ސަރުކާރު ކުންފުނިތަކުގެ ބެލެނިވެރި އިދާރާ ކަމުގައިވާ ޕްރައިވަޓައިޒޭޝަން އެންޑް ކޯޕަރަޓައިޒޭޝަން ބޯޑު (ޕީސީބީ)ން އެކުލަވާލާފައިވާ ސަރުކާރު ކުންފުނިތަކުގެ ޑިރެކްޓަރުންގެ ކޯޑް އޮފް ކޮންޑަކްޓުގައި ބުނާ ގޮތަށް ގިނަ ކުންފުނިތަކުގެ ޑިރެކްޓަރުން މާލީ ބަޔާން ހާމަނުކުރާކަން އެނގިއްޖެ އެވެ.

ޕީސީބީގެ ކޯޑް އޮފް ކޮންޑަކްޓުގައި އޮންނަނީ، ކޮންމެ އަހަރެއްގެ ޖެނުއަރީ 31، ގެ ކުރިން، ޑިރެކްޓަރުންގެ ފާއިތުވީ އަހަރުގެ މާލީ ބަޔާން ކުންފުނީގެ ވެބްސައިޓުގައި ޝާއިއުކުރުމުގެ އިތުރުން، ޕީސީބީއާ ލިޔުމުން ހިއްސާކުރަން ވާނެ ކަމަށެވެ. ނަމަވެސް "އަދަދު" އިން ބެލި އެއްވެސް ކުންފުންޏެއްގެ ވެބްސައިޓުން މި ބަޔާންތަކެއް ފެންނާކަށް ނެތެވެ.

ޑިރެކްޓަރުންގެ މާލީ ބަޔާންތަކާ ގުޅޭ ގޮތުން ޕީސީބީއާ ސުވާލުކުރުމުން، އެ ބޯޑުގެ ސެކެޓްރީ ޖެނެރަލް އަހުމަދު ޔާމީން ވަނީ މަދު ކުންފުނިތަކަކުން މާލީ ބަޔާންތައް ހާމަކުރި ނަމަވެސް، ގިނަ ކުންފުނިތަކުން މި ބަޔާންތައް އާންމުނުކުރާ ކަން މި ނޫހަށް ކަށަވަރުކޮށްދެއްވާފަ އެވެ.

"ބައެއް ކުންފުނިތަކުން [މާލީ ބަޔާންތައް ވެބްސައިޓުގައި ހާމަކޮށްފައި] އެބަހުރި، ވަރަށް މަދުން. ދެން އެހެން ނަމަވެސް އެހެން ކުންފުނިތަކުން އެގޮތަށް އާންމުކޮށްފައި ނެތީމައި އަޅުގަނޑުމެން ވާނެ އަންގާފައި. ދެން ބައެއް ކުންފުނިތަކުން އަޅުގަނޑުމެންނަށް ފޮނުވާފައި އެބަހުރި، ބޮޑަށް ހުރީ ވެސް ޕަބްލިޝްކޮށްފަ ހުރި ކުންފުނިތަކުން،" އޭނާ ވިދާޅުވި އެވެ.

ޕީސީބީގެ އުސޫލާ އެއް ގޮތަށް އަމަލުނުކުރާ ކުންފުނިތަކާ މެދު އަމަލުކުރަމުންދަނީ ކޮން ގޮތަކަށްތޯ ސުވާލުކުރުމުން ޔާމީން ވިދާޅުވީ މާލީ ބަޔާންތައް ހާމަކުރަން ހުރިހާ ކުންފުނިތަކެއްގައި އެދިފައި ވާނެ ކަމަށެވެ. އެ ބޯޑުން އިތުރު ފިޔަވަޅެއް އަޅަން ނިންމާފައިވާ ކަމަށް އޭނާ ވިދާޅެއް ނުވެ އެވެ.

މާލީ ބަޔާންތަކުގައި ހިމަނަން ޖެހޭ މައުލޫމާތުތަކުގެ ތެރޭގައި ޑިރެކްޓަރުންގެ އަނބިންނާއި ފިރިންނާއި ދަރިންގެ މައުލޫމާތާއި ވޭތުވެދިޔަ ފަސް އަހަރުގެ ތެރޭގައި އަދާކުރި ވަޒީފާތަކާއި އަނބިންނާއި ފިރިންނާއި ދަރިންނަށް އަހަރުގެ ތެރޭގައި ލިބުނު ފައިސާގެ އިތުރުން ބޭންކު އެކައުންޓުތަކުގެ ތަފުސީލުތައް ހިމެނެ އެވެ.

އޭގެ އިތުރުން މި އެންމެނަށް ނަގުދުގެ ގޮތުގައި ލިބި ބޭންކު އެކައުންޓަށް ޖަމާނުކުރާ ފައިސާ އާއި ކްރެޑިޓު ކާޑުތަކުގެ ތަފުސީލުތަކާއި ނަގާފައިވާ ލޯނުތަކުގެ އިތުރުން ލޯނުގެ ގޮތުގައި ދޫކޮށްފައި ހުރި ފައިސާ އާއި ލިބިފައިވާ އެހީ އާއި ހަރުމުދަލުގެ ތަފުސީލާއި ހިއްސާވާ ވިޔަފާރިތައް ވެސް މާލީ ބަޔާނުގައި ހިމަނަން ޖެހެ އެވެ.

ދައުލަތުގެ ކުންފުނިތަކުގެ ޑިރެކްޓަރުންގެ މާލީ ބަޔާންތައް ހާމަކުރުމަކީ ވަރަށް މުހިންމު ކަމެކެވެ. މިކަމުގެ މުހިންމުކަން ބިނާވެފައިވަނީ މައިގަނޑު ގޮތެއްގައި ޖަވާބުދާރީވުމާއި، ހާމަކަން ބޮޑުކުރުމާއި، އަދި ރަނގަޅު ގަވަނަންސްއާ ގުޅިފައިވާ ސަބަބުތަކަށެވެ. އަދި ކޮރަޕްޝަން ހުއްޓުވުމަށާއި އިންވެސްޓަރުންގެ އިތުބާރު އުފައްދައި ދަމަހައްޓަން ވެސް މި ބަޔާންތަކުން މުހިންމު ރޯލެއް އަދާކުރެ އެވެ.