ދިވެހިރާއްޖެ މާލީ ގޮތުން ވެއްޓިފައިވާ އަނދަވަޅު ސަލާމަތް ވުމަށްޓަކައި ހަރަދު ކުޑަކޮށް، އަދި އަޅަންޖެހޭ އެހެން ހުރިހާ ފިޔަވަޅުތައް ވެސް އަވަހަށް އަޅަންޖެހޭ ކަމަށާއި އެހެން ނޫނީ ގައުމު އިނދަ ޖެހުމުން [ބަނގުރޫޓުވުމުން] ސަލާމަތް ނުކުރެވޭނެ ކަމަށް، ރައްޔިތުންގެ މަޖިލީހުގެ މާމިގިލީ ދާއިރާގެ މެންބަރު ގާސިމް އިބްރާހިމް ވިދާޅުވެއްޖެ އެވެ.

ރައްޔިތުންގެ މަޖިލީހުގެ އިއްޔެ ޖަލްސާގައި ކުރިއަށް ގެންދިޔަ އާބަން ޑިވެލޮޕްމެންޓު ބިލްގެ ބަހުސްގައި ގާސިމް ވިދާޅުވީ ދައުލަތުގެ ދަރަނި 130 ބިލއަން ރުފިޔާއާ ކައިރިކޮށްފި ކަމަށާއި، އެ ދަރަނިން ސަލާމަތް ވެވޭނީ އަޅަންޖެހޭ ހުރިހާ ފިޔަވަޅެއް އަވަހަށް އަޅައިގެން ކަމަށެވެ.

"ސަރުކާރުން ވެސް ހަރަދު ކުޑަކުރެވެން އޮތް ހުރިހާ ދިމާލަކުން ހަރަދު ކުޑަކުރައްވައިގެން، އަޅުގަނޑުމެން ދެ އަހަރެއްހާ ދުވަހަށ،ް ދޮޅު އަހަރެއްހާ ދުވަހަށް ނަމަވެސް ހަމަ އަޅުގަނޑުމެން ކަމަރުތައް ބާރުކޮށްލައިގެން އަޅުގަނޑުމެން ބަނޑު ހިންދާލައިގެން ތިބެންޖެހޭ ދުވަސް މި އޮތީ ކައިރިވެފަ،" މާލިއްޔަތު ކޮމިޓީގެ މުގައްރިރު އަދި ވިލާ ގްރޫޕްގެ ޗެއާމަން ގާސިމް ވިދާޅުވި އެވެ.

ސަރުކާރުން ހަރަދު ކުޑަ ނުކޮށްފި ނަމަ ކިޔަވަން ގޮސް ތިބި ދަރިވަރުންނަށް ފައިސާ ނުފޮނުވޭނެ ކަމަށާއި ބޭސް ނުލިބޭނެ ކަމަށް ގާސިމް ވިދާޅުވި އެވެ. އަދި ދާން ބޭނުން ވިޔަސް، ރާއްޖޭން ބޭރަށް ދާނެ ޑޮލަރު ނުލިބޭ ހިސާބަށް ކަންކަން ގޯސްވެގެން ދާނެ ކަމުގެ އިންޒާރު ގާސިމް ދެއްވި އެވެ.

"ފޮރިން އެކްސްޗޭންޖު ކަރަންސީއެއް ނުލިބޭނެ. މިހެން މިހާލަތަށް ދިޔައިމާ އެ ލިބޭ ނިކަމެތިކަން މާބޮޑުވާނެ،" ގާސިމް ވިދާޅުވި އެވެ.

އެ ހާލަތު ދިގުދެމިގެން ހިނގެއްޖެ ނަމަ، ކުރިމަތިވާ ދަތި މާ ބޮޑުވާނެ ކަމަށާއި، އެހެންވެ، އެހިސާބަށް ދިޔުމުގެ ކުރިން ދަތިކަމުން އަރައިގަތުމަށް އެންމެން އެއްބާރުލައިގެން މަސައްކަތް ކުރަންޖެހޭ ކަމަށް ގާސިމް ވިދާޅުވި އެވެ.

މިގައުމު މި ހާލަތަށް ދިޔުމުގައި ރައްޔިތުންގެ މަޖިލީހުގެ ޒިންމާ ފުރިހަމަ ގޮތުގައި އަދާނުކޮށް އޮތުން ހިމެނޭކަން ފާހަގަ ކުރައްވައި، ގާސިމް ވިދާޅުވީ މި ދަތިކަމުން އަރައި ގަތުމަށް މަޖިލީހުން މަސައްކަތް ނުކޮށްފި ނަމަ، އަދި އެއްބާރުލުން ފުރިހަމަ އަށް ނުދީފިނަމަ ދަތި އުނގަލުން އަރައި ނުގަނެވޭނެ ކަމަށެވެ.

