން ޕީޕީއެމް އޮފީހުގައި ދެކެވޭ ސިއްރު ވާހަކަތައް އޭރު ހޯމް މިނިސްޓަރުގެ މަގާމުގައި ހުންނެވި ރައީސް މުއިއްޒު، ކުރީގެ ސީޕީ އަބްދުﷲ ރިޔާޒާ ހިއްސާކުރި ކަމަށް އެ ރިޕޯޓުގައި ބުނެ އެވެ. އަދި އަދީބު، ރައީސް މުއިއްޒު އަށް 14 މިލިއަން ރުފިޔާ ދެއްވި ކަަމަށް ވެސް ބުނެފައިވެ އެވެ.

މަޖިލީހުގެ ރައީސް އާ ގުޅުވާ އެ ރިޕޯޓުގައި ވަނީ، ޔާމީނުގެ ވެރިކަން ބަދަލުކުރުމަށް އަދީބު އެމަނިކުފާނަށް ހަތަރު މިލިއަން ރުފިޔާ ދިން ކަމަށެވެ. އަދި، ރޭވުމާ އެއްގޮތަށް ޔާމީނު ހައްޔަރުކުރެއްވިއްޖެ ނަމަ އެމަނިކުފާނަށް އިތުރު 16 މިލިއަން ރުފިޔާ ދޭން ނިންމާފައިވާ އޮތް ކަމަށް ވެސް ރިޕޯޓުގައި ބުނެ އެވެ. އޭރު އެމަނިކުފާނު ހުންނެވީ ލ. ފޮނަދޫ ދާއިރާގެ މެންބަރުގެ ގޮތުގަ އެވެ.

އެމްއެމްޕީއާރުސީގެ ހިޔާނާތުގެ މައްސަލަ ރައްޔިތުންގެ މަޖިލީހުގެ ސަލާމަތީ ހިދުމަތްތަކުގެ ކޮމިޓީ އާއި ޖުޑިޝަރީ ކޮމިޓީ ގުޅިގެން އުފައްދާފައިވާ ޖޮއިންޓް ކޮމިޓީއަކުން ބަލައި، ފައިސާ ލިބުނު މީހުންގެ ލިސްޓެއް މެއި 12، 2021 ގައި ނެރުނެވެ. އެ ލިސްޓުގައި ރައީސް މުއިއްޒުގެ ނަން ނެތް ނަމަވެސް އަބްދުއްރަހީމުގެ ނަން އޮތެވެ. ލިސްޓުގައި އޮތް ގޮތުން އެމަނިކުފާނަށް ދީފައިވަނީ 1،708،400ރ. އެވެ.

ރިޕޯޓުގައި އިތުރަށް ހުރީ ޔާމީނުގެ ވެރިކަން ނިންމާ އެމަނިކުފާނު ހައްޔަރުކުރުމަށް އޭރު ސަރުކާރާއި ފުލުހުން އަދި ސިފައިންގެ ވެރިން ރޭވި ކަމަށް ބުނާ ވާހަކަތަކެވެ. އެގޮތުން އޭރު ޓެރަރިޒަމްގެ ދައުވާކޮށް ޖަލަށްލި ކުރީގެ ޕީޖީ މުހުތާޒް މުހުސިން އާއި މާމިގިލީ ކޯޓުގެ މެޖިސްޓްރޭޓް އަހުމަދު ނިހާނުގެ ވާހަކަ ވެސް ރިޕޯޓުގައި އޮތެވެ.