އެމްޓީސީސީގެ ޗީފް އެގްޒެކެޓިވް އޮފިސަރު(ސީއީއޯ) އަދި މެނޭޖިން ޑިރެކްޓަރު (އެމްޑީ) އަބްދުﷲ ޒިޔާދު މިއަދު މަގާމުން ވަކިކޮށްފި އެވެ.

ޒިޔާދު މަގާމުން ވަކިކުރިކަން ޕްރައިވަޓައިޒޭޝަން އެންޑް ކޯޕޮރަޓައިޒޭޝަން ބޯޑު (ޕީސީބީ) އިން ހާމަ ނުކުރެ އެވެ. ނަމަވެސް އެ މައުލޫމާތު އެނގޭ މަސްދަރަކުން ޒިޔާދު މަގާމުން ވަކިކޮށް، އެމްޓީސީސީގެ ހިންގުން އެހެން މީހަކާ ހަވާލުކޮށްފައިވާކަން ކަށަވަރުކޮށް ދިނެވެ.

ޒިޔާދު ވިދާޅުވީ، އެފަދަ ވާހަކަ އަޑުއިވިފައިވާ ކަމަށެވެ.

އެމްޓީސީސީގެ ސީއީއޯ އަދި އެމްޑީގެ މަގާމަށް ޒިޔާދު އައްޔަންކުރީ ނޮވެމްބަރު 28، 2023 ގަ އެވެ.

ކުރީގެ ރައީސް އަބްދުﷲ ޔާމީންގެ ވެރިކަމުގައި ޒިޔާދު ހުންނެވީ ހައުސިން މިނިސްޓްރީގެ ސްޓޭޓް މިނިސްޓަރުގެ މަގާމުގަ އެވެ.

އެމްޓީސީސީން ހިންގަމުން ދިޔަ ގިނަ މަޝްރޫއުތަކެއް ސަރުކާރުގެ މާލީ ހާލަތު ދަށްވެގެން ވަނީ ހުއްޓާލައިފަ އެވެ.