މާލީ ހާލަތު ގޯސްވެފައިވާ ސަރުކާރުގެ މަސް ކުންފުނި، މިފްކޯ އިޝްތިހާރުކުރުމަށް ނޫސްތަކާއި ޓީވީ ޗެނަލް ތަކަށް ދެމުންދިޔަ ސްޕޮންސާތައް ކަނޑާލަން ނިންމައިފި އެވެ.

އެ ކުންފުނީގެ މީޑިއާ ޓީމުން ފޮނުވި މެސެޖެއްގައި ބުނީ، މިވަގުތު ކުންފުނި އޮތް ހާލަތުގެ ސަބަބުން އިތުރަށް ސްޕޮންސާޝިޕް ދެވެން ނެތް ކަމަށާއި ނުދެއްކި ހުރި ފައިސާތައް ދެއްކުމުގެ މަސައްކަތް ކުރަމުންދާ ކަމަށެވެ.

މިކަމުގެ އިތުރު ތަފުސީލު ދެއްވަމުން، އެ ކުންފުނީގެ ޕަބްލިކް ރިލޭޝަންސް މެނޭޖަރު މެނޭޖަރު އިބްރާހިމް ސައީދު ވިދާޅުވީ، އޭނާ ކުންފުންޏާ ގުޅުނުއިރު ކުންފުނިން 17 އަށްވުރެ ގިނަ މީޑިއާތަކަށް ސްޕޮންސާޝިޕް ދެމުންދާ ކަމަށެވެ. އެކަމަށް މަހަކު ދެ ލައްކަ އާއި ތިން ލައްކަ ރުފިޔާއާ ދެމެދުގެ އަދަދެއް ހަރަދުކުރަމުންދިޔަ ކަމަށްވެސް އޭނާ ބުންޏެވެ.

"މިފްކޯއިން މިދޭ ސްޕޮންސާއަކުންނެއް މިފްކޯއަކަށް ފައިދާއެއް ނޫނޭ ވަނީކީ. މި އިންވެސްޓުމަންޓަކީ އަސްލު އެދެވޭ ގޮތެއްގަ މިކަން ކުރެވޭ ކަމަކަށް ނުވެއޭ މެނޭޖްމަންޓުގަ ދެންނެވިން،" އޭނާ ވިދާޅުވި އެވެ.

މި ހަރަދު ސަލާމަތް ކުރުމަށް ފުރަތަމަ ބައެއް މީޑިއާތަކުގެ ސްޕޮންސާ ކަނޑާލި ނަމަވެސް، ކުންފުނި އޮތް ހާލަތުން އިތުރަށް މިކަން ނުކުރެވޭނެތީ އާއި މިކަމުން ކުންފުންޏަށް ފައިދާ ނުވާތީ މިހާރު ވާނީ ހުރިހާ ނޫހަކަށް ދެމުންދިޔަ ސްޕޮންސާތައް ކަނޑާލާފައި ކަމަށް ވެސް އޭނާ ވިދާޅުވި އެވެ.

މިފްކޯގެ މާލީ ހާލަތު ގޯސްވެ، މަސްވެރިންނަށް ފައިސާ ދިނުމުގައިވެސް މިދިޔަ އަހަރެއްހާ ދުވަހުގެ ތެރޭ ގިނަ ދަތިތަކެއް ކުރިމަތިވި އެވެ. ނަމަވެސް އެ ކުންފުނިން މިހާރު ވަނީ އެކަން ހައްލުކުރުމަށް ބީއެމްއެލް އާއި ފިނޭންސް މިނިސްޓްރީއާއެކު އެއްބަސްވުމެއް ހަދާފަ އެވެ.