ތައިލެންޑްގައި މި އަހަރުގެ ނޮވެމްބަރު މަހު ބާއްވަން ނިންމާފައި އޮތް އޭޝިއަން އިންޑޯ އެންޑް މާޝަލް އާޓްސް ގޭމްސް (އައިމެގް) ކެންސަލްކުރަން އޮލިމްޕިކް ކައުންސިލް އޮފް އޭޝިއާ (އޯސީއޭ) އިން ނިންމާފައިވާ ކަމަށް މޯލްޑިވްސް އޮލިމްޕިކް ކޮމިޓީ (އެމްއޯސީ) އިން އިއުލާނުކޮށްފި އެވެ.

ގޭމްސް ބާއްވަން ތާވަލުކޮށްފައި އޮތީ ނޮވެމްބަރު 21-30 އަށް ތައިލެންޑްގެ ބެންކޮކް އާއި ޗޮންބުރީގަ އެވެ. އެކަމަކު، ގޭމްސް ކެންސަލްކުރަން ނިންމި އެންމެ ބޮޑު ސަބަބަކީ، ގޭމްސް ބާއްވަން ކަންކަން ފުރިހަމަ ކުރަން ދިން މުއްދަތުގައި އެކަން ކުރެވިފައި ނުވާތީ އެވެ.

އެ ގޮތަށް ނިންމާފައިވަނީ، އޮލިމްޕިކް ކައުންސިލް އޮފް އޭޝިއާ (އޯސީއޭ)ގެ އެގްޒެކްޓިވް ކޮމިޓީން ބޭއްވި ކުއްލި ބައްދަލުވުމަކަށް ފަހު އެެވެ.

އޮލިމްޕިކް ކޮމިޓީން ބުނީ، ގޭމްސް ފެށެން މިހާ ކައިރިވެފައި އޮތް މުއްދަތެއްގައި އޯސީއޭގެ މި ނިންމުން އައުމާ އެކު، އެތުލީޓުންނާއި ސަޕޯޓަރުންނަށް މި ކަމުގެ ސަބަބުން މާޔޫސްކަމެއް އަތުވެދާނެކަން ގަބޫލުކުރެވޭ ކަމަށެވެ. އެކަމަކު، މި ލެވަލްގެ މުބާރާތެއްގެ ހައިބަތާއި ފެންވަރު ހިފެހެއްޓުމަށްޓަކައި، އޯސީއޭ އިން މި ފަދަ ނިންމުމެއް ނިންމުމުން، އޮލިމްޕިކް ކޮމިޓީން ވަނީ އެ ކަމަށް މަރުހަބާ ކިޔައިފަ އެވެ.

ދެން، އައިމެގް ބޭއްވުމުގެ ފުރުސަތު ދީފައިވަނީ، ސައުދީ އަރަބިއްޔާ އަށެވެ. އެ ގޮތުން، ސައުދީގެ ރިޔާދުގައި ބާއްވަން ނިންމި އައިމެގް އޮންނާނެ ތާރީހެއް ކުރިއަށް އޮތް ދުވަސްތަކުގައި އިއުލާނުކުރެވިގެންދާނެ ކަމަށް އޮލިމްޕިކް ކޮމިޓީން މިރޭ ނެރުނު ބަޔާނުގައި ބުނެފައިވެ އެެވެ.

އަންނަ އަހަރު އިސްލާމިކް ސޮލިޑާރިޓީ ގޭމްސް (އައިއެސްޖީ) ވެސް ބާއްވަން ނިންމާފައި އޮތީ ރިޔާދުގަ އެވެ.

އެންމެ ފަހުން، އައިމެގް ބޭއްވީ 2017 ވަނަ އަހަރު ތުރުކުމެނިސްތާންގެ އަޝްގަބަތުގަ އެވެ. ތައިލެންޑްގައި 2021 ވަނަ އަހަރު ބާއްވަން ފުރުސަތު ދިން ގޭމްސް އެކި ސަބަބުތަކާ ހުރެ ލަސްކުރަމުން އައިސް އެންމެ ފަހުންމ ި ވަނީ ކެންސަލްކޮށްފަ އެވެ.