"އެއް ރޫހެއްގައި އެއް އަޒުމެއްގައި މަސައްކަތް ކޮށްގެން މެނުވީ އަޅުގަނޑުމެން ސަލާމަތެއް ނުވެވޭނެ އިނގޭތޯ،" ގާސިމް ތަކުރާރުކޮށް އިންޒާރު ދެއްވި އެވެ.

ޑޮލަރު ލިބެނީ ވެސް ބްލެކް މާކެޓުގައި ވިއްކާ މީހަކު ވިއްކި އަގަކަށް ކަމަށާއި، ސަރުކާރުގެ ކުންފުނިތަކަށް ވެސް ޑޮލަރު ގަންނަން ޖެހިފައިވަނީ ބްލެކް މާކެޓުން ކަމަށާއި، ނަމަވެސް އެކަން ވެސް ނޭނގޭ ކަމަށް ހަދައިގެން ތިބެނީ ކަމަށް ގާސިމް ވިދާޅުވި އެވެ.

"ދެން އަޅުގަނޑުމެން އެއްބަޔަކު އަނެއްބަޔަކާ ދިމާލަށް އިނގިލި ދިއްކޮށްގެން މިގޮތަށް ފިތުނަވެރިކަމުގެ ހުޅުގަނޑު ރޯކުރީމާ އެ ދަންމަރުގައި ހިފައިގެން ދުވަން ތިބީ ކޮންބައެއްތޯ؟،" ސިޔާސީ ގޮތުން އެއްބަޔަކު އަނެއް ބަޔަކާ ޒާތީ ނުވެ، ގައުމުގެ ހާލަތު ރަނގަޅުކުރަން ގުޅިގެން މަސައްކަތް ކުރުން މުހިއްމުކަން ފާހަގަ ކުރައްވައި ގާސިމް ވިދާޅުވި އެވެ.

"އަޅުގަނޑުމެން އަމިއްލައަށް ދެއްތޯ ހަލާކުވުމުގެ ތެރެއަށް މިދަނ.ީ އެހެންވީމ،ާ އަޅުގަނޑުގެ އާދޭހަކީ އިއްޒަތްތެރި މެންބަރުންނ،ޭ ފިކުރުވެރިކަމާއި ހަމަ އިހުލާސްތެރިކަމާ އެކީގައި އަޅުގަނޑުމެން އެކީގައި މަސައްކަތް ކޮށްގެނ،ް އަޅަންޖެހޭ ފިޔަވަޅެއް ސަރުކާރުން ވެސް ވަގުތުން ވަގުތަށް އަޅައ،ި ލަސްނުކުރައްވާށ.ޭ ލަސްކުރައްވައިގެން ނެތޭ ސަލާމަތެއް. ހަރަދުކުޑަކުރައްވާށޭ ދައުލަތުގެ، ކުޑަކުރެވެން އޮތް ހުރިހާ ދިމާލަކުން ކުޑަކޮށްގެން ވެސް މި ދަރަނިތަކުން ސަލާމަތްވަން އަޅުގަނޑުމެން އެބަޖެހ.ޭ"

އަދި އެހެން ބައެއްގެ ފަރާތުން އެހީތެރިކަން ލިބޭނެ ކަމަށް ބަލައިގެން ތިބެން ވެއްޖެ ނަމަ ރާއްޖެ ސަލާމަތް ނުކުރެވޭނެ ކަމަށާއި އެގޮތަށް ތިބެން ވެއްޖެ ނަމަ "އިނދަޖެހި ވަޅުގަނޑަކަށް ވެއްޓިގެން ހިނގައިދާނެ" ކަމަށް ވެސް ގާސިމް އިންޒާރު ދެއްވި އެވެ.

މާލީ ހާލަތު ގޯސްވެ، ބޭނުން ކުރެވޭ ރިޒާވް އިންތިހާއަށް ވަނީ ދަށަށް ގޮސްފަ އެވެ. އަދި ސަރުކާރުގައި ފައިސާ ނެތި، މަޝްރޫއުތައް ވަނީ ހުއްޓައިލައިފަ އެވެ. މި ހާލަތަށް ގައުމު ދިޔައިރު ވެސް، ރައީސް ޑރ. މުހައްމަދު މުއިއްޒު އުފައްދަވާފައިވާ ސިޔާސީ މަގާމުތަކުގެ އަދަދު ދަށްކުރާކަށް މަސައްކަތެއް ނުކުރައްވަ އެވެ.

މިފަދަ ދަނޑިވަޅެއްގައި އެއްބާރުލުން ނުދީ ހަޅުތާލުކުރަން ފަށައިފި ނަމަ، ހާލަތު ދާނީ ގޯހުން ގޯހަށް ކަމަށް ވެސް ގާސިމް ވިދާޅުވި އެވެ.