ވެލާނާ އިންޓަނޭޝަނަލް އެއާޕޯޓު ޒަމާނީ ފެންވަރަށް ތަރައްގީ ކުރުމަށް ކުރިއަށްގެންދާ މަޝްރޫއުގެ އެންމެ ފަހުގެ މަސައްކަތްތައް ނިންމުމަށް ބޭނުންވާ 40 މިލިއަން އެމެރިކާގެ ޑޮލަރު ލޯނެއްގެ ގޮތުގައި އަބުދާބީ ފަންޑް ފޯ ޑިވެލޮޕްމަންޓު (އޭޑީއެފްޑީ) މެދުވެރިކޮށް ދިވެހި ސަރުކާރުން ނަގައިފި އެވެ.

ފިނޭންސް މިނިސްޓްރީން ހާމަކުރި ގޮތުގައި ގާތްގަނޑަކަށް 616 މިލިއަން ރުފިޔާގެ މި ލޯނު އެއްބަސްވުމުގައި ދާދިފަހުން ފިނޭންސް މިނިސްޓަރު މޫސާ ޒަމީރު ވަނީ ސޮއިކުރައްވާފަ އެވެ. އޭޑީއެފްޑީގެ މަންދޫބެއްގެ ގޮތުން ސޮއިކުރެއްވީ ޑިރެކްޓަރު ޖެނެރަލް މުހައްމަދު ސައިފް އައްސުވައިދެވެ.

އެކުވެރި އަރަބި އިމާރާތައި އޭޑީއެފްޑީން ވެސް ރާއްޖޭގެ ތަރައްގީއަށްވަމުންދާ އެހީތެރިކަމަށް ލޯނު އެއްބަސްވުމުގައި ސޮއިކުރެއްވުމަށް ފަހު ޒަމީރު ޝުކުރު އަދާކުރެއްވި އެވެ. ރާއްޖޭގައި ހިންގި މުހިންމު މަޝްރޫއުތަކަށް އެ ފަންޑުން ވަނީ މާލީ އެހީތެރިކަން ފޯރުކޮށްދީފަ އެވެ.

"މިއީ ދަތުރުފަތުރުގެ ދާއިރާގައި އުމްރާނީ ވަސީލަތްތައް ތަރައްގީ ކުރުމާއި، ދަތުރުކުރާ މީހުންނަށް ލިބޭ ތަޖުރިބާ ރަނގަޅު ކުރުމާއި، އަދި ގައުމީ އިގުތިސޯދުގެ މުހިންމު ތަނބެއް ކަމުގައިވާ ފަތުރުވެރިކަމުގެ އާމްދަނީ އިތުރުކުރުމަށް އަޅުގަނޑުމެންގެ ގައުމީ ލަނޑުދަނޑިތައް ހާސިލުކުރުމުގައި ވަރަށް މުހިންމު މަރުހަލާއެއް," މި ރަސްމިއްޔާތަށް ފަހު ޒަމީރު ވިދާޅުވި އެވެ.

ހުޅުލޭ އެއާޕޯޓު ޒަމާނީކޮށް ތަރައްގީކުރުމަށް ދޭ އިތުރު އެހީތެރިކަމުން ރާއްޖޭގައި ކުރިއަރަމުންދާ ފަތުރުވެރިކަމުގެ ޑިމާންޑަށް ފެތޭ ގޮތަށް އެއާޕޯޓުގެ ހިދުމަތް ދިނުމުގެ ގާބިލުކަން އިތުރުވެގެންދާނެ ކަމަށް އޭޑީއެފްޑީގެ ޑިރެކްޓަރު ސައިފް ވިދާޅުވި އެވެ. އޭގެ އިތުރުން ދިވެހި ސަރުކާރާއެކު އޮތް ގުޅުން އިތުރަށް ބަދަހި ކުރުމަށް މަސައްކަތް ކުރަމުންދާ ކަމަށް ވެސް އޭނާ ވިދާޅުވި އެވެ.

މި މަޝްރޫއުގެ ފުރަތަމަ މަރުހަލާއަށް ވެސް 50 މިލިއަން އެމެރިކާ ޑޮލަރުގެ ލޯނެއް އޭޑީއެފްޑީން ދިންއިރު އަލަށް ހަމަޖެއްސި ލޯނާއެކު އޭޑީއެފްޑީއަށް ދައްކަން ޖެހޭ ދަރަނި 90 މިލިއަން ޑޮލަރަށް އަރާނެ އެވެ.

އެ ފަންޑަކީ އަބޫދާބީގެ ސަރުކާރާ ގުޅިފައިވާ އެ ގައުމުގެ ޝާހީ އާއިލާއިން މެނޭޖުކުރާ ފަންޑެކެވެ. ޖުލައި 15, 1971 ގައި ވުޖޫދުކުރި މި ފަންޑުގެ ޗެއާމަނަކީ އެ ގައުމުގެ ނައިބު ރައީސް އަދި ޑެޕިއުޓީ ޕްރައިމް މިނިސްޓަރު މަންސޫރު ބިން ޒައިދު އަލް ނަހުޔާން އެވެ.

އެ ފަންޑުގެ މަގްސަދަކީ ދެމެހެއްޓެނިވި ތަރައްގީގެ މަޝްރޫއުތަކަށް ލުއި ލޯނު ދިނުމާއި، ދިގު މުއްދަތުގެ އިންވެސްޓްމަންޓްތައް ހިންގުމާއި، ކުރިއަރަމުން އަންނަ ގައުމުތަކަށް އެހީތެރިވުމަށް ކަމަށެވެ.

ވީއައިއޭގެ އާ ޕެސެންޖާ ޓާމިނަލަކީ ކުރީގެ ރައީސް އަބްދުﷲ ޔާމީން ފެއްޓެވި ވެލޭނާ އެއާޕޯޓުގެ އެކްސްޕޭންޝަން ޕްރޮޖެކްޓުގެ ދަށުން ކުރެވޭ މަސައްކަތެކެވެ.

ޕެސެންޖާ ޓާމިނަލް ހިމެނޭގޮތަށް މިހާރު ކުރިޔަށްދާ ވެލާނާ އިންޓަނޭޝަނަލް އެއާޕޯޓުގެ އެކްސްޕެންޝަން ޕްރޮޖެކްޓް އެއްކޮށް ނިމުމުން، އެއާޕޯޓުގެ ކެޕޭސިޓީ ދެ ގުނައަށް ވުރެ އިތުރުވެ، އަހަރަކު 7.5 މިލިއަން ފަސިންޖަރުންނަށް ހިދުމަތް ދެވޭ ފެންވަރަށް ވަސީލަތްތައް ތަރައްގީ ވެގެން ދާނެ އެވެ.