މަސްތުވާތަކެތީގެ މައްސަލައެއްގައި ކާށިދޫ މިސްކިތެއްގެ އިމާމު ހައްޔަރުކޮށްފި އެވެ.

ފުލުހުން ބުނީ މަސްތުވާތަކެތި ގެންގުޅުނުކަމުގެ މައްސަލައެއްގައި ހައްޔަރުކުރީ ޝަބްނަމްގެ، ކ، ކާށިދޫ، ގާނިމް ސަލީމް، 37، ކަމަށެވެ. އޭނާއަކީ އެރަށު އިމާމު ކަމަށް ވެސް ފުލުހުން ބުންޏެވެ.

ނަމަވެސް އޭނާގެ އަތުން ފެނުނީ ކޮން ބާވަތެއްގައި އަދި ކިހާ އަދަދެއްގެ މަސްތުވާތަކެއްޗެއް ކަމެއް ފުލުހުން ނުބުނެ އެވެ.

އިއްޔެ ހައްޔަރުކުރި ގާނިމް އަދިވެސް ހުރީ ފުލުހުންގެ ބެލުމުގެ ދަށުގަ އެވެ. އޭނާގެ ބަންދަށް އިތުރު ދުވަސްތަކެއް ޖަހާފައިވާ ކަމަކަށް ފުލުހުން ނުބުނެ އެވެ.

ފުލުހުން ބުނީ މި މައްސަލަ އަދިވެސް ދަނީ ތަހުގީގުކުރަމުން ކަމަށެވެ.

ރާއްޖޭއަށް ކުރިމަތިވެފައިވާ އެންމެ ބޮޑު އެއް މައްސަލަ ކަމުގައިވާ މަސްތުވާތަކެތީގެ މައްސަލަ ހައްލުކުރަން ފުލުހުންނާއި ސަރުކާރުން ދަނީ ގިނަ މަސައްކަތްތަކެއް ކުރަމުންނެވެ.

އެގޮތުން މަސްތުވާތަކެތި އެތެރެކުރާ މީހުންނާއި އެ ވިޔަފާރީގެ ބޮޑުންނަށް މަރުގެ އަދަބު ދެވޭ ގޮތަށް މަސްތުވާތަކެތީގެ ގާނޫނު އިސްލާހުކުރަން ސަރުކާރުން ދަނީ މަސައްކަތް ކުރަމުންނެވެ.

ރާއްޖޭގައި މަސްތުވާތަކެތި ބޭނުން ކުރާ 7000 އަށް ވުރެ ގިނަ މީހުން އުޅޭ ކަމަށް ދިރާސާތަކުން ދައްކަ އެވެ. އޭގެ ތެރޭގައި ގިނަ އަދަދެއްގެ ކުޑަކުދިން ވެސް ހިމެނެ އެވެ.