މޫސުން ގޯސްވުމުގެ ސަބަބުން ދަތުރުފަތުރަށް އެރި ބުރުލުގެ ސަބަބުން މާލޭ ސަރަހައްދުގައި ހުންނަ މިފްކޯގެ ފިހާރަތަކުން ބައެއް އުފެއްދުންތައް އެއްކޮށް ހުސްވެއްޖެ އެވެ.

މިފްކޯގެ ފިހާރަތަކުން ހުސްވެފައި ވަނީ ރިހާކުރާއި ގިތެޔޮ މަސްދަޅުގެ އިތުރުން ލުނބޯ މަސްދަޅާއި ވަޅޯމަހެވެ. އެ ބާވަތްތައް ހުސްވި ނަމަވެސް އާންމުކޮށް ބޭނުންކުރާ ކަޅުބިލަ މަހުގައި ތައްޔާރު ކުރާ، ތެޔޮ މަސްދަޅާއި ފެން މަސްދަޅުގެ އިތުރުން ކަންނެލި މަހުން ތައްޔާރު ކުރާ އެކި ބާވަތްތަކުގެ އުފެއްދުންތައް މިފްކޯގެ މިފާހަރަކުން ލިބެން އެބަހުރި ކަމަށް އެ ކުންފުނީގެ މީޑިއާ އޮފިސަރު، އިބްރާހިމް ސައީދު (ކޭޑު) "އަދަދު" އަށް ވިދާޅުވި އެވެ.

"ޕްރޮޑަކްޝަން އެބަދޭ ހަމަ ކުރިއަށް، ދިމާވެގެން އުޅެނީ ލޮޖިސްޓިކްސްގައި ދަތިކަމެއް، ދެ ހަފުތާއެއްހައި ދުވަސްތެރޭގައި ހުރިހާ ޕްރޮޑަކްޓެއް ވެސް ލިބޭނެ،" އިބްރާހިމް ވިދާޅުވި އެވެ.

މާލޭގެ ފިހާރަތަކުން ބައެއް އުފެއްދުންތައް ހުސްވެފައި ވަނީ މޫސުން ގޯސްވުމުގެ ސަބަބުން ދަތުރުފަތުރަށް ބުރޫ އަރާފައި ވާތީ ކަމަށް އިބްރާހިމް ވިދާޅުވި އެވެ.

ހުޅަނގު މޫސުމުގެ ބާރު ގަދަވެ ހުސްވި ހަފުތާއިން ފެށިގެން ރާއްޖޭގެ އެކި ކަންކޮޅަށް ވަރަށް ބޮޑަށް މޫސުން ގޯސްވި އެވެ. މޫސުން ގޯސްވުމުގެ ސަބަބުން އާންމު ކަނޑުދަތުރުފަތުރުތަކަށް ވެސް ބުރޫ އަރާފައިވެ އެވެ. ނަމަވެސް މިއަދުން ފެށިގެން އާންމު ގޮތެއްގައި ރާއްޖޭގެ ހުރިހާ ސަރަހައްދަކަށް ވެސް މޫސުން ރަނގަޅުވާނެ ކަމަށް މޫސުމާ ބެހޭ ގައުމީ އިދާރާއިން ލަފާ ކޮށްފައިވެ އެވެ.

މަސް ލިބުން ދަތިވުމުގެ ސަބަބުން މިފްކޯގެ ބައެއް އުފެއްދުންތައް މިދިޔަ މަހު ވެސް މާލޭގައި ހުރި ފިހާރަތަކުން ހުސްވި އެވެ. އެފަހަރު ހުސްވީ ކަނޑުމަހުގެ ބާވަތްތަކުން ތައްޔާރު ކުރާ އުފެއްދުންތަކެވެ. ނަމަވެސް މަސްވެރިކަން ރަނގަޅުވުމާއެކު އުފެއްދުންތައް މިފްކޯގެ ފިހާރަތަކުގައި ތިޔާގިވި އެވެ.