ވިލިމާލޭގައި ހުންނަ މުހްޔިއްދީން ސްކޫލުގެ ދަރިވަރުންނަށް ގައުމިއްޔަތާ ބެހޭ ކްލާހެއް އެމްއެންޑީއެފް އިން ނަގައިދީފި އެވެ.

އެމްއެންޑީއެފުން ބުނީ، އިއްޔެގެ ކްލާހުގައި އެ ސްކޫލުގެ 65 ދަރިވަރުންނާއި ސްކޫލުގެ ޓީޗަރުން ބައިވެރިވި ކަމަށެވެ. ނަމަވެސް ބައިވެރިވީ ކޮން ގްރޭޑުތަކެއްގެ ދަރިވަރުންނެއް ކަމެއް ނުބުނެ އެވެ. އެ ކްލާސް ކުރިއަށް ގެންދިޔައީ "ޝަހީދުންގެ ޒިކުރާ" މި މައުލޫއަށެވެ.

ސިފައިން ބުނި ގޮތުގައި ސްކޫލު ދަރިވަރުންނަށް ގައުމިއްޔަތާ ބެހޭ ކަންކަން ކިޔައިދިނުމަށް އިއްޔެގެ ކްލާހުގައި މައުލޫމާތު ފޯރުކޮށްދިނީ ސާޖަންޓު މޭޖާ އަބްދުﷲ ސައީދު އެވެ.

މި ސަރުކާރުން ވަނީ ދިވެހި ގައުމިއްޔަތު ދިރުވާ އާލާކުރުމަށް ވުޒާރާއެއް އެކުލަވާލާފަ އެވެ. އަދި، ގައުމީ ތައުލީމީ މަންހަޖުގައި ވަކި މާއްދާއެއްގެ ގޮތުގައި "ދިވެހި ގައުމިއްޔަތު" ހިމަނައި އެ މާއްދާ ކިޔަވައިދޭން ވެސް ވަނީ ފަށާފަ އެވެ.

އަލަށް ކިޔަވައިދޭން ފެށި ގައުމިއްޔަތު މާއްދާގެ މަންހަޖުގައި ހިމެނެނީ މައިގަނޑު ނުވަ ކަމެކެވެ.